Yashyizweho kuri 15 March, 2017 | 12:43

Amasezerano y’igihe gito ku bashakanye ntahurizwaho nk’akemura amakimbirane mu ngo

Bamwe mu Banyarwanda basanga amasezerano y’igihe gito hagati y’abashakanye aramutse yemewe mu Rwanda yakemura ikibazo cy’amakimbirane mu muryango. Abandi ariko bakabibona nk’uburyo bwazahaza umuryango Nyarwanda cyane cyane abana. Bamwe bati byagabanya amakimbiran atera ubwicanyi abandi bati ibyo ni ugukopera ibyo hanze.

Mu miryango imwe n’imwe humvikana umugore wishe umugabo cyangwa umugabo wishe umugore. Bnyuze mu kiganiro Biravugwa, U cyabaye ku wa Kabiri tariki ya 14 Werurwe, abantu batandukanye bagaragaje bimwe mu byakemura icyo kibazo.

Gusezerana by’igihe gito

Bamwe bavuga ko basanga gusezerana by’igihe gito byatuma abashakanye bubahana ku buryo nta kwicana kwakongera kugaragara hagati y’abashakanye. Umwe ati “Ndumva ari uburyo bwiza bwo kugarura amahoro mu ngo, muri iki gihe kabisa bisigaye bikomeye, ujya kumva ngo umugabo yishe umugore, umugore yishe umugabo, iyo kontara nk’Abanyarwanda yaba ari nziza.” Yakomeje avuga impamvu ashyigikiye ayo masezerano. Ati “Impamvu nshyigikiye ‘contract’, numva ari uburyo bwiza bwo kudufasha kumvikana mu rugo, amakimbirane akagabanuka. Ni ikibazo gikomeye ariko umugore wanjye ngomba kubanza nkamuha byibura nk’imyaka itanu, iyo myaka uba wamaze kumenya umugore wawe , nawe amaze kukumenya."

Undi nawe ngo ntashyigikiye ko abantu bakomeza gusezerana burundu, kuko abifata nko kwizirikanaho bidafite icyo bimaze. Ati “Kuvuga ngo burundu hari ubwo agusugura ugahita ukubita urushyi ubwo na we akagira umujinya akagukubita ikintu akaba arakwishe." Undi we yerekana ko ayo masezerano yatuma abantu babana bigengesereye bagamije kurangiza igihe bihaye bakaba babivamo cyangwa bagakomeza. Ati “Bibaye ari amasezerano bakabana bazi ko ari iyo myaka, bakabana azi ko azitonda, amuguyaguya yatangira kuzana ibintu by’ingeso kamere ukamureba ugasanga aho kugira ngo uzajye gufungwa, uzajyane abana bajye kurerwa na ba nyirarume [nabyo ari inzigo] kubera ko wishe mushiki wabo, numva ko ibyaba byiza, kontara ibayeho umwe yajya agenda abana n’undi yigengesereye.” Yungamo ati “Aho kugira ngo umugabo akubite intosho umugore we., umugore nawe ngo akubite akamamiro umugabo cyangwa ishoka, avuga ngo yamuranguye burundu".

Koroshya amategeko

Bamwe ariko abasanga ayo masezerano aramutse yemewe mu Rwanda yateza ibibazo birimo urwikekwe mu muryango ndetse no kuzahaza uburere bw’abana bayavukiyemo.Niyonambaza Assouman, umunyakamakuru ukunze gukurikirana iki kiganiro ari mu ba mbere babibona gutyo. Ati “Kontara, ubu se biracika kubera ko ihame ari ukubana akaramata. Uwashyiraho iy ‘umwaka babura kumarana? Nibwo byaba bibi kurushaho. Buri wese yabana n’undi bacunga iminsi, maze umbwire abo bana; urwo Rwanda rw’ejo ruzavuka mu bantu baraye umwe ari guca aha undi aca hano!” Uburyo bukwiye asanga bwakoreshwa ngo ni ukoroshya amategeko abantu bagatandukana mu buryo bworoshye mu gihe babishaka. Ati “Njyewe nahitamo guhindura amategeko mbonezamubano, akoroshywa, kandi byagiye byoroshywa kuko mbere gutandukana byari bigoye cyane. Byorohejwe hakaba no kubikangurira abaturage byatanga umusaruro.”

Undi muturage avuga ko gutekereza ibya kontara ari ikibazo gikomeye mu gihe ababyeyi ba kera babanaga akaramata batanabisezeranye. Ati "Kirya gihe washobora kujya gushaka uwo utazi kandi mukabana. Bakamuzana mukabana imyaka mirongo 70, icyo gihe nta muntu numvise avuga ngo tuzabana iyi myaka, bavugaga ubuziraherezo."

Undi we ashima ibijyanye n’ayo masezerano ariko ku rundi ruhande akayigaya. Ati “Kontara ndayishima ariko ndanayigaya, imyaka itatu nta rukundo, sinzi niba umwana mwabyara yabona uburere nyuma y’iyo myaka , ibintu byose bikozwe neza mu bwumvikane ntacyo bibangamiraho.”

N’abaturage baganiriye na Isango Star bafite ibitekerezo binyuranye kuri iyo ngingo.
Umwe ati “ Nta kiza kirimo. Ni ukubana n’urwikekwe muvuga ngo imyaka iyi n’iyi nishira muzatandukana, umwe akaba yanatangira gusahura, ariko muvuze ko ari akaramata yaba afite icyizere cy’ubuzima.”

Umunyamategeko, Me Emerthe Mukamana wo mu rugaga rw’abavoka mu Rwanda avuga ko nta tegeko nk’iryo ririho mu Rwanda ku buryo nta we ushobora ubyemererwa ariko ngo abarambagizanya bashobora kubikora mu gihe batarabana. Ati “Umukobwa n’umuhungu babikora bafiyasanya bakavuga bati reka tube turi kumwe twihe imyaka turebe uko bizagenda.”

Mukamana akomeza avuga ko umugore n’umugabo basezerana akaramata, kandi ko baba bagomba kubyubahiriza igihe cyose babyiyemeje, gusa ngo abananiranwe nabo bafite uburenganzira bwo gutandukana mu buryo bukurikije amategeko, ariko ngo ubusanzwe abantu bari bakwiye gutandukana ari uko bapfuye, ariko ntawishe undi.

Ntakirutimana Deus


Tanga igitecyerezo

Who are you?