Yashyizweho kuri 22 August, 2016 | 13:16

Bamwe mu bunzi baranengwa kwitwara nk’abacamanza

Akamaro k’abunzi ni ukunga abafitanye ibibazo n’amakimbirane. Minisiteri y’ubutabera n’ubwo ishima akazi k’aba bakorerabushake, ivuga ko abunzi bitwara nk’abacamanza. Mu myanzuro yabo hakagaragara amagambo nka dutegetse, ababuranyi, aratsinze,… mu gihe aya akoreshwa gusa n’abacamanza. Ibi ni imbogamizi ku mikorere yabo.

Afungura amahugurwa umuryango mpuzamahanga utari uwa leta RCN Justice &Democratie wageneye abunzi, Odette Yankurije ushinzwe kwegereza abaturage ubutabera muri Minisiteri y’ubutabera, yongeye kubasaba kutitwara nk’abacamanza. Ibi ngo biri mubyatumye uyu muryango uhitamo kubongerera ubumenyi.

Hugo Moudiki Jombwe, uhagarariye RCN mu Rwanda, kuri we ngo ikibazo kiri mu kuba abunzi badasobanukiwe n’amategeko abagenga. Agira ati “turabahugura ku mategeko abagenga, bayasobanukirwe. Turateganya kandi gukora agatabo gakubiyemo ayo mategeko yose ku buryo bazajya bakora inshingano zabo neza bagira aho bategwa bakareba muri ako gatabo.”

Ikindi gitera mikorere nk’iyi ngo ni uko abenshi babayeho nk’abakoranabushake ba Gacaca, ariko bakibagirwa ko icyo gihe babaga bameze nk’abacamanza, nk’uko bitangazwa na Odette. Uyu akomeza avuga ko abunzi bakemura amakimbirane, bakurikije ukuri bitabaye ngombwa ko bifashisha amategeko. Gusa ngo imyanzuro bafata ntigomba kuba inyuranyije n’amategeko.

Ubundi abunzi bakunze gukemura ibibazo birebana n’ubutaka, ibibazo byo mu ngo n’abashakanye ndetse no gukemura abafitanye ibibazo bitarengeje amafaranga y’u Rwanda Miliyoni 5. Cyakora ngo iyo umwe muri bo atabashije kunyurwa n’umwanzuro wafashwe, ashobora kugana inkiko.

Umusaza w’umwunzi w’imyaka 79 Nkunda Pontien, avuga ko we asobanukiwe n’itandukaniro ry’umucamanza n’umwunzi kuko bo go bafasha abantu gufata umwanzuro mu bwumvikane. Naho umucamanza we hazamo guhana bikurikije itageko. Gusa n’ubwo aka kabazo kariho, ngo abaturage 79% by’abakoreweho ubushakashatsi muri 2015 na Minisiteri y’ubutabera, bishimira imikorere yabo.

Minisiteri y’ubutabera igaragaza ko mu mwaka ushize, abunzi bakiriye ibibazo birenga gato 47,900 muri byo ibirenga ibihumbi 44 byakemuwe n’abunzi. Iyi mibare ngo uyibaze mu mafaranga aba baramutse bagiye mu nkiko byari gutwara amafaranga menshi. Mu nkiko basabwa amagarama y’urubanza, ayahabwa ababunganira, igihe n’ urugendo bakoresha bajya ku nkiko ngo byose byahombya umuturage.

Musonera Sosthѐne


Tanga igitecyerezo

Who are you?