Yashyizweho kuri 14 June, 2016 | 07:39

Nyarusange:Bamwe mubangirijwe ibyabo n’urugomero rwa Nyabarongo ntibarahabwa ingurane

Bamwe mu baturage bo mu murenge wa Nyarusange,akarere ka Muhanga,bavuga ko bahangayikishijwe n’uko bangirijwe ibyabo mu iyubakwa ry’urugomero rw’amashanyarazi rwa Nyabarongo. Bamwe barishyuwe,abandi kugeza ubu amaso yaheze mu kirere , kuko batarahabwa ingurane z’ibyabo byangijwe hashize imyaka umunani.

Nk’uko bitangazwa na Tuyisenge Potien umusaza ufite imyaka 52,utuye mu mudugudu wa Kiciro,akagari ka Musongati muri uyu murenge wa Nyarusange, yangirijwe ibintu byinshi bitandukanye, harimo ibiti bya Avoka,ibinyomoro,ibishyimbo,… Potien ngo yatunguwe no kubona abandi bishyurwa,nyamara we akabwirwa ko ifishi yari yabaruriweho imitungo ye yangijwe n’uru rugomero yabuze,avuga ko yabwiwe ko ifishi ye yaburiye mu biro by’akagari,kugeza ubu hakaba hashize imyaka umunani atari yishyurwa,cyangwa se ngo akorererwe indi. Ati«urugomero rwanyangirije ibintu byinshi bitandukanye,nari nabariwe nk’abandi bose ariko nza gutungurwa no kumva bambwira ngo ifishi yanjye yarabuze,nyamara abandi twabaruriwe hamwe bo bamaze kwishyurwa, hashize imyaka umunani yose narasiragiye,mu kagari ndetse no ku murenge,bakatubwira ngo nidutegereze ariko amaso yaheze mu kirere».Potien avuga ko yari yabariwe amafaranga ibihumbi Magana inani y’amafaranga y’u Rwanda (800 000 Frw).

Mukamurenzi Judith nawe utuye mu kagari ka musongati,avuga ko yari yarabaruriwe umutungo ari kumwe n’umugabo we,nyuma bakaza gutandukana,ariko akaba yarasiragiye kenshi ku murenge asaba ko yishyurwa ngo bagabane n’umugabo we,nyamara imyaka umunani yose ikaba ishize atari yayabona.
Ni nabyo Ngiruwonsanga Jean Paul nawe utuye mu kagari ka Musongati avuga ko nawe yangirijwe imyaka ndetse ubutaka bwe nabwo bugatwarwa n’amazi y’urugomero,ariko kugeza ubu akaba nawe atarigeze yishyurwa. Nyamara yari yabariwe ubwo bababariraga,bamwe bakaba barayabonye abandi bakayabura,kuri ubu bakaba barimo gusiragizwa n’ubuyobozi bw’akagari bababwira ngo bajye kubaza ibibazo byabo I Kigali kuri minisiteri.

Uyu muturage avuga ko bahise bitoramo ababahagarariye bazajya bajya kubabariza ikibazo cyabo I Kigali,nyamara ariko ntacyo byatanze kuko kugeza n’ubu batarabona ingurane z’ibyabo byangijwe. Habyarimana Jean,utuye mu mudugudu wa Gasharu,akagari ka Mbiriri,akaba ni umwe mu batoranijwe ngo ahagararire abandi bajya kubaza ibibazo byabo I Kigali kuri minisiteri,avuga ko iyo bageze kuri minisiteri,nabo bababwira ngo basubire mu kagari no ku murenge babatunganyirize amadosiye yabo, mu kagari nabo bababwira ko amafishi yabo yajyanywe ku murenge,abandi ko yabuze, bagera ku murenge nabo bakabasubiza ku kagari kuko aribo bazi ibibazo byabo uko biteye,kugeza ubu abaturage bakaba baraheze mu gihirahiro. Habyarimana yagize ati«twebwe twarayobewe pe,iyo tugiye kuri minisiteri,baratubwira ngo nidusubire mu murenge babitunganye neza,twagera ku murenge nabo bati nimujye mu tugari,mu tugari nabo bakatubwira ko amafishi yacu,bamwe yabuze abandi ko ari ku murenge,ubu mbese twabuze icyo twakora».

Iki kibazo kirambiranye kizwi n’ubuyobozi

Mukamutari Valérie umunyamabanga nshingwabikorwa w’umurenge wa Nyarusange, avuga ko abangirijwe imitungo yabo bamwe bishyuwe,abandi ntibishyurwe,aba batari bishyurwa,ngo ahanini ni abafite amafishi arimo ibibazo hagati yabo,nko kuba umuryango warabaruriwe ,umugabo abana n’umugore nyuma bakaza gutandukana,bityo umwe muri bo akabihagarikisha,cyangwa se amakimbirane asanzwe y’ubutaka,uyu muyobozi kandi avuga ko hari n’abandi babariwe imitungo bakaza gusanga harimo amakosa,nk’ababaruriwe imitungo ariko itagaragara ya baringa,abandi bakabarurirwa ibitari ibyabo,aya makosa yose , akaba ariyo yatumye bamwe bishyurwa abandi ntibayabone,ariko avuga ko harimo gukorwa ubuvugizi ngo abaturage ,basigaye batishyuwe nabo bishyurwe.

Hashize imyaka umunani uru rugomero rwubatswe,dore ko rwatashywe ku mugaragaro na Nyakubahwa Perezida wa repubulika y’u Rwanda Paul Kagame,tariki ya 05/ 03/ 2015,rukaba rwaratangiye no gutanga ingufu z’amashanyarazi,angana na MWT 18, uru rugomero rukaba rutanga 1/3 cy’ingufu z’amashanyarazi yose atangwa mu gihugu,uru rugomero kandi rukaba rwaruzuye rutwaye amafaranga asaga gato miliyoni ijana z’amadorari. Abangirijwe ibyabo bo batari bahabwa ingurane z’ibyabo byangijwe,bakaba bavuga ko hari abatemerewe guhinga ubutaka babaruriwe,ndetse n’abandi batuye muri metero 50 ugana ku mugezi wa nyabarongo bakaba barasabwe kuhimuka vuba,bakajya gutura mu midugudu.Aba baturage bakaba bavuga ko mu mu gihe batari bishyurwa amafaranga yabo nta bushobozi babona bwo kuhimuka.

Uwambayinema M.Jeanne


Tanga igitecyerezo

Who are you?