Yashyizweho kuri 5 April, 2016 | 12:24

Ngoma: Abahinzi b’umuceri barasaba MINAGRI kubegereza isoko n’uruganda

Abanyamuryango bibumbiye muri koperative COOPRIMWA ihinga umuceri mu gishanya cya Mwambu gihuriweho n’imirenge ya Remera na Rurenge mu karere ka Ngoma bavuga ko bahinga bakeza ariko bakogorwa no kutagira isoko ry’umusaruro n’uruganda ruwutunganya hafi. Abaza kuwubagurira bakabahenda abandi nabo bakawubaha kuko nta kundi baba bagomba kubigenza.

Umuyobozi w’iyo koperative Makombe Epimake, avuga ko babona umusaruro w’umuceri ariko bakawutanga udatonoye bagahendwa. Ati “ Ubu tugejeje kuri toni 5.5 kuri buri hegitari, ku buryo tugeza kuri toni 500 ku gihembwe cy’ihinga ; nyamara tugahura n’ ibibazo byo kutagira isoko rya hafi. Umuceri tuwujyana i Rwamagana, ubundi ab’i Kirehe bakaza kutugurira cyangwa Kayonza Rice; ariko bose ku giciro gito kuko baba badusanze hano”.

Ubuyobozi w’Akarere ka Ngoma, Nambaje Aphrodis nabwo bugaragaza ko kugira uruganda rutunganya umuceri muri aka karere ari icyifuzo ubuyobozi bahuriyeho n’abaturage kuko ngo uretse gukemura ikibazo cy’ingendo ndende no guhendwa, ngo mu karere ka Ngoma habonetse ibihingwa bisohoka byanditsweho ko byahakorewe bikanahatunagnyirizwa (Made in Ngoma) byaba ari ishema ku karere

Umuyobozi w’akarere ati “umuceri ukwiye kugira isoko n’uruganda, akarere kacu karera cyane ariko ugasanga ibihingwa byaba urutoki n’umuceri bijyanwa ku masoko za Kirehe, Rwamagana n’ahandi, bakandikaho ko byatunganyirijwe iyo. Tubonye uruganda mu karere ka Ngoma, umuceri uhingwa iwacu ukajya utunganyirizwa iwacu ukajyanwa ku ruganda hafi , ugasohoka wanditseho ko watunganyirijwe I Ngoma , cyaba ari ikintu cyiza atari ku bahinzi gusa, ahubwo no ku karere”.

Umusaruro nturagera aho wahaza uruganda

Tony Nsanganira, asubiza ku byifuzo by’abahinzi b’umuceri bibumbiye kuri COOPRIMWA, avuga ko umusaruro babona kugeza ubu utaragera ku rugero rushingirwaho kugira ngo ahantu hashyirwe uruganda, ngo kuko uruganda rushyirwa ahantu rushobora gutunganya nibura toni 30 ku munsi.
Asaba abahinzi guharanira kongera umusaruro bakagera ku rugero rukwiye, nyuma hagakorwa ubuvugizi bakegerezwa uruganda.Ati “turaharinira kongera umusaruro ariko tunasagurira amasoko , isoko rishobora kuba uruganda kimwe n’uko ryaba umuguzi mwumvikana akakwishyura neza. Mbere yo gushyiraho uruganda rero umuntu aribaza ati ‘ese uwashyiraho uruganda azabona umusaruro uhagije? Niyo mpamvu tubashishikariza kongera umusaruro; kuko umusaruro ubaye ugeze ku rugero rukwiye ubuvugizi bwakorwa n’uruganda rukaza kuko hari ibyo uruganda rukenera ngo rukore neza”

Uyu munyamabanga wa Leta muri MINAGRI kandi asaba abahinzi kongera umusaruro mu bwinshi no mu bwiza, inzego zibishinzwe zigakomeza kubongerera ubumenyi mu bijyanye n’ubuhinzi n’uburyo bizinesi ikorwa.

Koperative “COOPRIMWA” igizwe n’abanyamuryango 623 baturuka mu mirenge ya Rurenge na Remera bakorera ubuhinzi bw’ umuceri mu gishanga cya Mwambu kiri ku buso bwa hegitari 89 .
Muri rusange mu karere ka Ngoma, aho abahinzi b’umuceri bagaragaza ko banyotewe no kugira uruganda rutunganya umuceri habarurwa koperative 7 zihinga umuceri 7 ku buso bwa hegitari 1240, aho beza toni zisaga 7,180 ku gihembwe cy’ihinga kimwe.

Karegeya Jean Baptiste


Tanga igitecyerezo

Who are you?