Yashyizweho kuri 2 May, 2018 | 11:39

Ngenzi Octavien na Tito barahira baratangira kuburanishwa mu rukiko rw’ubujurire

Kuri uyu wa gatatu tariki ya 02 Gicurasi I Paris Mu Bufaransa nibwo hatangira urubanza rwa Octavien Ngenzi na Tito Barahira bashinjwa kugira uruhare muri Jenoside yakorewe abatutsi mu Rwanda, by’ umwihariko muri Paruwasi ya Kabarondo ahahoze ari perefegitura ya Kibungo , ubu ni mu Ntara y’Iburasirazuba.

Ni urubanza ruje mu bujurire mu rukiko rushinzwe imanza nshinjabyaha zikomeye bita Cours d’ Assises mu rurimi rw’igifaransa. Aba abagabo bombi basimburanye mu kuyobora Komini ya Kabarondo mu cyari perefegitura ya Kibungo kuva mu mwaka w’1977 kugeza muw’ 1994 Ubwo Jenoside yakorewe abatutsi yabaga .

Urubanza rwabo rwatangiye mu kwezi kwa cumi 2016 aho baregwaga ibyaha birimo gutanga amategeko yo kwica ibihumbi by’ abatutsi basaga ibihumbi bitatu na Magana atanu by’ umwihariko bahungiye kuri paruwasi ya Kabarondo ,banaregwa kandi ibyaha byibasiye inyoko muntu , ibikorwa bigamije kurimbura imbaga no gucura umugambi wo kurimbura ubwoko bw’abatutsi .

Urukiko rw’ I Paris mu Bufaransa rwari rwabakatiye igifungo cya burundu mu kwezi kwa karindwi kwa 2016 bahita bajuririrra iki cyemezo cy’ urukiko ari narwo rubanza rutangira kuri uyu wa gatatu baburana ubujurire.
Octavien Ngenzi w’imyaka 60 y’ amavuko yafatiwe mu birwa bya Mayotte muri 2004 ashaka ubuhungiro akoresheje impapuro mpimbano mu gihe Tito Barahira w’ imyaka 67 yafatiwe i Toulouse mu Bufaransa aho yari atuye muri Mata 2013.

PAX PRESS


Tanga igitecyerezo

Who are you?