Yashyizweho kuri 27 March, 2018 | 07:08

Burera: Abaregera indishyi mu manza Nshinjabyaha bifuza gufashwa kubona Ubutabera

Abaturage baregera indishyi mu manza Nshinjabyaha bifuza kubifashwamo n’ubushinjacyaha bukurikirana uwakoze icyaha, kuko bamwe muri bo kwiregera bibagora bakananirwa batabonye ubutabera.

Hashize imyaka itanu, mu karere ka Burera, umurenge wa Rwerere, akagari ka Gacundura, Umukecuru witwa Mukandutiye Odette, akurikirana indishyi z’ibyo yatanze avuza umwana we wagonzwe na Moto akamara igihe kinini arwariye mu bitaro. Uyu mubyeyi ntaramenya aho aregera, ahubwo ajya kubaza kuri Polisi kuko ariho yabonye hari hafungiwe moto yamugongeye umwana.

Ingingo ya 139 y’Itegeko ryerekeye imiburanishirizwe y’Imanza nshinjabyaha, ivuga ko uwangirijwe n’icyaha wifuza kuregera indishyi ashobora guhitamo kuregera urukiko ruburanisha imanza z’inshinjabyaha cyangwa urukiko ruburanisha imanza z’imbonezamubano. Mu ngingo zikurikiraho bakagaragaza uburyo ashobora kubikora yisunze ikirego cy’ubushinjacyaha cyangwa atacyisunze.

Mukandutiye wagombaga gutanga ikirego cy’indishyi z’ibyo yatanze avuza umwana we, ntiyabonye umwanya wo gukurikirana Dosiye y’uwamugongeye umwana kuko yari amurwaje. Ati “uwangongeye umwana ngo yari afite moto idafite ibyangombwa. Polisi yaramufunze irongera iramufungura. Njya kubaza ukuriye polisi (DPC), akambwira ngo ningende bazansubiza. Njyewe numva bamfashije nkabona ibyo natakaje muvuza, nabareka”.

Umusaza witwa Ngirabanzi Matiyasi, wo mu murenge wa Rusarabuye, nawe yakorewe urugomo n’abantu banamwambura amafaranga ariko uretse kuba umwe muri bo yarafashwe agafungwa, amafaranga ye n’ibyo yatanze yivuza, ntabyo yashubijwe. Yabajije kuri polisi uko yabibona, asubizwa ko agomba kujya kurega mu rukiko.Aragira, ati “polisi yarabafashe umwe aracika, undi arafungwa ariko nawe yarafunguwe, arimo aragurisha imitungo ye ataranyishyura amafaranga yanjye. Rwose ndasaba leta kujya ihana abakoze ibyaha ariko ikanatwishyuriza”.
N’ubwo iyo ubuyobozi bubonye abaturage bafite ikibazo cyo kuregera indishyi, bumwohereza gushaka ubufasha ku nzu y’ubufasha mu mategeko (MAJ), Habumurenyi Evariste, Umuyobozi wungirije ushinzwe ubukungu n’Iterambere mu karere ka Burera, ahamya ko hari abaturage batamenya uko bakurikirana indishyi mu manza nshinjabyaha. Ati “Hariho n’abaturage babireka ntibirirwe barega kuko batazi ko nyuma y’imanza z’ubushinjacyaha basobora kuregera indishyi. Ubundi niba umuntuyangirijwe na mugenzi we mu cyaha penal, nanjye numva ikirego cyagombye kujyana n’icy’ubushinjacyaha, aho kugirango umuturaage yiregere”.

Umuvugizi w’Ubushinjacyaha, Nkusi Faustin, atangaza ko ubushinjacyaha butajya buregera indishyi, ahubwo ko inshingano za bwo ari ukugaragaza ko icyaha cyabaye, bukakiregera mu rukiko. Aragira, ati “Nk’ubushinjacyaha tubamenyesha ko umuntu twamuregeye urukiko. Ikiba gisigaye ni uko nawe afata iya mbere akajya kuregera indishyi”.

Nkusi akomeza avuga ko hari abaturage bagaragaza ubumenyi buke mu mategeko, akaba asaba ko Minisiteri y’ubutabera yashyira ingufu mu kuyabasobanurira. Bakabwirwa n’inzego bakwiyambaza mu gihe bakeneye ubufasha ku bijyanye n’amategeko.

Uwiringira Marie Josée


Tanga igitecyerezo

Who are you?