Yashyizweho kuri 14 February, 2017 | 12:37

Gatsibo: kwinangira, ipfundo mu kutishyura ibyononwe muri jenoside

Muri Murambi ya Gatsibo, ubukene bw’abononnye imitungo muri jenoside, dosiye zitujuje ibyangombwa ni bimwe bivutsa abacitse ku icumu kubona ubutabera. Kwinangira kwabo ngo ni inzitizi ikomeye, ikwiye umuti wihariye.

Imyaka 23 irashize, jenoside yakorewe abatutsi ihagaritswe. Kimwe n’ahandi, i Gatsibo mu murenge wa Murambi, akagari ka Rwimitereri, imyaka 4 irarangiye Inkiko gacaca zishoje imirimo yazo, nyuma yo gucira imanza abayigizemo uruhare, haba mu bwicanyi cyangwa mu gusahura imitungo. Uretse ibibazo binyuranye birimo ubukene, i Rwimitereri ho havugwa n’umwihariko w’abakatiwe badashaka kwishyura abacitse ku icumu imitungo yabo basahuwe cyangwa bononnye mu gihe cya jenoside.

Kimwe n’abacitse ku icumu, ubuyobozi bw’akagari ka Rwimitereri busanga uku kwinangira ari imbogamizi ikomeye ituma abacitse ku icumu batabona ubutabera. Umunyamabanga nshingwabikorwa, Mukase Claudine, agira ati “ hari abo bigaragara koko ko nta bushobozi, ku buryo n’abahemukiwe bibwwiriza bakababarira. Ikibazo gikomeye ni icy’abagaragaza ubushake buke”, ku buryo ngo bisaba kwigishwa cyangwa ingufu za Leta.

Abenshi ni abafunguwe

Nk’uko kandi bivugwa n’ubuyobozi, mu mwaka ushize wa 2016, Akagari ka Rwimitereri ngo kagaragaragamo imanza hafi ibihumbi 3 zari zitararangizwa. Muri izo manza, izigera kuri 200 gusa ni zo zari zujuje ibyangombwa, ku buryo mu Ukuboza 2016 na Mutarama 2017, izigera kuri 22 zashoboye kurangizwa.
Gusa rero ziriya manza zitararangizwa, inyinshi muri zo ngo ntijuje ibyangombwa. Kuba harimo izidafite kashe mpuruza, kuba hari izitariho isinya y’inyangamugayo za gacaca, cyangwa se izindi ntizigaragaze agaciro nyirizina k’ibyononwe bigomba kwishyurwa, ibi byose ngo no byatumye hari raporo ikorerwa Umurenge n’Akarere kugira ngo Komisiyo y’igihugu yo kurwanya jenoside (CNLG) ibifateho umwanzuro.
Nubwo izi ari inzitizi zishobora kubonerwa ibisubizo, nubwo « nta wibwiriza ngo yishyure, bose babyibutswa cyangwa babitegekwa », ubuyobozi busanga abafunzwe kubera jenoside bakarangiza ibihano byabo, ari inzitizi ikomeye mu kwishyura imitungo. Madamu Mukase Claudine agira ati « uretse imyitwarire n’imvugo bigaragaza ubushake buke, aba bantu barangwa no kwinangira », ku buryo mu by’ukuri « aba bantu bishe usanga bari bakwiye gahunda yihariye, igihe bafunze na nyuma yabyo, ibafasha kongera kubana n’abantu ».

Umuti ubereye Murambi

Hahoze hitwa Murambi y’inyambo kubera ubworozi. Muri “demukarasi” no mu gihe cya jenoside, hitwa Murambi kwa Gatete, kubera ubugome n’amaraso yahamennye mu mwanya w’akandi kamaro. I Rwankuba, mu mudugudu wa Nyagasambu, Akagari gaturanye na Rwimitereri, ni ho havuka uyu mugabo Gatete J.Baptiste wakatiwe igifungo cya burundu n’Urukiko mpanabyaha mpuzamahanga rwashyiriweho u Rwanda (TPIR) kubera jenoside. “Umutima mubi n’ukwinangira” bivugwa ku bakoze jenoside barangije ibihano, ku bacitse ku icumu ngo bingana “ubugome bwa Gatete wabatoje, n’ubukana n’ubwitabire bijandikanye muri jenoside. Umwe mu bacitse ku icumu agira ati “muri za 92, ubwo ahandi bari mu iterambere, twe hano babazaga ntampongano y’umwanzi” yakwijwe iguhugu cyose mu kumara abatutsi. Mu kumwunganira, umusaza w’imyaka 75 wavukiye i Murambi avuga ko ngo kubera ko akabaye icwende katoga, kakoga ntigacye, kacya ntigashire umunuko, “Murambi ikwiye kuvugutirwa umuti wihariye, kugira ngo ahagizwe indiri y’urwango himakaze urukundo” nk’urwahozeho igihe cya Murambi y’inyambo.

Muri Gicurasi 2012, mu biganiro hagati ya Komisiyo y’ubumwe n’ubwiyunge n’inzego zinyuranye mu Karere ka Gatsibo, ikibazo cy’ubwishyu bw’ibyasahuwe muri jenoside cyagaragaye nka kimwe mu biteza amakimbirane. N’icyo gihe havuzwe ikibazo cy’abangije imitungo badafite ubushake bwo kwishyura, naho abandi bakaba bari bafite ubushake bwo kwishyura ariko badafite ibyo kwishyura, ikibazo kikavukira mu guteza imitungo yabo cyamunara. Mu kwanga kwishyura imitungo y’abacitse ku icumu rya Jenoside yakorewe abatutsi, ngo hagaragara no guhisha imitungo, abaturanyi ntibatange amakuru.

Amaherezo, kimwe n’abacitse ku icumu bavutswa uburenganzira, umunyamabanga nshingwabikorwa wa Rwimitereri na we asanga umuti ngo ari “ubufatanye bw’abaturage, abahesha b’inkiko b’umwuga n’abatari umwuga”.

Sehene Ruvugiro


Tanga igitecyerezo

Who are you?