Yashyizweho kuri 23 October, 2017 | 10:14

Katabagemu : Imbuto y’ibigori ihenze iratinza ihinga

Guhenda kw’ imbuto y’ ibigori biratuma abahinzi bo mu Murenge wa Katabagemu, mu Karere ka Nyagatare mu Ntara y’ Iburasirazuba batitabira ubuhinzi. Ibi ni byatangajwe na bamwe mu baturage batuye muri uyu Murenge nyuma y’ uko bamaze amezi abiri bahinze, bakaba batarabona imbuto yo guhinga kugeza amagingo aya.

Iki kibazo ahanini ngo giterwa ni uko umucuruzi ugurisha inyongera musaruro aha imbuto y’ ibigori abifite, hanyuma nabo bakazibika, bakazigurisha abahinzi ku giciro kiri hejuru kandi bari muri nkunganire. Iyi ni gahunda ya Leta ifasha abahinzi kubona inyongeramusaruro bishyuye amafaranga make ku buryo ibatangira 40% y’ikiguzi nabo bakiyishyurira 60% asigaye.

Umuhinzi witwa Munyazikwiye Jean Claude agaragaza uburyo bahendwa ati « Agafuka k’ ibiro bibiri k’imbuto y’ ibigori (2kg) tukagura amafaranga igihumbi na maganatanu (1500 frw) kandi kagenewe amafaranga maganatanu (500frw) muri nkunganire ya Leta mu gihe agafuka k’ ibiro makumyabiri na bine (24 kg) kagura hagati y’ amafaranga ibihumbi cumi na bitanu(15000frw) n’ ibihumbi cumi n’ umunane (18000 frs) kandi kagura ibihumbi cumi na bibiri gusa (12000frw).
Aba bahinzi bemeza ko kubona imbuto y’ ibigori bikigoranye kubera bahendwa n’ababa baraguze imbuto bakayibika mu mazu yabo. Umuhinzi witwa Semana Simon ati « Njyewe ndi kuri lisiti ya twigire muhinzi (lisiti abahinzi biyandikishaho ku rwego rw’ umudugudu bagaragaza ubuso bazahingaho kugira ngo bahabwe inyongeramusaruro). Nahinze uko mbyumva nkoresha ibyo niyejereje. Kubera ko turi benshi kandi dutunzwe n’ubuhinzi, guhenda kw’imbuto bidutera inkeke bigatuma duhinga uko twiboneye».

Imbuto y’ ibigori iza mu Murenge ni nkeya

Si uguhenda gusa, aba baturage bahamya ko imbuto y’ ibigori bya kijyambere iza muri uwo Murenge wose ari nke. Ibi rero bituma bajya gushakira mu yindi Mirenge baturanye. Nkurunziza Samson umuhinzi b’ibigori avuga ko we ifumbire yagiye kuyishaka mu Murenge wa Matimba aho yakoze urugendo rurerure nabwo ntiyayibona. Yagize ati « Nagiye kugura ifumbire ahandi. Ngereranije nakoze urugendo rw ‘ ibirometero nka 7 usibye ko ntaniyo nabonye. Ubwo rero urumva ko dukeneye ubuvugizi ». Akomeza asaba ko Umurenge wabongerera inyongeramusaruro iza muri ako gace bahingamo ibigori.

Aba bahinzi bakomeza gushimangira ko imbuto y’ ibigori ibona umugabo igasiba undi. Abifite bayibika mu nzu zabo nabo bagahenda abahinzi. Mutabazi Bernard ati” Ubundi nateganyaga guhinga ubuso bungana na hekitare ebyiri (2 ha), ntegereza ko nabona ibigori ndaheba. Nahisemo kugura imbuto mpenzwe. Nari kuzishyura ibihumbi cumi na bibiri(12000 frw )ku gafuka k’ ibiro makumyabiri na bine (24 kgs )ariko nishyuye amafaranga ibihumbi makumyabiri na bine (24000 frw). Turasaba Leta ubuvugizi kuko birarambiranye.”

Nyamara ubuyobozi bw’ uyu Murenge buvuga ko buzi akababaro k’ abaturage. Ngo iperereza bamaze iminsi bakora ryagaragaje ko abaturage batabeshye ingano z’ ubuso bazahingaho ko ahubwo umucuruzi w’ inyongeramusaruro ari we wakoze amakosa agatanga imbuto y’ ibigori mu buryo bunyuranyije n’amategeko. Etienne Nizeyimana ushinzwe ubuhinzi muri uwo Murenge ati” Nibyo koko imbuto zatanzwe nabi. Kandi mu karere kacu ka Nyagatare abaturage bacu nibo babonye imbuto nyinshi ugereranije no mu yindi Mirenge kuko baduhaye toni 30. Ubu rero, uriya mucuruzi agomba guhagarikwa kandi tukongera abandi bacuruza inyongeramusaruro.” Akomeza avuga ko Umurenge wakoze ubuvugizi ku Karere kugirango inyongeramusaruro zongerwe.

Nk ‘ uko urubuga (web site) rw’ Akarere ka Nyagatare rubigaragaza, ubuso bw’ubutaka buhujwe buteganywa guhingwaho ibihingwa byatoranyijwe muri iki gihembwe cy’ihinga A bungana na hegitari 36,550 buzahingwaho ibigori kuri ha 22,260, ibishyimbo kuri ha 11,500, umuceri kuri ha 2,250 na soya kuri ha 200 naho ubutaka buhingwaho muri rusange bukaba bungana na ha 82,000.

Munyaneza Emmanuel


Tanga igitecyerezo

Who are you?