Yashyizweho kuri 13 June, 2016 | 13:41

Nyarusange : Kabore yahombeje abahinzi b’imyumbati

Mu murenge wa Nyarusange, akarere ka Muhanga, abaturage barataka guhombywa n’igihingwa cy’imyumbati yarwaye indwara ya kabore. Ibi byagize ingaruka ku buzima bwabo kuko ubugari buhenze, ndetse n’imyumbati isanzwe ikaba itaboneka. Icyakora ikigo cy’igihugu cyita ku buhinzi cyatanze indi mbuto nshya. Abahinze nabo uretse inzara yabateje, bahanganye n’ikindi kibazo cy’imyenda bari barafashe muri SACCO.

Abahinzi bo mu murenge wa Nyarusange akarere ka Muhanga , Intara y’ Amajyepfo baravuga ko uburwayi bw’ imyumbati bwabateje igihombo gikomeye kirimo n’imibereho itari myiza .Kubera indwara ya kabole yayibasiye ngo byatumye icika muri ako gace kuburyo magingo aya ikilo kimwe cy’ ifu y’ ubugali kigeze ku mafaranga Magana ane na mirongo itanu (450 Frw) mu gihe iyo ndwara itaraza cyaguraga amafaranga Magana abiri (200 Frw).

Nzayisenga Ignace uhagarariye abahinzi b’ imyumbatimu murenge wa Nyarusange avuga ko iyi ndwara ya kabole ifata ikokora ndetse byagera mu mizi ikabora.Akomeza agira ati “iyi ndwara nubwo hano isa n’ iyaje vuba ugereranije n’utundi duce tw’ intara y’amajyepfo yaje ije.twagerageje kuranduraiyarwayer yose ndetse tugerageza no gutanga amakuru ku buryo ku bufatanye n’ubuyobozi bw’ umurenge n’ ikigo cy’ igihugu gishinzwe ubuhinzi RAB baduhaye indi mbuto nshya tukaba twaratangiye kuyitubura .”

Undi muhinzi witwa Dusengemungu Jean Claude avuga ko kuva mu kwezi kwa gatatu batangiye gutubura iyo mbuto yitwa NASE 14 (Soma NASE cumi na kane ) ku buryo bizera ko mu kwezi kwa gatatu kwa 2017 imbuto nziza izaba yamaze kuboneka bityo abahinzi bakongera kuyihinga naho ubundi ngo kuba ingo za Nyarusange zitakigira imyumbati ni ikibazo gikomeye.

Agronome w’ uyu murenge Ndacyayisenga Rafiki Bonaventure avuga ko gutubura iyi mbuto bikorerwa mu materasi y’ indinganire ndetse ko bayihinze ku buso busaga hegitari 18 bityo ngo nta gushidikanya ko imbuto izaboneka ku bahinzi bose.Uretse ubu buso kandi ngo hari n’ abahinzi bagiye bahuza ubutaka bagahabwa imbuto yo gutubura.

Uretse inzara no kwishyura Sacco byabaye ihurizo

Bamwe mu babyeyi ba Nyarusange bavuga ko iyi ndwara ya kabole yabagizeho ingaruka zikomeye. Mukarugina Anonsiyata wo mu kagari ka Ngaru agira ati “hashize imyaka ibiri tutarya ubugali. Bwarahenze cyane kuburyo bigoye kuba wabona amafaranga yo kubugura nyamara ubugali nibyo biryo byari bitunze ingo nyinshi za hano I Nyarusange. “
Uyu mubyeyi wo mu kigero cy’ imyaka nka 50 y’ amavuko n’ imvugo irimo agahinda akomeza agira ati “turashonje rwose.” Mukarugina avuga ko kuri ubu asa nuwazinutswe guhinga imyumbati ngo kuko abona ntacyo imumariye.Agira ati “… umva ntintunga , ntacyo imariye , mbese naranayizinutswe”.

Aba bahinzi kandi bavuga ko ubuhinzi bw’ imyumbati bari barabugize ubw’ umwuga dore ko yo hamwe n’ urutoki ndetse n’ imbuto ari byo bihingwa byatoranijwe muri ako gace muri gahunda yo guhuza ubutaka. Bamwe muri bo bari barahawe inguzanyo na Sacco Nyarusange ariko ubu aho bagiriye iki kibazo cy’ uburwayi bwa kabole hishyura umugabo hagasiba undi.Ibi nabyo ngo byabagizeho ingaruka zikomeye kuko nushoboye kubona igitoki akigurisha akajya kwishyura amafaranga y’abandi yafashe.

Umunyamabanga nshingwabikorwa w’ umurenge wa Nyarusange Mukamutali Valerie avuga ko kubera icyo kibazo cyavutse , ubuyobozi bwagerageje guhuza abaturage na Sacco kugira ngo bongererwe igihe cyo kwishyura ndetse ntibacibwe amande y’ ubukererwe mu kwishyura.

Umuhire Valentin


Tanga igitecyerezo

Who are you?