Yashyizweho kuri 14 June, 2018 | 08:09

Cyasa wamamaye mu bwicanyi arashinja Ngenzi

Mu rukiko rw’i Paris mu gihugu cy’Ubufaransa, urubanza rwa Ngenzi Octavien na Barahira Tito, bahoze bayobora komini ya Kabarondo rukomeje kumvwamo ubuhamya butandukanye burimo n’abagize uruhare muri jenoside yakorewe abatutsi. Kuri uyu munsi wa 23 w’iburanisha, Habimana Emmanuel bita CYASA, wazengurutse perefegitura ya Kibungo mu bikorwa bya jenoside, aragaruka ku ruhare rutaziguye rwa Ngenzi Octavien.

Yitwa Habimana Emmanuel, bita CYASA yitiriwe kubera izina ry’umukino njyarugamba yigishijwe n’Abakoreya. Yavukiye ahahoze hitwa komini Mugesera, perefegitura ya Kibungo, mu 1957. Mu 1994, yari akuriye umutwe w’interahamwe muri Kibungo yose. Ni muri urwo rwego, “ibyo mbabwira ni ibyo niyumviye, ni ibyo nahagazeho, ni ibyo niboneye kuri Ngenzi, ndavuga ibyo nzi…Urukiko ni rwo ruzafata umwanzuro”. Usibye inama zitandukanye zitegura jenoside yahuriyemo na Ngenzi, amuzi “asaba inkunga y’abasirikare” bo kujya kwica abatutsi kuri Kiliziya ya Kabarondo ku wa 13 no kuri IGA ku wa 16 mata 1994. Ubu buhamya yabutanze mu buryo bw’ikoranabuhanga ry’amashusho (Vidéoconférence).

Mu gusobanura ko adashinja abagize uruhare muri jenoside kubera inyungu, agira ati “simvuga ngo ngabanyirizwe igihano…nicuza kandi nababajwe cyane n’ibyo twakoreye abatutsi, ku buryo ntashobora guhishira abayigizemo uruhare bose”. Ntabikora rero “mu rwego rwo kwigura”nk’uko avoka wa Ngenzi abitekereza kubera ko “nakatiwe igifungo cya burundu”.

"Ntitwari tuzi ko hari igihe tuzabibazwa"

Kuva taliki ya 8 Mata, buri burugumesitiri yagiye mu kigo cya gisirikare cya Kibungo, Camp Huye, gufata za grenades n’imbunda zinyuranye zirimo izo mu bwoko bwa Kalachnikov. Na ngenzi yarabijyanye. Ese Kabarondo yahawe zingahe? Umutangabuhamya Cyasa ntiyibuka umubare wazo, gusa bazibahaga ahari, ariko “ari njye, ari na Ngenzi ntawari azi ko hari igihe tuzabibazwa”. Mu kugaragaza ko Ngenzi yari afite uburenganzira bwo gusaba izo mbunda, yemeza ko “byageze aho agaruka gufata n’izindi, ndetse n’abasirikare”, ku italiki ya 13 mata, umunsi w’iyicwa ry’abatutsi bari bahungiye mu kiliziya cya Kabarondo. Hari nyuma ya saa sita, umutangabuhamya arabyibuka. Ni bwo Ngenzi ngo yazaga mu kigo cya gisirikare, maze bamuha “abasirikare bagiye mu ikamyo ya gisirikare Benz 1513, n’imbunda nini n’into”. Ni byo Ngenzi yari yasabye? “Si jye wabitangaga”, yabisabye ba Koloneli Rwagafirita Petero Selesitini na Nkuriyekubona bayoboraga ikigo, kubera ko ngo ibitero bye byari byananiwe. Icyo gihe abasirikare bagarutse bavuga ko “babarangije”. Abishwe bari bangahe? Bavugaga ko ari benshi, naho iby’umubare, “ntibajyaga kubica ngo nibarangiza bajye no kubabara!”

Ese nyuma y’iki gihe, yaba yarongeye kubona Ngenzi? Kubera ko hari n’ikibazo cy’amashanyarazi, ba burugumesitiri “bazaga buri munsi muri Camp Huye gutanga raporo” mu magambo, kandi kuva taliki ya 6 we [CYASA] yari yahawe inshingano zo kuba ari muri Camp Huye. Yemera ko yagiye i Kabarondo ku wa 16 mata, na bwo Ngenzi yagarutse gusaba abasirikare bo kumufasha abantu bari bamunaniye. Kuri IGA hari abantu benshi…yabonye umuntu “bakururaga mu mugozi ngo ni icyitso”. Amusabira imbabazi. Ngenzi aramusubiza ati “inyenzi ni ko zicwa”. Ngenzi ajyana n’abasirikare bamwe inyuma ya IGA kureba abandi batutsi, barabazana, harimo abagore n’abagabo. “Ngenzi abashyira ku rukuta, ati mubarase…Barabarasa bose barapfa”.

Iyo abivuga, uruhare rwe arugira ruto

Inama yo ku wa 01 Mata

Bamwe bayitaga “Club Rwatoro”, bayitirira Rwatoro wayiyoboraga. Abandi bakayita “Club de Kibungo” cyangwa Ihuriro ry’iterambere rya Kibungo. Ku italiki ya 1 mata 1994, iri huriro ryateraniye ku Cyasemakamba mu nama yayobowe na Rwatoro,wari umucamanza mu rukiko rwa mbere rw’iremezo rwa Kibungo. Yahuriyemo ba Burugumesitiri bose ba Kibungo, abadepite, abacuruzi, abarimu, ba “assistants bourgmestres”, ba konseye bose, abakuriye interahamwe, amashyaka yose ya PAWA, MRND n’abanyamadini, kimwe n’abasirikare bari bambaye nk’abaturage basanzwe. Abitwa Col. P.Cel. Rwagafirita, Minisitiri Prosper Mugiraneza, Ferdinand Kabagema wayoboraga Caisse Hypothecaire, bavuze ko baza kuza nyuma.

“Ikibazo si icyo! Ikibazo ni intambara yatewe n’inyenzi!” Aya magambo, mu by’ukuri yagaragaye ko ari yo yateranije iyo nama, ngo yavuzwe na Mutabaruka Sylvain, umudepite wavukaga muri Sake. Hahise hafatwa icyemezo cyo gusohora abatutsi bose bari mu nama. Mutabaruka akomeza agira ati “abahutu baricwa…Ndadaye Merchior. Aho gutabara bamuhorera batabaye bamuhamba. Ba Gapyisi ni uko, ba Bucyana Maritini, na we ntiyahorerwa…Abo bose kandi baricwa n’abatutsi, ibyitso by’inkotanyi. Jye narabiteguye. Bagiye badafite imbunda, none barazigarukanye. Aho azaturuka hose, jye Mutabaruka nzamwivuna!”

Hari umuturage wahise agira ati “ko bafite imbunda twe tuzazikura he? ». Asubizwa ko bari hafi kuzibona. « Tuzakora iki nyuma y’ibyo utubwiye ? ». Umuhutu uzongera gupfa, bajye babanza bice abatutsi baturanye mbere yo kumuhamba. Ikindi abatutsi bahagararanye ari 2 cyangwa 3 bajye bakubitwa, haba mu nzira, mu isoko, mu kabari, aho ari ho hose.

Muri iyo nama, hatowe kandi inzego z’ubuyobozi bw’ihuriro, hatangwa imisanzu, hanashyirwaho inzego z’umutekano ku rwego rwa komini, segiteri kugeza kuri selire. Hatowe kandi abakuriye interahamwe batanzwe na ba burugumesitiri babo. Umutangabuhamya asobanura ko Bwana Mutabaruka ngo yasobanuye ko « hari umuyoboke wa MRND ushobora kwicwa kandi tukamuhorera ! »

Mbere yo kwiyakira, ngo hemejwe ko ibyavugiwe muri inama byose bishyigikirwa na ba burugumesitiri bose. Ese Ngenzi yari ahari ? « Yari ahari nyine ! ». Nk’imbarutso n’urugero ku byari bimaze kwemezwa, inama yarangiriye ku « gitero cyo guhungabanya umutekano muri ‘Economat’ », kiyobowe na CYASA ubwe na Tahimana Melchiade wari burugumesitiri wa Birenga n’umunyamabanga wa « Club de Kibungo ». Iki gikorwa ngo ni cyo cyatangije ku mugaragaro « ibikorwa byo guhungabanya umutekano w’abatutsi », kuva ubwo kugera jenoside itangira. Uruhare rwa Ngenzi ni uruhe ? « Ni we muyobozi wa gahunda muri komini ye ! » Ko nta na hamwe uvuga Barahira ? « Ndamuzi, ariko sinigeze mubona ! »

Sehene Ruvugiro


Inkuru ku rubanza mu bujurire rwa Tito Barahira na Octavien Ngenzi, PAX PRESS, Umuryango nyarwanda w’abanyamakuru baharanira amahoro urarukurikirana umunsi ku munsi, binyuze ku munyamakuru ukorana na PAX PRESS, SEHENE Ruvugiro Emmanuel, uri I Paris mu Bufaransa.


Tanga igitecyerezo

Who are you?