Yashyizweho kuri 7 August, 2017 | 18:28

Rubavu: Amatora yabaye umwanya wo kwibukiranya ku bigize umuco

Mu gikorwa cy’amatora ku italiki ya 4/8/2017, hagaragaye ku buryo budasanzwe imyiyereko, imiteguro, kwakira ku biro by’amatora atandukanye mu karere ka Rubavu. Hamwe na hamwe bari bateguye ibikoresho bya Kinyarwanda byateguwe n’abategarugori ubona ko bakuze banabiri hafi ngo basobanurire ababagana batabisobanukiwe.

Mu murenge wa Kanama, kuri site y’itora ya GS Kanama Catholique, mu gihe cy’amatora hari hari ihema mu kibuga rwagati, riteguyemo igisabo, imbehe, ibiseke, ibicuma hari abagore bateze ingori mu mishanana. Hafi yabo hari abandi babyeyi ubona ko bakuze babyina indirimbo ziri mu byuma ndangururamajwi ariko bazibyina mu buryo bwa Kinyarwanda.

Umuyobozi w’iyi site Tuyisenge Theophile avuga ko byateguwe n’abategarugori mu rwego rwo gushimangira umuco nyarwanda. Agira ati “biriya byateguwe n’ababyeyi bo mu kagali ka Mahoko kuko bari biteguye kwakira abantu b’ingeri zitandukanye, bityo nabo bakaboneraho kubasobanurira umuco nyarwanda. Mbese bo babiteguye nk’imurikamuco.” Akomeza avuga ko kuri bo nk’abashinzwe amatora ntacyo bibatwaye kuko ngo batuma n’ababa bari ku mirongo batarambirwa.

Umwe mu badamu batatu bari muri iryo hema bambaye imikenyero isa ndetse n’ingori mu mutwe agira ati “urabona hano haranyura indorerezi zitari abanyarwanda, haraza kandi urubyiruko rutagira amahirwe yo kubibona iwabo; twagendeye rero ku mahirwe y’igikorwa cy’amatora kugira ngo twerekane umunyarwanda kazi nyawe nk’uko tumaze guhabwa agaciro.”

Ntabwo ari ibikoresho gusa aba berekana, ku ruhande hari n’abandi babyeyi umunani bakenyeye imikenyero isa babyina imbyino za Kinyarwanda bitonze kandi badahagarara. ku bwinjiriro bwa sita ariko naho hari abakobwa, batambaye impuzankano z’abakorerabushake ariko bari guha ikaze umuntu wese winjira kuri iyi site ya GS Kanama Catholique. Umwe muri abo badamu akomeza agira ati “byose twabiteguye ngo tunerekane umunyarwandakazi nyawe ko agirira urugwiro abamugana.”

Ibikoresho nk’ibi by’umuco kandi byari byateguwe ku buryo bwihariye mu murenge wa Gisenyi, kuri site ya GS Gisenyi Stella Maris ahatoreye abaturage b’akagali ka Nego. Aha naho hari hari ihema ritegiye ku buryo bwa Kinyarwanda.
Umusaza Nkaka Jean Damascene wo mu murenge wa Kanama avuga ko yishimiye uburyo abari n’abategarugori berekanye ko bimakaje umuco nyarwanda. Yungamo ati “mbona ahubwo barushijeho gususurutsa iki gikorwa cy’amatora. Ubundi najyaga njya gutora numva ari ibintu bikomeye cyane bya Politiki ariko ubu rwose wasangaga umuco wiganza hano, tukarushaho kumva twisanga.”

Mu banyarwanda bagombaga kwitabira amatora, abagore barutaga abagabo kuko bihariye 54% by’abari ku rutonde rw’itora. Abagore kandi bari bafite n’indi mirimo itandukanye muri aya matora ya Perezida wa Repubulika nk’abakoranabushake.

Musonera Sosthène


Tanga igitecyerezo

Who are you?