Yashyizweho kuri 13 April, 2017 | 08:29

Kugenzura no gukurikirana inyerezwa ry’imari ya Leta mu nzego z’ibanze biracyabangamiwe n’imikorere y’inzego

Umuryango uharanira kurwanya ruswa n’akarengane Transparency International Rwanda[TI-Rw], ndetse n’Ubushinjacyaha bw’u Rwanda baravuga ko gukurikirana no kugenzura inyerezwa ry’imari ya Leta mu nzego z’ibanze bikibangamiwe n’uburyo bukoreshwa mu kugenzura imari ya Leta butagera mu nzego z’ibanze nko ku rwego rw’imirenge, ndetse n’inzira z’amategeko.

TI-Rw iragira inama urwego rugenzura imari ya Leta gucukumbura.
Akayabo ka Miliyoni zibarirwa muri 222 zikoreshwa n’inzego z’ibanze harimo nk’imirenge, ibigo nderabuzima, amashuri n’izindi nzego zigenerwa amafaranga avuye ku turere Non-Budget Agencies (NBA), atagaragajwe uburyo yakoreshejwe mu ngengo y’imari ya 2014/15, nk’uko bikubiye muri Raporo y’ Umugenzuzi mukuru w’imari ya Leta na 2015.

Transparency International Rwanda(TI) ivuga ko isesengura yakoze rigaragaza ko amakosa ajyanye no gukoresha umutungo wa leta, hari ubwo koko aba ashingiye ku buriganya bukorwa n’abakozi nk’uko umugenzuzi mukuru w’imari ya leta abigaragaza, ariko hari n’ubwo ayo makosa aba ashingiye ahanini ku bumenyi buke mu icungamutungo, no kutubahiriza amategeko mu mitangire y’amasoko ya leta.

Ingabire Marie Immaculee, Umuyobozi w’umuryango TI-Rw, agira inama ibiro by’umugenzuzi mukuru w’imari ya leta kujya bikurikirana neza imikoreshereze y’amafaranga mu nzego z’ibanze kuko nyuma yuko leta yegereje ubuyobozi abaturage izo nzego arizo zinyuramo amafaranga menshi agenewe ibikorwa bigamije guteza imbere abaturage, ariko ntihakorwe igenzura ryimbitse, bikaba icyuho cya ruswa no kunyereza imari ya leta.Yagize ati "Ingengo y’imari ya leta nyinshi ubu yaramanutse iri gukorera kuri ziriya nzego zo hasi. Ariko ntabwo umugenzuzi mukuru agenda ngo agere ku murenge, mu bitaro by’uturere no mu bigo nderabuzima by’uturere n’amashuri kandi naho hari amafaranga menshi, noneho bigatuma utamenya uko ikibazo kigaragazwa na Auditor General aho cyabereye n’uko giteye.”

TI-Rw, ivuga kandi ko kuba uburyo bw’ikoranabuhanga bukomatanyije bugaragaza amakuru ku mikoreshereze y’imari ya leta buzwi ku izina rya Integrated Financial Management System (IFMS), budakoreshwa muri izo nzego z’ibanze harimo ku mirenge, amashuri, ndetse no mu bitaro n’ibigo nderabuzima by’uturere, ari imwe mu mbogamizi ikomereye ubugenzuzi bw’imari ya Leta, nubwo urwo rwego rwo rutabigaragaza.Ingabire agira ati “Icyo kibazo kirahari kuko uburyo bwa IFMS butagera mu nzego zibanze, kugenzura izo nzego zose ntibishoboke, bigatuma hari amafaranga agataragazwa neza uko yakoreshejwe mu nzego z’ibanze.”

MINALOC iravuga ko yafashe ingamba

Odette Uwamariya, umunyamabanga uhoraho muri minisiteri y’ubutegetsi bw’igihugu avuga ko hafashwe ingamba zo atari izo guhana gusa, ahubwo n’izo kugaruza ayo mafaranga, ndetse no kubaka ubushobozi mu nzego zose, zirimo n’iz’ibanze mu bijyanye n’icungamutungo ku buryo bigenzura mbere y’uko umugenzuzi mukuru w’imari ya leta abageraho.Yagize ati “Turimo gutekereza no kuburyo twakifashisha ikoranabuhanga ariko tukanashyira imbaraga mu buryo bwo guhana no kugaruza ayo mafaranga yanyerejwe."
Akomeza avugako bagiye gushyiraho uburyo bw’ikoranabuhanga bugaragaza neza uburyo imari ikoreshwa mu nzego z’ibanze.Ati “Igikomeye ni ukubaka systeme ituma ubyo dukora tubikurikirana yaba ari ku rwego rwa Minisiteri ariko no ku rwego rw’uturere n’intara, bakaba bafite uburyo buhoraho bugaragaza niba amafaranga ari aya Gira-Inka cyangwa VUP yarageze ku mugenerwa-bikorwa, cyangwa yaciye hirya.”
Imibare igaragazwa na MINALOC yerekana ko kugeza ubu muri miliyali zirengaho gato 3 zagaragajwe n’umugenzuzi w’imari ya Leta [Auditor General]ko zanyerejwe, hamaze kugaruzwamo Miliyali zigera kuri ebyiri.

Ubushinjacyaha bubangamirwa n’ibyuho biri mu mategeko

Ubushinjacyaha bw’u Rwanda buvuga ko kuri ubu hari imbogamizi z’uko mu mategeko harimo icyuho. Ibi ngo bituma gukurikirana abantu bakekwaho ibyaha byo kunyereza umutungo wa Leta bitihuta, bigafata igihe kinini ngo amanza b’abaregwa zihinduke amategeko kugirango abahamwa n’ibyo byaha bahanwe.

Umuyobozi w’ishami rishinzwe gukurikirana ibyaha bimunga ubukungu bw’igihugu mu bushinjacyaha bukuru, Nyirurugo Jean Marie Vianney, yagize ati, “Biracyari imbogamizi ikomeye. Hari igihe bishobora gufata umwaka wose kugirango urubanza rw’umuntu ukekwaho kunyereza no gukoresha nabi imari ya leta rurangire, ndetse runahinduke itegeko, ibye bibe byatezwa cyamura kugirango amafaranga yanyereje ayagarure.”

Mu gihugu hose, ubushinjacyaha butangaza ko mu myaka itatu ishize bwakurikiranye imanza z’abantu barenga 1,100 banyereje umutungo wa Leta, banyereje amafaranga y’u Rwanda agera kuri Miliyari 40, harimo umutungo bikekwako warigishijwe, n’umutungo wakoreshejwe nabi. Abandi bantu bagera kuri 841 bakekwaho ibyaha nk’iyo baracyaburana.

Mu manza zamaze kuba itegeko zirimo Miliyari zirenga 3 z’amafaranga y’u Rwanda zigomba kwishyurwa n’abo bantu batsinzwe mu nkiko. Kuva mu mwaka w’2015 hashyizweho itegeko rijyanye no kugaruza umutungo wa Leta “Law on Asset Recovery”, hamaze gufatiirwa imitungo itimukanwa y’abantu bagera ku 166, ndetse hanafunzwe Konti zigera kuri 23 z’abantu bakurikiranyweho ibyaha birimo kunyereza no gukoresha nabi imari ya Leta.

B.R


Tanga igitecyerezo

Who are you?