Yashyizweho kuri 10 June, 2019 | 10:24

Muhura: Abaturage bashimiye ivugururwa ry’ ibyiciro by’ubudehe

Abaturage b’Umurenge wa Muhura, mu karere ka Gatsibo, bavuga ko bishimiye ivugururwa ry’ibyiciro by’ubudehe, bakaba basaba ko amakuru ko noneho byakorwa neza, bityo buri muturage akibona mu byiciro ashyizwemo hashingiwe ku makuru yatanze.

Ntivuguruzwa Valens ni umuturage wo mu Murenge wa Muhura. Atuye mu kagari ka Mamfu. Avuga ko yatanze amakuru atari yo ku nshuro ya mbere ndetse n’iya kabiri, kandi ayo makuru ari yo yari agamije gushyingirwaho mu gushyira abantu mu byiciro by’ubudehe, bituma yisanga mu kiciro cya 3 cy’ubudehe. Yagize ati “ Ubwo bazaga kutubaza amakuru ajyanye n’imibereho yacu, natanze amakuru yo kwirarira adahuye na gato n’uko nari mbayeho. Nabikoze ku mpamvu y’uko numvaga inyito z’ibyiciro zari zisuzuguritse, harimo umutindi, umutindi nyakujya, umukene, umukene wifashije. Na nyuma yaho bagarutse numvaga ntakwiye kugaragaza ubukene bwanjye.”

Kuri ubu, Ntivuguruzwa arizera ko amakuru aherutse gutanga muri iki gihe cyo kuvugurura ibyiciro by’ubudehe ari ay’ukuri, akaba yemeza ko nashingirwaho nk’uko yayatanze, ikiciro azashyirwamo kizaba kigendanye n’imibereho afite.
Mpinganzima Georgette ni umuturage nawe w’Umurenge wa Muhura . Avuga ko kuvugurura ibyiciro by’ubudehe bimushimishije cyane kuko ngo yifuzaga kuva mu kiciro cya mbere agashyirwa mu kiciro cyisumbuyeho, ngo kuko hari intambwe nawe ubwe asanga amaze gutera mu mibereho. Yagize ati “ Ubu mfite inka, jye n’abana banjye tunywa amata y’umugoroba, aya mu gitondo tukayagemura. Buri kwezi mbona amafaranga 27 000 by’amafaranga y’u Rwanda aza yiyongera ku yandi mbona muri VUP nkabasha kubaho ntasabirije!”

Avuga na none ko yifuza kujya mu kiciro cya kabiri, akava mu cya mbere kuko imibereho afite isumba iyo yarafite atarashyirwa muri VUP.

Amakuru azakoreshwe mu byiciro by’ubudehe gusa

Abaturage bifuza ko ibyiciro by’ubudehe bitahuzwa no kwiga muri kaminuza ku banyeshuri batsinze, ko inguzanyo yahabwa buri wese, uyishaka wemerewe kwiga muri kaminuza y’u Rwanda na koleji ziyishamikiyeho.

Umunyamabanga nshingwabikorwa w’Umurenge wa Muhura, Rugengamanzi Steven, ku bijyanye n’ibyiciro by’ubudehe, avuga ko amakuru yatazwe n’abaturage ari yo yashyingiweho mu kubashyira mu byiciro, ko ahubwo ngo abaturage benshi baba bifuza kujya mu kiciro cya mbere kugira ngo bafashwe. Ati “ Mu by’ukuri, amakuru atangwa n’abaturage ni yo ashyingirwaho mu kubaha ibyiciro, gusa abenshi baba bifuza gushyirwa mu kiciro cya mbere, bitashoboka bakumva ko barenganyijwe.”
Aha Rugengamanzi yasabye abaturage ayoboye gutanga amakuru nyayo ku mibereho yabo muri iyi gahunda y’ivugururwa ry’ibyiciro by’ubudehe kugira ngo abe ari yo azashingirwaho.

Mugisha Bénigne


Tanga igitecyerezo

Who are you?