Yashyizweho kuri 3 August, 2017 | 09:31

Abafite ubumuga bwo kutabona bashyiriweho uburyo bwihariye bwo gutora

Bamwe mu bafite ubumuga bwo kutabona, bavuga ko bishimiye ko ubu noneho bashyiriweho uburyo bwo kuzitorera umukuru w’igihugu, bakoresheje inyandiko yabo izwi ku izina rya braille.Ubusanzwe abafite ubumuga bwo kutabona, bakaba bajyaga gutora bitwaje umuntu wo kubatorera.

Byasabaga kwitwaza umuntu wizeye ku muntu ufite ubumuga bwo kutabona kugira ngo amutorere. Nyuma yo kuvugwaho n’itangazalakuru cyane ndetse n’imiryango iharanaira uburenganzira bwa bene abo bafite ubwo bumuga, komisiyo y’amatora yahinduye ubwo buryo. Ubu bazaoresha uburyo bw’inyandiko bwitwa braille ku bazi kubukoresha.

Biziyaremye Claver umwe mu bafite ubu bumuga, avuga ko nubwo bwose we atazi gukoresha iyi nyandiko ,ngo azanayikoreshe mu matora, yishimira ko nibura hatewe intambwe yo kubatekerezaho, bityo ababisobanukiwe bakitorera neza uwo bashaka, nta muntu uje kubibakorera. Agira ati"ntabwo nsobanukiwe gukoresha iriya nyandiko,ariko nishimiye cyane ko nibura bagenzi banjye bayize, bo bazabasha kuyikoresha, bityo bakitorera uwo bifuza,nta muntu numwe umenye uwo yatoye, dore ko no gutora ari ibanga. Ariko burya iyo witwaje umuntu akagutorera ,ntibiba bikiri ibanga, kuko nubwo uba umwizeye ariko si kimwe no kwitorera."

Biziyaremye avuga ko yifuza ko n’abandi badasobanukiwe iyi nyandiko bazayigishwa, maze nabo ubutaha bakajya bayikoresha nta nkomyi.

Kuri izi mpungenge za Biziyaremye umuyobozi w’umuryango wabafite ubumuga bwo kutabona mu Rwanda, Donatille Kanimba, avuga ko ko gukoresha izi nyandiko bitazagombera kuba uzi gukoresha Braille. Ati« Urupapuro ruzakoreshwa ni urupapuro rufite utuntu tumeze nk’udusanduku, ku buryo tuzaba dufite udusanduku dutatu, tungana n’uko umubare w’abakandida ungana, icyo gihe ugiye gutora azaba yasobanuriwe uburyo abo bakandida bakurikirana ku rupapuro, nawe akoreho yumve uwo ashaka aho aherereye, atere igikumwe imbere ye.»

Ku ruhande rwa komisiyo y’igihugu y’amatora ,Moïse Bukasa umukozi w’iyi komisiyo, avuga ko ubu ibikoresho bazakoresha byateguwe, ndetse n’uzakenera ubufasha azabubona kuko hari abakorerabushake ba komisiyo babihuguriwe. Ku batazi gukoresha iyi nyandiko , komisiyo y’amatora ivuga ko bazakoresha uburyo basanzwe bakoresha iyo batora, harimo kuba bakwitwaza umwana,bizeye akamutorera.

Mu Rwanda ubu habarurirwa abafite ubumuga bwo kutabona,2500 nk’uko bitangazwa n’umuryango wabafite ubumuga bwo kutabona mu Rwandauyu muryango. Gusa nta mubare runaka w’abazatora uzwi.

Uwambayinema M.Jeanne


Tanga igitecyerezo

Who are you?