Yashyizweho kuri 2 May, 2018 | 11:32

Rwaza: Bamwe mu bagore bahohoterwa kubera ingano y’agaciro k’ibyo bazanye mu rugo

Abaturage bo mu murenge wa Rwaza mu karere ka Musanze batangaza ko mu ngo zimwe na zimwe, hari aho umugore ahabwa agaciro bitewe n’ibyo yazanye. Ibi bigafatwa n’ihohoterwa kuko iyo amaze kugera mu rugo nawe amaboko ye n’ibitekerezo bye hari ibindi byungura umuryango.

Nshimiyabagabo Charles, umugabo wa Nyirakabanza na we yemeza ko ari byo ko aganira n’umugore ku mikoreshereze y’umutungo w’urugo, bagakora ibyumvikanyweho kandi ko nta makimbirane bijya bibateza. Uyu mugabo avuga ko mbere yajyaga ahohotera umugore ku mutungo, akumva ko agomba kuwugiraho uruhare kurusha umugore. Ati “Ndi umubaji ariko ifaranga nakoreraga umugore ntiyashoboraga kurimenya, nayabikaga kure aho atamenya andi nkayashyira ku mufuka ubundi nkayajyana mu gacupa nkayanywera.”

Muri ibyo bihe yarahombaga kuko amafaranga yose yayamariraga mu nzoga agataha mu rugo nta kintu afite, yagira icyo abazwa akaba ari bwo atekereza ko yapfushije ubusa mugihe igihe yabaga ayanywera yavugaga ko ari we uyashaka , kandi uwo yazanye nk’umugore nta kintu azanye atagomba kumucunga mu byo akora bimwinjiriza.

"Ijambo rya nyuma ni iry’umugabo"

Nubwo bamwe mu bagore n’abagabo bavuga ko ubu bageze ku rwego rwo kudafatawa nk’abataragize icyo bazana bakaba bumvikana ku byemezo by’umutungo n’abagabo, Mukarubibi Eugenie anenga bamwe mu bagabo bavuga ko ijambo rya nyuma ku mutungo w’urugo ari iry’umugabo. Ngo umugabo yitwaza ko ari we wawushatse. Kuri we n’umugore ntagomba kubura ijambo ku mutungo cyane iyo basezeranye ivangamutungo. Mukeshimana Sylvie we ati “Umugabo agurisha itungo mu rugo wamubaza amafaranga yarigurishije akagusubiza ko bitakureba.”

Aha kandi Mukeshimana atunga agatoki ababyeyi badafata kimwe umwana w’umukobwa n’umuhungu ku mutungo, kuko umukobwa ajya gushinga urugo bakamuha ibishyingiranwa gusa ntibamuhe umutungo ajya kuvanga n’umugabo, bikaba byateza ikibazo kuko iyo ageze mu rugo agaciro ke kagererwa ku byo yazanye.

Umunyamabanga nshingwabikorwa w’Umurenge wa Rwaza, Ruberwa Roger, avuga ko imyumvire y’abashakanye ku bijyanye n’uburenganzira ku mutungo igenda iganisha aheza kuko ya myumvire y’abakuze yatumaga abagore bahezwa ku mutungo bigendeye ku byo bazanye mu rugo, yagabanutse.

Yagarutse ku itegeko ry’umuryango ryo ku wa 28/08/2016 mu ngingo yaryo ya 209, ivuga ko umugore n’umugabo basangiye ubuyobozi bw’urugo kandi ko basangiye umutungo. Ati“ Kuri ubu umugore n’umugabo barabyuka bakajyana guhinga, bagafatanya imirimo, ugasanga bakorera hamwe kandi bigafasha urugo gutera imbere.” Avuga ko amakimbirane mu Murenge wa Rwaza yagabanutse kuko mu ibarura ryakozwe muri uyu murenge ryagaragaje ko ingo 15 ari zo zirimo amakimbirane ashingiye ku mutungo mu zigera kuri 5214. Ati “Iyo dusezeranya abagiye kurushinga twibutsa abashakanye ko umugabo atakiri umutware w’urugo ko ahubwo ubuyobozi bw’urugo bufitwe n’umugore ndetse n’umugabo.” Avuga ko kuri ubu umugore ajya iwabo agahabwa umutungo n’umugabo bikagenda bityo, bagahuriza hamwe bakawucunga bafatanyije.

Kwigishwa bikiza imiryango

Bene aya makimbirane yagabanijwe n’imishinga RWAMREC na Rwanda Women’s Network mu mushinga Indashyikirwa uterwa inkunga na CARE International. Abahuguwe n’iyi miryango, bafasha indi miryango irangwamo ibibazo bayiganiriza bagashaka hamwe ibisubizo bitaragera mu buyobozi ibyo umunyamabanga nshingwabikorwa w’umurenge wa Rwaza akabibonamo intambwe y’ubufatanye bwiza hagati y’imiryango itari iya Leta na Leta bugamije gutuma imiryango ibaho ibanya neza mu mutuzo.

Ikindi kandi binyuze mu buryo bw’amatsinda, bigishwa uburyo bwo gucunga umutungo, kurwanya ihohoterwa ku buryo abayanyuzemo nka Havumiragira Jean Felix wo mu murenge wa Rwaza yitangaho urugero avuga uko yagurishaga umutungo uko ashaka bahinduka. Ati” nafataga ingurube nkagurisha ntamubajije yakopfora ngakubita.” Ariko ngo “ igihe RWAMREC imuhuguriye byatumye afunguka, abona ko yamuhohoteraga amusaba imbabazi none ubu ni umugabo wubaha umugore kandi ufatanya nawe ngo urugo rujye mbere nta kwikanyiza.”
Ngaboyisonga Jean Claude, Umukozi wa MAJ mu Karere ka Musanze avuga ko ibibazo by’amakimbirane ku mutungo, iyo binaniranye hagati y’abashakanye, icyemezo cya nyuma ntigifatwa n’umugabo, ahubwo itegeko riteganya ko iyo abashyingiranywe bananiwe kumvikana ikemezo gifatwa n’ubuyobozi bubifitiye ububasha.

Umukozi wa MAJ agaruka ku burenganzira mu micungire y’umutungo w’abashyingiranywe, bushingira ku buryo bw’imicungire y’umutungo bahisemo. Ati “Abahisemo ubwo buryo bw’imicungire y’umutungo bw’ivangamutungo rusange bacungira hamwe umutungo wabo kandi bakagira ububasha bungana bwo kuwucunga no kuwuhagararira, ikemezo gifatwa kuri uwo mutungo kigomba kuva ku bwumvikane bwa bombi. Iyo bananiwe kumvikana, ikemezo gifatwa n’ubuyobozi bubifitiye ububasha.”

Umuhoza Nadine


Tanga igitecyerezo

Who are you?