Yashyizweho kuri 27 September, 2019 | 07:25

Rusizi: Bifuza gusubirishamo urubanza rwa Bagambiki

Inkuru y’igifungo cya burundu Urukiko rw’ubujurire rwo muri Suwedi rwahanishije umunyarwanda Teodori Rukeratabaro, mu mpera za Mata 2019, ikomeje gutuma abahohotewe muri jenoside yakorewe abatutsi mu 1994, b’i Rusizi, basaba ko urubanza rwa Perefe Bagambiki wagizwe umwere n’Urukiko mpanabyaha mpuzamahanga rwashyiriweho u Rwanda (TPIR) rwasubirishwamo. Yaba umwere ate ari we wayoboye ibitero byose akuriye ba Rukeratabaro?

Kuba Rukeratabaro Teodori yaraburanishijwe, agahamwa n’icyaha cya jenoside n’ibindi byaha byibasiye inyokomuntu, kuba urukiko rwaramuhanishije igihano cy’igifungo cya burundu, ni byo koko ”twahawe ubutabera rwose! Ariko, kuba uwari umuyoboye ari we perefe Bagambiki Manweli yaragizwe umwere, nta butabera twahawe, nta butabera nkuboneye aho…Keretse urubanza rwe rusubirishijwemo!”
Bwana Lawurenti Ndagijimana, Perezida wa IBUKA, ihuriro ry’imiryango y’abacitse ku icumu rya jenoside yakorewe abatutsi mu 1994, na we wacitse ku icumu, ayo magambo ye ntaho ataniye n’aya bagenzi be bo mu murenge wa Nyakarenzo.

Kuri bo, nyuma y’imyaka 15 agizwe umwere akanahita arekurwa n’Urukiko rwa TPIR, ngo baringa ya Bagambiki ayoboye ibitero na n’ubu iracyogoga imirenge ya Rusizi, nka Mururu, Gashonga na Nyakarenzo. Ariko cyane cyane imitima yabo. Ubuyobozi bwa Ibuka muri uwo murenge wa Nyakarenzo, urimo Kiliziya ya Mibirizi n’urwibutso rw’imbaga yahatikiriye, asanga ari ”igikomere gihoraho ku bacitse ku icumu b’i Rusizi…Kudaha agaciro n’agasuzuguro ku batutsi bose biciwe mu bitero Bagambiki we ubwe yari ayoboye”.

Ubutabera nyakuri, ni Bagambiki?

Umwe mu barokokeye ku Kiliziya cya Mibilizi asobanura ko kumva izina Bagambiki ubwabyo bimusubiza inyuma. Ngo ahita amubona cyane cyane mu gitero cyo kuri 18 Mata cyarimbuye imbaga yari yahungiye kuri iyo Kiliziya. Agira ati ”uretse ko n’igitero cye hano cyaje gishaka data, mbere yo kubazwa ba Rukeratabaro n’abandi, abiciwe hano bose bari ku gahanga ka Bagambiki nk’uwari umugaba mukuru w’igitero”. Kuri we ngo nubwo bishimishije kuba ”Rukeratabaro yarahanishijwe igifungo cya Burundu ari umwambari, shebuja Bagambiki yari akwiye iki?”

Kimwe n’abahohotewe bo mu mirenge ya Mururu, Gashonga, basobanura ibyabereye kuri Stade Kamarampaka,ku kiliziya ya Cyangugu, mu Gatandara n’ahandi, abarokotse bo mu murenge wa Nyakarenzo cyane cyane kuri Kiliziya ya Mibilizi, bemeza ko iyo Bagambiki atagera aha hose, jenoside iba itaragize ubukana yakoranywe.

Kuri 18 Mata, umwe mu bacitse ku icumu b’i Nyakarenzo yibuka ko Bagambiki yaje akiyoboye. Asaba ko impunzi zitanga abantu bari bazwi nk’abarimu, abaganga, abacuruzi n’abandi bakomeye. “Abonye twanze, ni bwo yatanze yatanze amabwiriza yo kuturimbura twese…Iyo atahaba, ubu benshi ntibajyaga kuba ari imfubyi, abapfakazi..abandi twarapfuye duhagaze, abandi ari nk’igiti kidafite amashami”
Ese gusubirishamo birashoboka?

Ku kibazo cyo gusubirishamo izo manza, Bwana Ntampuhwe Juvens, umuhuzabikorwa w’umushinga Ubutabera no kubungabunga amateka, uhuriweho n’imiryango RCN-Justice et Démocratie, Haguruka, AMI, Kanyarwanda na Pax Press, avuga kogusubirishamo urubanza “bisaba kugira ibimenyetso bishya bitatanzwe mbere mu rukiko, ibyo bikabisaba gushaka no gusesengura dosiye z’izo”. Akimana Joseph, prezida wa Ibuka mu murenge wa Nyakarenzo, asanga ibi bigomba ubufasha bw’inzego zinyuranye, zirimo “inzego za Leta, imiryango itari iya Leta irimo iy’abacitse ku icumu rya jenoside, itangazamakuru…Ni bo bazi amategeko n’inzira zose z’ubuvugizi”

Amategegeko agenga urukiko MICT, urwego rwasimbuye Inkiko mpanabyaha zashyiriweho u Rwanda na Yougoslavia (TPIR na TPIY) ateganya isubirishamo ry’imanza. Ateganya ko Urukiko rushobora, ku mpamvu zisobanutse, gusubirishamo imanza n’ibyemezo byafashwe n’urukiko rwa TPIR…Igihe cyose habonetse ingingo cyangwa icyaha gishya kitamenyekanye mu rwego rwa mbere cyangwa mu bujurire, kandi urukiko rukemeza ko iyo icyo cyaha cyangwa iyo ngingo biza kuba byaramenyekanye, byajyaga guhindura icyemezo cy’urukiko, icyo gihe urubanza rushobora gusubirishwamo.

Nyuma yo kugirwa umwere n’urukiko rwa TPIR muri 2006, Bwana Bagambiki ubu ari mu gihugu cy’UBUBILIGI aho yasanze umuryango kuva Nyakanga 2007. Urukiko rwari rwemeje ko “Bagambiki nta cyaha kimuhama kubera ko nta bimenyetso bifatika”. Mu 1998, urugereko rwihariye rw’urukiko rwa Rusizi rwari rwamukatiye adahari igifungo cya burundu, kubera ibyaha byo “gusambanya no gushishikariza gusambanya ku ngufu” abatutsikazi mu gihe cya jenoside. Iki cyaha Bagambiki ntiyigeze akiburanishwa mu rukiko rwa TPIR.

Sehene Ruvugiro Emmanuel


Tanga igitecyerezo

Who are you?