Yashyizweho kuri 21 July, 2016 | 12:40

Abimurwa ntibishimira ko ubuyobozi bwivanga mu micungire y’ingurane

Abaturage bimurwa ahagomba kujya ibikorwa rusange, basanga abayobozi babavogera mu micungire y’ingurane baba bahawe. Bagena amafaranga batarenza kubikuza, babafatira mu kwishyura, no kubategeka inzu bagomba kujyamo. Ku ruhande rw’ubuyobozi, basanga bikorerwa kubungabunga umuryango nk’uko biri mu nshingano, bakumira amakimbirane kandi baharanira ko umuturage atera imbere.

Ubwijujute bw’abaturage b’umurenge wa Munini mu karere ka Nyaruguru, ni bumwe n’ubw’abimuwe I Karera mu murenge wa Rilima. Burasa kandi n’ubwo mu murenge wa Gahanga muri Kicukiro, n’ahandi. Bose bahuriza ku buryo batishimira ko abayobozi bivanga mu micungire y’ingurane baba bahawe aho bimuwe.

Umuturage wimuwe ahagiye kubakwa uruganda rw’icyayi mu murenge wa Munini, akarere ka Nyaruguru, avuga ko we na bagenzi be badashaka inzu akarere kabatsindira kujyamo, kagafatira amafaranga yabo. Mukamana Cecile avuga ko adashaka gutura mu nzu akarere kamwubakira, ngo kuko ari uburenganzira bwe gutura aho ashaka. Ati “ nta tegeko rikwiye kubaho ryo kujya mu nzu akarere kari kubaka, twakoranye inama nyinshi n’akarere ariko ntitwigeze tubyumvikanaho, ni bo babyitegekera ku ngufu. Ntibigeze baha agaciro ibitekerezo byacu.”

Kimwe na besnhi muri bagenzi be, Nkeshimana Fideli nawe avuga ko ngo harimo abasanzwe bafite amazu ahandi baturamo, harimo n’abashaka kwimukira mu mijyi nka Huye na Kigali, ariko ngo bose bategetswe kuzajya mu nzu zubakwa n’akarere. Ati “tujya kubikuza amafaranga ku Murenge SACCO bakatubwira ngo ni ukuzana ibaruwa ya Meya,ngo akarere kavuze ko kazaduha inzu nshya”.
Ibiba ku baturage ba Munini, ni nk’ibyabaye ku ba Gahanga muri Kicukiro, bahatirwa kwishyura imyenda y’ababyeyi babo yari yaribagiranye. Abanyakarera ahazubakwa ikibuga cya Bugesera nabo, ngo hari amafaranga akarere katemera ko babikuza, ngo keretse ugiye kwishyura isambu cyangwa inzu azaturamo.

Ubuyobozi butinya ko bayangiza

Intego ubuyobozi buba bufite bukora ibi, ngo ni ukubungabunga umutekano w’umuryango, birinda ko bamwe mu baturage bajya kwangiza ayo mafaranga. Ngo hari abayajyana mu nzoga, abayashakamo abandi bagore, yemwe n’abashobora kuyibwa. Uwari umuyobozi w’akarere ka Bugesera, Rwagaju Louis, aganira na PAXPRESS mu 2014, nawe agaragaza impungenge z’uko ababikuza menshi bashobora guhura n’amabandi akayabambura.

Umuyobozi w’akarere ka Nyaruguru, Habitegeko Francois, avuga ko birinze ko abaturage bayasesagura, nyuma bakazajya ku buyobozi bataka ko ntaho kuba bafite. Mu kiganiro n’Izuba Rirashe, Habitegeko agira ati “….urayamuhereza, niba atanywaga byeri akayiraramo, abandi bagakwepa abagore babo bagashaka aba kabiri. Ibi rero bizana amakimbirane n’ubukene mu muryango ku buryo tutateganyije.”

Ingingo za 35, 38 na 39 z’itegeko rigenga iyimurwa ku nyungu rusange igena uburyo indishyi zitangwa. Zishobora kuba amafaranga cyangwa ikindi cyumvikanweho n’impande zombi. Amafaranga ashyirwa kuri Konti y’uwimurwa muri Banki yihitiyemo. Nyamara abaturage baganiriye na PAXPRESS bavuga ko bahatirwa gufunguza Konti aho ubuyobozi bubategetse, bagakeka ko buba bugamije kuzigiraho uburenganzira no guhoza ijisho mu micungire yazo. Ubuyobozi bwo buvuga ko bikorwa mu rwego rwo korohereza uwishyura, atagombye kuzenguruka amabanki menshi.

Mu iyishyurwa ry’indishyi itari amafaranga, ingingo ya 39 ivuga ko icyumvikanweho gikorerwa inyandiko, igashyirwaho umukono w’uwimura n’uw’uwimurwa.

Karegeya Jean Baptiste


Tanga igitecyerezo

Who are you?