Yashyizweho kuri 21 September, 2016 | 08:36

Muhanga :Abanyonzi barataka kunyunyuzwa n’abayobozi b’amakoperative yabo

Bamwe mu batwara abantu ku magare bo mu karere ka Muhanga, mu Ntara y’Amajyepfo barataka ko bazahajwe n’imicungire mibi y’amakoperative yabo.Bakaba batangaza ko basanga izo koperative ntacyo zazabagezaho niba ubuyobozi butabatabaye.

Aba banyonzi bavuga ko kujya mu makoperative bibazonga aho kubateza imbere kuko ngo basanga abereyeho kuba imbehe y’abayobozi babo. Nk’uko bitangazwa na Kamana Landuwaridi (izina ryahinduwe kugira ngo atazirukanwa ku iseta) ukorera ubunyonzi ku muhanda Kinamba-Kinini mu murenge wa Shyogwe, ngo koperative yabaye akarima k’abayobozi bayo,aho baca umunyamuryango amafaranga bishakiye kandi bakayakoresha uko babyumva. Ati “hari uwo baca amafaranga 12000, undi 40000 cyangwa 45000 bitewe n’uko babishatse.Uwanze kuyatanga, ntiyemererwa gukorera muri uyu muhanda.”

Imicungire idasobanutse y’amwe mu makoperative y’abanyonzi yemezwa kandi na Uwimana Eliya uvuga ko mu myaka irenga itanu amaze ari umunyonzi, nta kintu kigaragara koperative yamumariye. Ati “uretse gusa kuba banyemerera kujya mu muhanda nkahavana amarariro, nta kindi mbona bimariye!”.Cyakora bamwe mu banyonzi bavuga ko akamaro ka koperative yabo bakabona mu minsi mikuru yo gusoza umwaka ngo kuko babagurira ubushera, bagakora ubusabane.

Ahandi babonera ibyiza bya koperative ni igihe hagize ugira ibyago agapfa cyangwa agapfusha umwana cyangwa umugore, aha ngo koperative iramutabara, ikaba yamugurira nk’isanduku.Cyakora ngo bakaba basanga ibi bidahagije kuri koperative ifite abanyamuryango benshi kandi hari n’igihe babasaba kwikoramo kugira ngo bagoboke iyo bigaragaye ko mu isanduku nta faranga rirangwamo.Bakaba bakomeje kwibaza aho amafaranga batanga arengera.

Bategekwa kujya muri koperative

Bamwe mu banyonzi basanga kuba basabwa gutanga “mbogo”(amafaranga atangwa n’ugiye gutangira umurimo wo gutwara abantu ku igare) bibangamira abashaka kwihangira umurimo bahereye ku gutwara abantu n’ibintu ku igare. Kuri bo, ngo kwaka umuntu uje gutangira ubunyonzi amafaranga 40.000 cyangwa 45.000 ni nko gushaka kumukumira no kumuca intege mu byo aba yiyemeje.

Umunyonzi witwa Sibomana Silas ukorera ku Kinamba cya Kabgayi, abivuga agira ati “biragoye ko umuntu umaze kwikuramo amafaranga agera ku 85000 yo kugura igare, yahita abona andi 45000 yo gutangira iseta.”Cyakora ngo aya mafaranga aba agomba kuyatanga kuko atabonetse atakwemererwa gushyira igare mu muhanda.Kuri we, akaba asanga, hakwiye kubaho kwemera ko umunyonzi yajya mu muhanda bitabaye ngombwa ko ahita yinjira muri koperative y’abanyonzi. Ati“ kubera uburyo umuntu aba ashaka kwikorera, baramufatirana bakamuca ariya nyine y’ubujinga, na koperative bikitwa ko ayirimo ariko ntacyo imumariye!”

Itegeko rigenga amakoperative rigena ko umugabane utangwa n’umunyamuryango mushya wa koperative ugenwa hagendewe ku mutungo koperative ifite.Abanyonzi bo bakaba bakomeje kwibaza icyo amwe mu makoperative y’abanyonzi ashingiraho mu kwaka “mbogo” mu gihe nta kintu kigaragara baba bafite uretse gusa kuba baba bamaze igihe kinini bakora. Kuri izi mpungenge, bamwe mu bayobozi b’amakoperative akemangwa kudakorera mu mucyo, banga kugira icyo bazivugaho. Nka Habimana bahimba Nyangamugayo, ukuriye koperative y’abanyonzi bakorera mu kagali ka Kinini mu murenge wa Shyogwe, aragira ati “nta cyo nabibabwiraho! Abanyamakuru musigaye mutangaza ibintu ku maradiyo!”Abanyonzi bazahajwe n’imicungire mibi y’amwe mu makoperative yabo bakaba basaba leta ko yabatabara, dore ko nubwo ari bo baba bishyiriyeho abo bayobozi babo ,kubakuraho bitaba biboroheye kuko ugerageje kugaragaza ikibazo bahita bamutera hejuru, bakaba banamwirukana ,akagenda atareba inyuma!

Barasabwa kugana abashinzwe amakoperative

Kuri iki kibazo, umuyobozi w’akarere ka Muhanga, Mudamu Uwamariya Beatrice asaba abanyonzi kugana abakozi bashinzwe amakoperative ku rwego rw’umurenge n’akarere.Akaba avuga ko abo bakozi bafite mu nshingano zabo gukurikirana no kumenya imikorere y’amakoperative. Ati“ nimubagane, mubabwire ibibazo byanyu, bagenzure imicungire ya ko perative zanyu. Nta kiguzi kindi bazabaca kuko ni abakozi babihemberwa.”

Ku rundi ruhande ariko, umuyobozi w’akarere avuga ko hari n’urwego rw’igihugu rushinzwe amakoperative (RCA) ruba rugomba kumenya imibereho n’imicungire yayo.Cyakora, abanyonzi bo bakaba basangaa hubwo abo bakozi ari bo bakagombye kuva mu biro bakaza kureba uko byifashe mu makoperative bashinzwe. Bati “ese ugiye kumureba wakwitwaza n’ibitabo bya koperative?Ariko we aje kuri koperative, yabonana n’abanyamuryango ndetse akaba yareba no mu bitabo byayo kumakoperative abigira dore ko hari n’atagira na cwa!”
Imicungire mibi mu makoperative y’abanyonzi ntivugwa muri Muhanga gusa.

Amakuru dukesha igihe.com yo ku wa 23/09/2016 avuga ko abanyonzi bo mu karere ka Rubavu nabo bari kuririra mu myotsi nyuma y’uko abayobozi b’amakoperative yabo babambuye miliyoni zigera kuri 12 z’amafaranga y’u Rwanda.Mu mwaka wa 2011, guverinoma yahize ko amakoperative cyane cyane ay’urubyiruko azaba arangwa n’imicungire myiza mu mwaka wa 2017.

Kaberuka Telesphore


Tanga igitecyerezo

Who are you?