Yashyizweho kuri 1 June, 2016 | 17:13

Ruhango: Abagore baracyitinya mu kwaka inguzanyo

Inyubako ya koperative yo kuzigama no kuguriza ya sacco Baturebereho , yubatswe mu mujyi wa Ruhango,iyi nyubako nk’uko bitangazwa ,n’inama y’ubutegetsi ya Sacco ngo yubatswe mu mafaranga y’inguzanyo asaga miliyoni 80 bamwe mu banyamuryango bafashe,muri yo miliyoni 18 zahawe abagore, mu gihe abagabo bo bafashe miliyoni zisaga 40. Izindi zihabwa amatsinda yihariye.

Ndagijimana Léonard, Perezida w’inama y’Ubutegetsi ya Sacco Bandebereho, agaruka cyane cyane ku nguzanyo abanyamuryango bahawe ndetse n’imibare y’abagabo n’abagore bayisabye bakayihabwa, akavuga ko umubare munini w’abagabo ari wo wabashije kwaka inguzanyo, ugereranyije n’uw’abagore.

Ndagijimana avuga ko muri miliyoni 80 zisaga, abagabo bonyine bahawe izirenga 40, mu gihe abagore bo bahawe 18 zirenga, gusa akavuga ko uyu mubare w’abagore basaba inguzanyo, utangiye kwiyongera ugereranyije no mu minsi yashize, kuko ngo wasangaga uri hasi cyane bitewe no kwitinya, ariko ko bagiye bakorana ibiganiro n’abagore babitsa muri iyi Sacco bituma babasha kwitinyuka,bityo babasha kwaka inguzanyo ya miliyoni 18.Yagize ati"Iyi nyubako yavuye ku migabane abanyamuryango batanze, harimo n’inyungu y’inguzanyo twahaye abagore n’abagabo,gusa ariko ntitwabura kuvuga ko umubare w’abagabo bafata inguzanyo uruta uw’abagore baza kwaka inguzanyo."

Buri wese yemerewe inguzanyo

Mukamurenzi Alphonsine umwe mu bagore bo mu karere ka Ruhango,avuga ko kuba umubare w’abagore bagana amabanki ukiri muto,abona biterwa n’uko abagore bamwe bakitinya,bakagira isoni ndetse n’ubwoba bwo kwaka inguzanyo batinya ko bashobora guhomba ,bityo n’utwo bari bafite bakaduteza cyamunara,indi mpamvu ngo n’uko usanga hari abandi bagore bagihanze amaso ku bagabo babo,bityo bakumva ko kwihangira imirimo kuri bo ntacyo bimaze,aba bakaba bagifite imyumvire yo kumva ko abagabo aribo bakwiye gukorera ingo gusa,bityo ntibagire umuhati wo kugana ibigo by’imari ngo bake inguzanyo bashobore nabo kwiteza imbere.

Ibi byemezwa kandi na Mukomeza Jeredy, Umunyamuryango wa Sacco Bandebereho, uvuga ko usibye umubare muto w’abagore bitinya ntibasabe inguzanyo, hari na bamwe mu bagabo bumva ko abazisaba ari abari mu rwego rwo hejuru, akavuga ko hari bamwe mu baturage bari bafite imyumvire ikiri hasi mu gukorana n’amabanki.

Mbabazi Francois Xavier, Umuyobozi w’Akarere ka Ruhango,avuga ko Umubare w’Abaturage bo muri akarere muri rusange bakorana n’amabanki ukiri muto cyane, kubera ko abaturage barenga ibihumbi 100 bagejeje imyaka 18 kuzamura, 30% muri bo ari bo bakorana n’amabanki ndetse n’ibigo by’Imari akavuga ko bagomba gushyiramo ingufu kugirango abaturage basigaye bangana na 70% nabo bashobore gukorana n’amabanki ndetse n’ibigo by’imari.

Kugira ngo umubare w’abagore bagana amabanki n’ibiho by’imari urusheho kwiyongera,abagabo nabo barasabwa kujya bashishikariza abagore kugana ibigo by’imari ndetse n’ibigo by’imari bikarushaho kubegera,no kubakangurira gukorana nabo,dore ko abagore bashyiriweho gahunda zibafasha kwiteza imbere binyuze mu kigega gitera inkunaga abagore cya BDF.(Business Development Fund).

Uwambayinema M.Jeanne


Tanga igitecyerezo

Who are you?