Yashyizweho kuri 6 May, 2019 | 08:55

Abagabo ntibariyumva mu mugoroba w’ababyeyi

Nyuma y’aho icyahoze cyitwa “Akagoroba k’abagore” gihinduriye inyito n’imikorere kuva muri 2013 kikitwa “umugoroba w’ababyeyi” bityo hakajya hahuriramo ababyeyi b’abagabo n’abagore, henshi abagabo ntibaragira ubwitabire buhagije nk’ubw’abagore mu guhuriramo ngo baganire.

Ubwo watangiraga, wari ufite intego yo gufasha abagore gukemura ibibazo bahura nabyo. Nyuma waje kongererwa inshingano uba urubuga ababyeyi b’abagore n’abagabo bahuriramo kugira ngo bungurane ibitekerezo ku ngamba zafatwa n’abagize umuryango kugira ngo barusheho kunoza imibanire yabo, bakumira kandi bakemura amakimbirane ashobora kuvuka mu ngo, mu baturanyi cyangwa se ahandi aho ariho hose. Kuva wakwongererwa inshingano, abagabo n’abagore basabwa kuwitabira bose ndetse byaba ngombwa hakaba hanatumirwamo abasore n’inkumi. Cyakora mu midugudu imwe usanga abagabo badaha agaciro urwo rubuga cyangwa se batariyumva ko nabo ari inshingano zabo kujya muri izo nama.

Umugabo utuye mu kagari ka Mumena utarashatse gutangazwa amazina, avuga ko bigoye kujya kwicara mu mugoroba w’ababyeyi uri umugabo. Ati “Ahenshi usanga bavuga ibintu bireba abagore cyane, ubundi ugasanga iyo bazanye ikibazo cy’imibanire mu muryango bisa nk’ibibyaye amatiku”. Kubwe asanga umugoroba w’ababyeyi wakagombye kwitabirwa n’abagore bakagirana inama ku bibazo bibareba nk’abagore mu muryango, ndetse ukajya unitabirwa n’abakobwa kugira ngo bagirwe inama ku myitwarire itari myiza igaragara mu rubyiruko rw’abakobwa muri iki gihe.

Undi mugabo wo mu karere ka Nyaruguru mu murenge wa Nyagisozi, we asanga ibibazo bikomeye biba byakemuriwe mu nama ziba nyuma y’umuganda, bityo umugoroba w’ababyeyi uba udakwiye kuzanwamo abagabo. Ati “Ubu nzagira ikibazo n’umugore wanjye ni bucya ajye kundega mu mugoroba w’ababyeyi nanjye nicaye aho, ubwo ni ugukemura ikibazo cyangwa azaba agiye kuntaranga muri rubanda”?
Ndahayo Jean Baptiste uyobora Akagari ka Kimisagara mu Murenge wa Kimisagara, avuga ko Akagari ke kari mu tugari twa mbere umugoroba w’ababyeyi witabirwa kandi wagize akamaro kanini. Cyakora akavuga ko abagabo bawitabira bakiri bake. Ndahayo ati “Kimisagara ni agace karimo ubucucike bw’abantu, birumvikana ko hatabura ubusinzi n’uburaya. Ariko umugoroba w’ababyeyi urafasha cyane mu kurwanya ubusinzi, uburaya ndetse n’ikijyanye n’imibanire mu muryango”. Avuga ko inama bakuramo zinafasha mu gusubiza abana mu ishuri, ariko akanenga ko abagabo bawitabira ari bake. Ati “Nkeka ko biterwa n’uko watangiye bawita uw’abagore, nyuma abagabo bagakomeza kubifata muri uwo mujyo”.

Kimwe na Ndahayo, Umunyamabanga nshingwabikorwa w’Umurenge wa Rutare mu Karere ka Gicumbi, Mukandahiro Hydayat, nawe avuga ko ubwitabire bw’abagabo bukiri hasi, ati “Abagore barawitabira cyane, ariko mbona abagabo batarawugira uwabo. Ubukangurambaga burakorwa ariko haracyari urugendo”. Mukandahiro avuga ko n’ubwo witabirwa n’abagore ahanini, ugira urahare runini mu gukemura amakimbirane mu miryango no gusubiza abana mu ishuri. Ati “Abagore bafite ibibazo mu ngo zabo, iyo baganirijwe na bagenzi babo bababwira uburyo bakwitwara ku bagabo babo, uko abandi bakemuye ibibazo nk’ibyo, bigatuma umugore atangira gusa nk’uworoha cyangwa agenza buhoro amakimbirane akagenda agabanuka”.

Inyandiko y’Inama y’Igihugu y’Abagore igena imikorere n’imiyoborere y’umugoroba w’ababyeyi, ivuga ko umugoroba w’ababyeyi uterana nibura rimwe mu kwezi n’igihe cyose bibaye ngombwa, ingingo ziganirwaho zikemezwa n’Ababyeyi. Cyakora bakibanda ku ihohoterwa rishingiye ku gitsina cyane cyane irikorerwa mu ngo, kurwanya imirire mibi hakoreshejwe akarima k’igikoni n’imbuto ziribwa, isuku no gukorana n’ibigo by’imari. Nyamara kuba iterana nta gahunda y’icyigwa izwi, ngo biri no mubituma utitabirwa, kuko ngo utakwitabira inama utazi ibiri buvugirwemo.

Manzi Gérard


Tanga igitecyerezo

Who are you?