Yashyizweho kuri 25 October, 2018 | 18:03

BIGOGWE: Kugabirana inka bitumvikanyweho biteza amakimbirane mu muryango

Umurenge wa Bigogwe ubarizwa mu Karere ka Nyabihu, uri mu hantu harangwa ubworozi bukomeza no kwiyongera biturutse ku muco wo guhana inka. Gusa mu kiganiro n’itangazamakuru abagore basobanuye ko kugabirana inka ari igikorwa gitekerezwa akenshi n’abagabo bonyine, ikintu kitabashimisha n’ubwo byabaye nk’umuco bubaha.

Abenshi mu batuye mu bigogwe bafite umuco wo guharira abagore ibirebana n’imirimo yo mu rugo, naho icyitwa ikinjiza umutungo cyose harimo no gukurikirana ubworozi bw’amatungo bikiharirwa n’umugabo wenyine.

Ntirenganya Gaspard, umwe mu bagabo batuye mu Bigogwe ashimangira iby’uyu muco. Yagize ati “Umutungo w’urugo ugomba kumenywa n’umugabo, ni we uba yaravunitse kw’ikubitiro igihe cyo gushaka. Turubaka, tugasaba, tugakwa yemwe tukanahahira urugo, umugore rero aba akwiye kwita ku byo mu rugo nta kindi ambajije kuko mba nagennye ibihakenewe nk’inshingano yanjye.”

Abagore bo babifata nko guhezwa ku mutungo w’urugo, ahanini baba baranafatanyije n’abagabo kuwushaka nyamara ntibagire uruhare ku mikoresherezwe yawo. Mukakalisa Francine yabisobanuye agira ati “Usibye no kumenya iby’imitungo nta mugore uhangara kuba yagera mu bikuyu, umugabo aragenda akaba iyo akiharira iby’ubworozi byose ntitumenya inka yabyaye cyangwa iyatanzwe n’amata tuyanywa nk’abasaguriwe kandi ari ibyacu.”

Akomeza avuga ko n’imyumvire ibigiramo uruhare, kuko ngo abagore bo mu Bigogwe bakomeje kubakira ku myitwarire y’abakuru basanze. Ati “Twagakwiye kureba n’aho ibihe bigeze tukitinyuka, kuri ubu umugore n’umugabo twembi duhuriza hamwe dushaka ibiduteza imbere nta mpamvu rero yo guharira bamwe ibi abandi biriya kandi tubisangiye. Kuko n’ubuzima bw’abagize umuryango buhadindirira icyo gihe hajemo kwiharira, njye mbifata nk’ubusambo rwose ntibikwiye.”

Imirire mibi no kugwingira kw’abana

Umunyamabanga Nshingwabikorwa w’Umurenge wa Bigogwe, Gahutu Tebuka Jean Paul yavuze ko ari ikintu kihagaragara koko n’ingaruka zikaba nyinshi. Ati “Birababaje kuba tukigaragaza ibibazo by’imirire mibi mu bana, ubundi nta mwana wanyoye amata ushobora kugwingira cyangwa kurwara bwaki n’umuturage waba atoroye yakamirwa n’umuturanyi ariko ikibazo kigacika dore ko twihaza yaba mu bihingwa no mu bworozi.”

Yongeraho ko biterwa n’imibanire iba iri hagati y’abashakanye mu rugo rwabo, aho usanga abagore bagitinya kubaza uburenganzira bwabo ngo bagire uruhare ku mitungo. Bityo igihe hatumvikanwe ku mikoresherezwe yawo myiza, bya bindi byakazamuye imibereho myiza y’abagize umuryango bikiharirwa n’umwe ari nako ingaruka zigera ku basigaye.

Akarere ka Nyabihu uyu Murenge ubarizwamo kari mu duce tukirangwamo ikibazo cy’imirire mibi nk’uko bigaragazwa n’ubushakashatsi bwa Ministeri y’Ubuzima, 38% y’abana bahabarizwa bari munsi y’imyaka 5 bafite imirire mibi, bibashyira ku kigero cya 59% mu gihugu hose.Umulisa Angelique, ushinzwe umushinga wo kongerera abagore ubushobozi mu bijyanye n’imiyoborere mu Mpuzamiryango Pro-Femmes Twese Hamwe, yasabye abatuye Umurenge wa Bigogwe kuzamura imyumvire bakagira uburenganzira bumwe ku mitungo nk’abagize umuryango. Ati “Abagore bakwiye kumva ko bafite uruhare ku micungire y’umutungo w’urugo n’abagabo babo, bityo iterambere ryabo bakarigiramo uruhare bombi. Bizanafasha mu kubungabunga imikurire myiza y’abana, hifashishijwe ibyo umuryango utunze.” Yabibukije kandi ko ibi bihira ababana barashyingiranwe byemewe n’amategeko.

Imicungire y’umutungo w’abashyingiranywe, impano n’izungura bigengwa n’Itegeko No 180/03 ryo ku wa 26 Nyakanga, rinasobanura ivangamutungo rusange. Rikaba ryarasohotse mu Igazeti ya Leta ku wa 01 Kanama 2016, rigamije kubafasha gukurikirana uwo mutungo ku ruhare rungana no kuwuhagararira.

Umubyeyi Nadine Evelyne


Tanga igitecyerezo

Who are you?