Yashyizweho kuri 4 May, 2018 | 15:24

Masaka:Kubyaza umusaruro imigano byabakuye mu bushomeri

Bamwe mu rubyiruko rwo murenge wa Masaka bo mu karere ka Kicukiro bigishishwa mu kigo kitwa “Masaka business incubation center”, ikigo cyigisha urubyiruko kwihangira imirimo mu kubyaza imigano umusaruro,mu kuyibyaza mo ibikoresho bitandukanye,harimo intebe,amarido,amatara yo mu nzu n’ibindi , baravuga ko icyo gihingwa cyatumye bikura mu bushomeri,ubu bakaba babasha kwifasha.

Iradukunda Francine,avuga ko kwiga kubyaza umusaruro imigano, byamukuye mu bushomeri amenya gukora amatara,ameza n’intebe,kandi ko ari umwuga umutunze umufasha kwikemurira ibibazo. Agira ati “Imigano twigishijwe kuyibyaza umusaruro,kuva namenya gukora amatara,n’intebe,ibitanda n’ibindi bikoresho bitandukanye byo mu nzu,biragurishwa nkabona amafaranga,nkagura imyambaro,amatungo,ubu nasezereye ubushomeri.”

Mukaneza Vestine,nawe ni umwe mu rubyiruko rwigishijwe gukora ibikoresho bitandukanye mu migano,avuga ko ubumenyi yungutse bwamukuye mu bushomeri,ngo kuko nta n’undi mwuga yarazi gukora wamutunga. Agira ati “Nabaye aho nta mwuga n’umwe nzi gukora,ubuzima bukangora mu kubona ibintunga kuko nibana mu nzu,ariko aho nigishirijwe ko nshobora kubyaza umusaruro imigano nkamenya gukora ibikoresho biva mu migano,sinkibarirwa mu bashomeri,kuko ubu niwo mwuga wanjye.”

Akomeza avuga ko ibyo bikoresho babigurisha ku bantu batandukanye mu Rwanda. Ndetse ngo hari n’ibyo bagurisha muri Uganda, bakabonamo amafaranga.
Mihigo Augustin,umukozi ushinzwe ubuhinzi bw’imigano n’ibikomoka ku mashyamba muri Minisiteri y’Ubutaka n’amashyamba (MINILAF),avuga ko kubyaza umusaruro imigano bizafasha mu kurwanya ubushomeri mu rubyiruko ku buryo bugaragara,mu gihe urubyiruko rubishyizemo imbaraga. Agira ati’’Imigano iyo ibyajwe umusaruro itanga akazi urubyiruko rukava mu bushomeri,iyo rubishyizemo imbaraga.”
Imigano ibyazwa umusaruro mu buryo butandukanye,usibye gukorwamo ibikoresho byo mu nzu,nk’intebe.imitako,ishobora no kuribwa.

Nyirangaruye Clementine

.


Tanga igitecyerezo

Who are you?