Yashyizweho kuri 19 July, 2016 | 11:01

U Rwanda na Gabon byakuyeho amafaranga acibwa abahamagaye muri ibyo bihugu

Nyuma y’ibihugu byo mu muhora wa Ruguru, U Rwanda na Gabon byakuyeho amafaranga acibwa abahamagaranye muri ibyo bihugu. Ni mu rwego rwo korohereza abakoresha imirongo yo guhamagara ndetse no gutanga andi mahirwe ku baturukamuri ibyo bihugu byombi.

Ahagana ku musozo w’inama ya Afurika yunze ubumwe, Perezida Paul Kagame na Ali Bongo wa Gabon mu izina ry’ibihugu byabo bombi, bakuyeho amafaranga yacibwaga umuntu ukoresheje umurongo wa Telefone mu guhamagara mu gihugu kitari icye. Iki ngo ni ikimenyetso ko isoko rimwe mu bijyanye n’ikoranabuhanga mu itumanaho rishoboka, asaba n’íbindi bihugu gutangira koroshya uburyo bwo guhamagarana muri Africa nk’uko bikubiye mu ntego za ‘Smart Africa’. Ati “…Niba twubaka ubumwe n’imiryango y’akarere, koko umuntu yava mu gihugu kimwe agiye mu kindi cy’abaturanyi akishyura amafaranga y’umugereka kugira ngo ahamagare?”

Korohereza abatuye akarere

Kagame yavuze ko Abanyafurika cyangwa abantu batuye mu karere kamwe bari bakwiye kuba boroherezwa guhamagara, kandi abaturage bakabasha kuvuga bibahendukiye. Ati “Intego yacu nk’abayobozi ni ugutekereza byisumbuye uko Internet yarushaho gutanga amahirwe mashya kuri buri wese ku mugabane wacu.” Perezida Kagame yavuze ko Africa ibashije guhuza imirongo migari y’ikoranabuhanga mu itumanaho, yaba ari intambwe ikomeye y’ubumwe yifuza kandi ifitiye akamaro gafatika Abanyafurika.

Yahamagariye ibihugu byose bya Afurika kwitabira ihuriro mu by’ikoranabuhanga “Smart Africa Alliance” bikaba abanyamuryango.

Ubwo yavugaga ku kamaro k’ikoranabuhanga mu iterambere mu nama ya banki Nyafurika itsura amajyambere mu kwezi kwa Gicurasi, i Lusaka muri Zambia, Minisitiri w’urubyiruko n’ikoranabuhanga Jean Philibert Nsengimana yasabye ko ibihugu by’Africa byose byahuza ibiciro by’itumanaho. Jean Philibert Nsengimana yemezaga ko guhuza ibiciro by’itumanaho byongera ubuhahirane hagati y’ibihugu byo ku mugabane w’Africa. Yatanze urugero ku nyungu ibihugu byo mu muhora wa ruguru byo muri Africa y’iburasirazuba byakuye mu guhuza ibiciro by’itumanaho.

Bwana Nsengimana yatangaje ko nyuma y’ukwezi gusa, Kenya, Uganda n’u Rwanda byemeje guhuza ibiciro by’itumanaho, abacuruzi bambukiranya imipaka muri ibyo bihugu bikubye hafi inshuro eshanu. Ministiri Nsengimana, ati “ mu gihe cy’ikoranabuhanga nta mpamvu n’imwe ko buri gihugu cyagira ibiciro byacyo by’itumanaho cyane ko usanga mu bihugu bitandukanye ari ibigo by’itumanaho bimwe bihakorera”. Ati “ikoranabuhanga rirafasha mu guhanga imirimo mishya no gukiza ubuzima bwinshi".

Niyonagize Fulgence


Tanga igitecyerezo

Who are you?