Yashyizweho kuri 7 July, 2016 | 15:16

Kigali: Ikarita y’urugendo iragabanya akajagari mu gutwara abantu

Kuri ubu mu mujyi wa Kigali udafite ikarita y’urugendo atemerewe gutwarwa nk’I Nyamirambo, Gikondo, Kanombe n’ahandi. Ubu abari bamenyerewe nk’abakarasi, bahamagaraga abagenzi, amajwi yabo ntacyumvikana. Nta mu konvuwayeri “Convoyeur” ukigenda mu modoka ahubwo umuntu arinjira akegereza ikarita ye ku mashini iri ku muryango w’imodoka, amafaranga y’urugendo agakurwaho.

Kuri bamwe ngo ubu buryo bushya n’ubwo bukirimo imbogamizi ku bagenzi, ariko ngo bwagabanyije akajagari katerwaga n’abakarasi ndetse binatuma kuri ubu nta modoka igikereza abantu ku cyapa itegereje abagenzi.Munyezamu Augustin, umugenzi I Nyamirambo arishimira ukuza kww’aya makarita. ati “Ubundi wasangaga abakonvuwayeri bamwe ari abatakarabye, ari abanyweye ibitabi bikuba ku bantu ngo barishyuza ariko ubu umuntu aragenda mu mutekano we usesuye.”

Ikarita ubwayo igura amafaranga y’u Rwanda 500, umuntu agashyirishaho amafaranga ashaka. Iyo amafaranga ashizeho, bisaba ko ugenda yongereshaho amafaranga ku bacuruzi bayo baherereye kuri buri cyapa. Utayifite nawe kandi ashaka kugenda abo baba bazifite kuri buri cyapa. Umukozi muri AC Group igurisha ayo makarita avuga ko ikarita imwe ikora ku mirongo yose yo mu mujyi wa Kigali. Kuri ubu iri gukora mu modoka zijya I Remera, I Kanombe, Gikondo, Nyamirambo,…

Gusa ngo kuba iyi carte itandikwa ku muntu ni ikibazo kuko itakaye undi yayikoresha nta kibazo. Munyezamu ati “uyitaye undi muntu akayitora yayigenderaho ugashiduka amafaranga yawe yayamazeho.” Cyakora, uyu yemeza ko iki kibazo nikidakemurwa n’abashinzwe gutanga aya makarita kizakemurwa na ba nyir’amakarita bazayabika nk’uko babika amafaranga. Kwibuka Philippe umukozi muri sosiyete AC Group ishinzwe gutanga aya amakarita, avuga ko nyir’ikarita asabwa gufata nomero zayo ziriho ndetse n’iza telefoni haba ikibazo agahita ahamagara akimenyekanisha nabo bagahita bayihagarika.

Inyungu kuri bamwe igihombo ku bandi

Abahamagaraga abagenzi bamwe muri bo ubu ngo babuze akazi ariko abandi ngo iyi sosiyete yabahaye akazi ko kuyifasha kumenyekanisha ubu buryo bushya bwo kwishyura ingendo. Ubu buryo bushya bwitezwe ko buzafasha amasosiyete atwara abagenzi kubasha kubona amafaranga yose yishyuwe. Ku urundi ruhande, buzatuma igihugu cyinjiza amafaranga ava mu misoro kuko hakoreshwa iyi karita biragoye ko umusoro wanyerezwa.

Ku ruhande rw’umugenzi naho inyungu ni nyinshi. Uwatinzwaga n’uko habuze ayo kugarurirwa, ntibizongera kubaho. Abagenzi kandi bazajya babasha gupangira ingendo zabo, ku buryo umuntu ashobora kubika amafaranga y’ingendo akora mu kwezi akayabika kuri iyo karita. Gusa ngo abakatuzaga bo bizabagora kuko iyi karita itagabanya nk’uko bitangazwa na Kwibuka Philippe.
Uretse ko abantu bataramenyera ubu buryo bwo kwishyura, ariko ngo bumaze imyaka 2 bugeragezwa. Gahunda ni uko mu mujyi izi karita ari zo zigomba gukoreshwa mu kwishyura ingendo.

Gusa nanone ngo kuba abakonvayeri batakibaho bivunisha umushoferi. Usanga atwaye anafasha uwinjiranye umutwaro ndetse anareba ko buri wese yakojeje iyo karita ku mashini ari nako agerageza kugenda ateze amatwi yumva umuhagarika ageze ku cyapa.

Mu kwezi kwa gatanu 2016 ubwo umuyobozi w’umujyi wa Kigali yagiranaga ikiganiro n’itangazamakuru, yavuze ko uburyo bwo gutwara abantu mu mujyi bugomba kuvugururwa kugira ngo burusheho kunogera abagenzi. Ku mujyi rero ngo iyi n’indi ntambwe itewe mu konoza ingendo, hakoreshwa uburyo bugezweho “Smart transport”.

Musonera Sosthène


Tanga igitecyerezo

Who are you?

4 Comments

Kotaniro - July 2016

Amaherezo n’ibindi bizajya mu buryo erega, abantu bazagenda bamenyera. Ni ngombwa ariko kongera ahagurirwa ayo makarita n’uburyo bwo kongeraho amafaranga.

jacques Munyaneza - July 2016

Positive story. Burya ibijya mbere tujye tubyemera kandi gusirimuka birahenda.

Philbert - July 2016

Ikindi, buriya na ba chauffeur bagomba guhindura imyumvire. Kuko shoferi wamenyereye guhagarara ku cyapa mpaka yujuje azi ngo bagenzi be barahamagara agomba kumenya ko byahindutse. Umuntu aba yinjiye yamaze kwishyura aye nta mpamvu yo gutinda kucyapa. mbese RURA izabahe n’iminota batagomba kurenza.

Gasirabo - July 2016

Burya iterambere ni ryiza. N’ibindi tuzabimenyera. gusa byo hari abakomvayeri bagiraga umwanda bakagenda bahenera rubanda inzira yose cyangwa bavuga ibigambo basakuza na ba shofer ntawe ukeneye kubyumva. Gusa ni ugukurikirana bagahabwa akazi n’ayo masosiyete kuko umuntu wamenyereye kwirirwa akirigita amafaranga iyo ayabuze aba igisambo kibi.