Yashyizweho kuri 7 June, 2017 | 10:42

Kutagira ubumenyi mu kurwanya inda zo mu mashyamba birateza igihombo abayahinga

Hashize imyaka ine amashyamba yo mu Rwanda yugarijwe n’udukoko twiswe inda zo mu mashyamba. Uretse kutubona abaturage nta kindi bazi badukoraho kuko nta muti watwo. Gusa minisiteri y’Umutungo Kamere ivuga ngo nta mpamvu yo gushyira amaboko mu mufuka, abaturage bagomba gukoresha uburyo buhari mu kuturwanya.

Mu murenge wa Gasaka, mu karere ka Nyamagabe, mu kagari ka Remera mu midugudu ya Nyamifumba, Murambi na Kabeza baremeza ko udukoko tw’ inda dufata ibiti by’ inturusu bikiri bito kandi bari kuzabikuza bakabona umusaruro ufatika bagurisha imbaho no gucana amakara mu biti bikuze.

Aba bahinzi bavuga ko izi nda ziguruka mu gihe cy’ izuba zijyanywe n’ umuyaga hanyuma zigafata ibiti by’ inturusu byaba bikiri bito cyangwa bigeze mu gihe cyo kwera hanyuma bikuma n’ amababi yabyo agahunguka. Mporambizi Damien asobanura uburyo utwo dukoko twaje mu mashyamba.” Hashize hafi imyaka ibiri, twabonye inda ziguruka zigafata ibiti hanyuma bikuma n’amababi yamara kuma agahunguka. Zifata ishyamba ryose natwe twayobewe iyo utu dukoko twavuye. Umenya ari icyorezo.” Yakomeje avuga ko zaje buhoro buhoro hanyuma zigafata amashyamba hafi ya yose mu murenge wa Gasaka.

Igihombo kuri ba nyiri amashyamba

Aba baremeza ko igihombo cyatewe n’utu dukoko kitabura kubera ko ubusanzwe mbere amashyamba barayakuzaga hanyuma bakayasarura babajisha imbaho bakazigurisha rumwe amafaranga igihumbi magana inani (1800 Frw). Ndetse bakuragamo ibiti byo gucanamo amakara no kubakisha hanyuma umusaruro w’amafaranga ukiyongera cyane cyane uturutse mu biti byabo. Ubu aba baturage baremeza ko babisarura biteze hanyuma bakanahendwa.

Ndayisaba Evariste utuye mu kagari ka Remera mu mudugudu wa Kabeza yagize ati” Narumbije ishyamba kuri hegitali nyinshi. Mbere ishyamba ryanjye ritarafatwa n’ utu dukoko nasararuga ibiti ngakuramo ibihumbi ijana na mirongo itanu (150000 Frw) ngatanga mitiwele( mutuelle), nkarihira abana amashuri ndetse nkagira n’ayo nzigama mu buryo bwo gukomeza kwiteza imbere ariko ubu natashye amara masa. Ubu n’ imihembezo gusa ivamo”.

Undi nawe witwa Gasana James agaragaza igihombo yatejwe n’ utu dukoko. Ati” nanjye nari mfite ishyamba nasaruragamo ibihumbi mirongo inane (80000 Frw) nakuraga mu mbaho ariko ubu sinarenza ibihumbi makumyabiri(20000 Frw). Iki cyorezo cyaduteye igihombo kuko amafaranga twinjizaga siyo twinjiza ubu. Twarahombye cyane.”

Umunyamabanga nshingwabikorwa w’ umurenge wa Gasaka Bayiringire Jean avuga ko iki kibazo kizwi kandi ko ingamba zafashwe. Ati” Nibyo koko ikibazo cyagaragaye mu myaka ibiri ishize mu murenge wa Gasaka ndetse no mu gihugu hose.Twegera abaturage tukaganira tukumvikana ko batema ibiti birwaye usibye ko ubu mu gihe cy’ imvura utwo dukoko turi kugabanuka ugereranije nuko byari bimeze mu gihe cy’ izuba.” Ngo bagira abaturage inama zo guhinga ubwoko bw’ibiti bya mayideni( maiden) kuko arizo zidafatwa n’iki cyorezo kandi bababwira ko bagomba gusarura ibyo birwaye ubundi bakarihingira. Naho kukijyanye n’ imiti yo kwica utwo dukoko ubuyobozi buremeza ko bitapfa gukunda kubera ko ushobora gutera imiti hanyuma ukangiza ibidukikije.Bayiringire ati” Uramutse ufashe gahunda yo gutera imiti utu dukoko wakwangiza byinshi mu bidukikije. Urabona ko imyaka ishobora kwangirika uramutse utereye imiti mu kirere kubera ko ahanini amashyamba aba adahinze ahantu hamwe muri bwa buryo bwo guhuza ubutaka, ahubwo Ikiriho ni uko abafite amashyamba bayakorera hanyuma bagakuramo ibyarwaye ndetse bakayakorera amasuku hanyuma tukareba ko utwo dukoko twacika burundu”.

Ubwo abasenateri bahuriye muri Komisiyo y’Iterambere ry’Ubukungu n’imari bahuraga na Minisitiri y’Umutungo Kamere Dr. Biruta Vincent bakaganira kuri iki kibazo, yavuze ko Minisitiri y’Umutungo Kamere, yavuze ko mu bumenyi bamaze kugira kuri utu dukoko, umuti watwo utaraboneka, ariko akavuga ko uramutse unabonetse ugaterwa mu mashyamba wakwangiza inzuki, bikagira ingaruka ku musaruro wazo, ndetse ngo imvura iguye yawohereza mu mazi ugasanga amafi n’ibindi binyabuzima bibamo bikangirika. Yagize ati”Tuwukoresheje wakwangiza inzuki, ubuki bukabura. Uyu muti kandi tuwuteye imvura ikagwa yawujyana mu migezi ukica urusobe rw’ binyabuzima biyirimo.” Ubushakashatsi bwakozwe n’iyi minisiteri kandi bwagaragaje ko izi nda ziterwa na Virus yitwa thaumastocoris peregrines nk’uko Mutaganda Amini ushinzwe amashyamba muri minisiteri y’Umutungo Kamere yabisobanuriye Royal TV umwaka ushize.

Utu dusimba twatangiye kugaragara mu mwaka wa 2013, tukaba twibasira ibiti by’inturusu, aho usanga amashyamba agwingira cyane cyane tukagaragara mu gihe mu bihe by’ubushyuhe. Ubucucike bukabije bubuza ibiti guhumeka kubura amazi kwa bimwe muri byo biri mu bituma utu dukoko twibasira ubuso bunini.

Umwe mu miti irambye kandi yashobokera ba nyiri amahyamba ni ukuyafata neza bayacukuramo imirwanyasuri kugira ngo amazi agumemo.

Munyaneza Emmanuel


Tanga igitecyerezo

Who are you?