Yashyizweho kuri 4 September, 2017 | 10:22

Rubavu: Abahinzi barasaba kwagurirwa ibigega bahunikamo imbuto y’ibirayi

Abahinzi b’ibirayi bo mukarere ka Rubavu,umurenge wa Busasamana barasaba ikigo cy’igihugu kubongerera ubushobozi bwo kwagura umubare w’ibigega bihunikwamo imbuto y’ibirayi kugira ngo ubuhinzi bw’ibirayi bukomeze gutera imbere.

Mu gihe Ministeri y’ubuhinzi n’ubworozi MINAGRI ifatanyije n’ikigo cy’igihugu gishinzwe guteza imbere ubuhinzi RAB bisanzwe bihugura aba bahinzi kubijyanye no guhunika imbuto y’ibirayi,aba bahinzi barasaba inkunga y’amafranga kugira ngo tekiniki zose bigishijwe babashe kuzishyira mubikorwa.

Aba bahinzi bavuga ko kuba nta bushobozi burenze ku bumenyi bafite bishobora gutuma umusaruro uva muguhunika imbuto y’ibirayi utiyongera ndetse hakaba nubwo imbuto ihunistwe iba mbi bitewe nuko ikigega kitujuje ibisabwa.
Mazimpaka ni umuhinzi w’ibirayi. Yagize ati ”Hari abapfa kubyubaka uko babonye imbuto ikangirika bitewe nuko ibo bigega bitujuje ubuzirange maze imbuto yabo ntibone abaguzi.”

Ngo usibye abahinzi bibumbiye mu amakoperative ahinga igihingwa cy’ibirayi bakenera kugura iyo mbuto, n’abahinga ibirayi bo mugihugu cya republika iharanira demokarasi ya Congo nabo baza kugura Imbuto y’ibirayi mu Rwanda. Akaba ariyo mpamvu aba bahinzi basaba RAB inkunga y’amafranga kugira ngo bashobore kwagura umubare w’ibigega bihunika imbuto y’ibirayi.
Haburukundo Victor,umwe mubahinzi bahuguwe na RAB yagize ati ”Reba nk’iki kigega cya koperative yacu tubara ku rwego ruciriritse gihagaze nk’ibihumbi magana arindwi by’amafaranga y’u Rwanda(700,000RFR).Si koperative ibonetse yose yabasha kucyubaka kandi murabibona ko imbuto gihunitse atari nyinshi ku kigero cyo kumva ko zaduhaza tukanasagurira abanyekongo.”

Kubaka ikigega cyo guhunikamo imbuto y’ibirayi bisaba ibikoresho binyuranye harimo imbaho nziza zikomeye zubakwa nk’udutanda duto tugerekeranye dushyirwaho imbuto y’ibirayi kuko iba itagomba gushyirwa hasi mu rwego rwo kwirinda ko yahura n’ubukonje. Mugusakara iki kigega bashyiraho amabati asanzwe ariko bakavangamo make abonerana cyangwa se amwe yinjiza urumuri kugira ngo iyo mbuto ikomeze kugira ubuzima no kumera. Iki kigega kandi cyubakwa kuburyo cyinjiza umwuka uva hanze ariko kikirinda kwinjiza udusimba duto ndetse n’imbeba kuko twangiza iyo mbuto.Aha, birasaba umwenda usa n’akayungirizo ukikizwa hahandi hateganyirijwe kunyura umwuka uva hanze.

Uyu mwuka ufatanyije na rwa rumuri ruturuka hejuru ku mabati nibyo bituma iyo mbuto ikomeza gukura ariko ntikure kukigero cy’ikirayi kiri mu murima.
Aha,ikirayi kirakomera kikagenda kimera ku maso yacyo ariko nako gihindura ibara kigasa icyatsi kibisi. Imbuto nziza izatanga umusaruro utubutse uyimenyera ku maso yayo.Burya ngo uko ikirayi kigira amaso menshi ni nako kizabyara ibirayi byinshi nikigera mubutaka.

Imbuto yahunitswe muri ubu buryo niyo mbuto ibyara umusaruro mwiza.

Rutayisire Aisha


Tanga igitecyerezo

Who are you?