Yashyizweho kuri 24 August, 2018 | 13:46

Gahengeri: Ntibazi ibibujijwe mugihe abashaka kuba abadepite biyamamaza

Mu gihe habura ukwezi kumwe n’igice kugira ngo habeho amatora y’abadepite abaturage batuye mu ntara y’Iburasirazuba mu Karere ka Rwamagana, mu murenge wa Gahengeri ,ntibaramenya ibibujijwe mu gihe abashaka kuba abadepite biyamamaza. Abaturage bavuga ko ibibishobora gutuma abiyamamaza hari amakosa bashobora kubakoresha.

Imbogamizi zo kuba abaturage bo mu murenge wa Gahengeri ,batazi ibibujijwe mu gihe abashaka kuba abadepite biyamamaza, bazigaragaje ubwo muri uyu murenge hari habereye ibiganiro,hagati y’abaturage n’abayobozi bitegurwa n’umuryango w’abanyamakuru baharanira amahoro , PAX PRESS.

Nyirabashyitsi Marie Grace umubyeyi w’abana bane ukora umurimo w’ubuhinzi avuga ko niba hari ibyo abayiyamamariza kuba abadepite babujijwe gukora mugihe biyamamaza ngo we nk’umuturage ntabyo azi. Ati“ Niba hari ibyo abashaka kwiyamamaza babujijwe njye simbizi ariko niba bihari ubuyobozi bwabidufasha mo kugirango tubisobanukirwe neza igihe cyo gutangira kwiyamamaza nikigera tuzabe tubizi kugirango bizaturinde ko hagira amakosa badukoresha mugihe barimo kwiyamamaza.”

Rurangirwa Janvier nawe ni umuturage utuye mu murenge wa Gahengeri ufite abana 3 avuga ko kumenya ibyo abiyamamariza kuba abadepite babujijwe ari ingenzi nk’abaturage. Ati“ Tumenye ibyo abiyamamariza kuba abadepite babujijwe byadufasha kuko byatuma batadukoresha amakosa bitewe n’inyungu bafite mu gushaka abazabatora.”

Umuyobozi wa komisiyo y’amatora mu Karereka Rwamagana Kayonza Umutoni Eliane avuga ko bagiye gushyiraho gahunda yo kujya basobanurira abaturage ibyo abiyamamariza kuba abadepite babujijwe mu gihe barimo kwiyamamaza. Ati“ mu gihe habaye inteko rusange z’abaturage, umuganda ndetse n’igihe bahuriye mu masibo aho hose tuzahifashisha mu gusobanurira abaturage ibyo abiyamamariza kuba abadepite babujijwe, kugira ngo hatagira amakosa bazakoresha abaturage mu gihe bari mu bikorwa byo kwiyamamaza.”

Ibibujijwe mu gihe abiyamamariza kuba Depite biyamamaza

Komisiyo y’igihugu y’amatora yagaragaje ibibujijwe mu gihe abashaka buba abadepite biyamamaza. Harimo gutuka cyangwa gusebya mu buryo ubwo aribwo bwose undi mukandida,kudakoresha umutungo wa leta aho waba uri hose mu buryo bunyuranyije n’amategeko, gukoresha ruswa, kumanika amafoto cyangwa inyandiko no gukorera inama zo kwiyamamaza ahatarabigenewe, kwiyamamaza mu gihe kitagenwe n’amategeko n’amabwiriza agenga amatora. Gushingira ku bwoko, ku isano muzi ku Karere,ku idini, no ku bundi buryo bwose bushingiye ku ivangura n’amacakubiri. Icyahunga banya amahoro, ubumwe n’umutekano rusange by’abanyarwanda. Guhamagarira abatora kwiba amajwi, cyangwa gukora ikindi gikorwa icyo aricyo cyose n’imyifatire yose byatuma amatora atagenda neza.

Kwiyamamariza ahantu hatamenyeshejwe ubuyobozi nk’uko biteganywa n’amategeko. Mu biganiro mpaka no mu nama z’abaturage, abakandida n’ababahagarariye bagomba kwirinda gukoresha imvugo, amashusho n’ibimenyetso ibyo aribyo byose byateza imvururu cyangwa amacakubiri mu baturage.

Tarikiya 2, 3 n’ iya 4 Nzeri 2018 nibwo hateganijwe amatora y’ abadepite. Umutwe w’abadepite ugizwe n’imyanya 80 harimo 53 ihatanirwa binyuze mu mashyaka, 24 yagenewe abagore, 2 y’urubyiruko ndetse 1 wagenewe abafite ubumuga.

Hategekimana Innocent


Tanga igitecyerezo

Who are you?