Yashyizweho kuri 13 March, 2017 | 11:16

Inzego zitagerwaho n’umugenzuzi mukuru w’Imari ya leta ziranyereza umutungo

Raporo y’umuryango mpuzamahanga urwanya ruswa n’akarengane (TI_Rw) iragaragaza ko mu nzego z’ibanze n’izitagenerwa ingengo y’imari, kunyereza umutungo biri hejuru. TI_Rw irasaba ibihano bikarishye ku bagize ingeso kunyereza umutungo.

40% by’amafaranga afitanye isano na VUP yaranyerejwe, aya kandi yiyongeraho asaga miliyari 2.3 yaburiwe irengero mu bikorwa byo kwishyura abakozi ba baringa mu nzego za leta zitagenerwa ingengo y’Imari.Amafaranga ya leta asaga miliyari 222 na miliyoni ebyiri yakoreshejwe mu buryo butagaragaza icyo yakoreshejwe kuko ntaho byanditse mu bitabo bya leta mu mwaka w’ingengo y’imari 2014/2015 avuye kuri miliyari zisaga102 muri 2013/2014.

Ubwo Umuryango Mpuzamahanga urwanya akarengane na ruswa(Transparency International Rwanda-TI-Rw) washyiraga ahabona raporo yakoze kuri raporo y’umugenzuzi w’Imari n’Umutungo bya Leta, ku wa Gatatu tariki ya 7 Werurwe 2017 yasabye ko amakosa yagiye akorwa yakwirindwa, hagashyirwaho uburyo bwo gucunga neza umutungo wa leta, kandi abanyereza umutungo wa leta bagahanwa ndetse bakawuryozwa.

Inzego zitagenerwa ingengo y’imari zisesagura amafaranga

Umuyobozi wa TI-Rw Ingabire Marie Immaculée asanga hakwiye gufatwa ingamba kugira ngo amafaranga ya leta akoreshwa ku nzego zo hasi akwiye kujya agenzurwa uburyo akoreshwa. Ati “Urabizi ko amafaranga menshi yamanutse ari gukorera ku nzego zo hasi, ariko ntabwo umugenzuzi agenda ngo ajye ku murenge kandi noneho hajya amafaranga menshi, bikaza gutuma rimwe na rimwe utamenya neza ngo ikibazo cyabereye hehe, rimwe na rimwe utanamenya neza icyo kibazo cyabaye uko giteye, kirakomoka ku batabasha kugira inyandiko zisobanura ibyakozwe, abatanze amasoko nabi, kugirango ubashe gukurikirana ibyo uri bukore.”

Ingabire yakomeje avuga ko hagomba gukorwa ibishoboka byose, ukoresha nabi amafaranga ya leta agakurikiranwa. Ati “Niba ari amafaranga yaburiye ku muntu agomba kuyasubiza ndetse akanabiryozwa, ni icyo twe cyane cyane dushaka kugira ngo aho ibintu byapfiriye hajye hagaragara neza, kandi uwabigizemo uruhare , niba bigaragara abiryozwe ndetse n’ayo mafaranga agaruzwe.”

Ku ruhande rwa leta, Umunyamabanga uhoraho muri Minisiteri y’Ubutegetsi bw’Igihugu, Odette Uwamariya yatangaje ko itazigera yihanganira abayobozi banyereza ibigenewe abaturage, yemeza ko ndetse hari abamaze kwirukanwa kubera ibyo byaha. Ati “Icyo twabonye ni uko hagikenwe imbaraga mu kongera ubushobozi bw’inzego z’ibanze cyane cyane izitagenerwa ingengo y’imari ya leta (Non Budget Agencies,) ibitaro amashuri…, ikigaragara ni uko hagiye hagaragara ko harimo ikibazo.”

Ibibazo byagiye bigaragara ariko ngo bigenda bifatirwa ingamba, nubwo hakiri imyanya idafite abakozi bafite ubushobozi mu guhangana n’ibyo bibazo.
Zimwe muri izo ngamba ni abagenzuzi bo mu nzego za leta bagenzura uburyo imari n’umutungo bya leta bikoreshwa, byaba ngombwa bagatanga inama mbere yuko umugenzuzi mukuru w’imari n’umutungo wa leta agenzura inzego n’ibigo bya leta.
Mu ntara zose kandi hamaze gukorwa icyiswe ‘peer review mechanism, aho abagenzuzi guhera mu ntara n’ab’uturere bose bahuriza hamwe bakajya mu karere kamwe mu rwego rwo kugenzura buri kintu cyose, bareba ahakiri imbaraga nke mu gucunga umutungo wa leta.

Uwamariya avuga ko ibyinshi mu bibazo bahura nabyo usanga bidashingiye ku mutungo wanyerejwe, ahubwo ari uko uwo mutungo wandikwa mu bitabo n’uko ukoreshwa. Ati “Ni cyo kintu dukeneye gushyiramo imbaraga mu buryo bw’ubunyamwuga mu micungire y’imari.”

Ibindi byakozwe birimo ko Minaloc ifatanyije na Minisiteri y’Imari n’Igenamigambi( Minecofin) hashyizweho uburyo (System) y’uko urwego rw’umurenge narwo rwaba uruhabwa ingengo y’imari, hakaba software izakoreshwa, kugira ngo buri kintu cyose kijye gikorwa mu buryo bukwiye, ku buryo igikozwe nabi kijye kigaragara.

Kwirukana abanyamakosa

Ku bijyanye n’amafaranga agenewe gahunda zigamije kuvana abaturage mu bukene yagiye acungwa nabi, Uwamariya yakuriye inzira ku murima abagifite agatima kareharehera kwiba ibyagenewe abo baturage.Ati “Ingamba zikomeye turimo gushyiraho ni izo gukurikirana, tukabwira abantu yuko ayo mafaranga aba aje gufasha umuturage ngo ave munsi y’umurongo w’ubukene no kudufasha ngo rya terambere twifuza nk’igihugu rigerweho. Ikintu cyo kwirinda kuyakoresha nabi cyangwa se kuyanyereza ni ikintu twashyizemo imbaraga tumaze iminsi tuvugurura inzego z’ibanze. “Ntabwo tuzajya tuzuyaza ahazagaragara ko umuntu yagize uruhare mu kunyereza amafaranga agenewe umuturage. Hari abayobozi benshi bamaze gukurwa mu myanya yabo ku bw’izo mpamvu.”

Harimo kandi kubakwa uburyo buzajya bwerekana uko ayo mafaranga akoreshwa, bugenzura niba umuturage agenewe amugeraho koko. Ati “Turimo rero gutekereza uburyo bwo kwifashisha ikoranabuhanga ariko tugashyira n’imbaraga mu buryo bwo guhana no gutuma ayo mafaranga yanyerejwe agaruzwa.”

Ku ruhande rw’ibiro by’umugenzuzi mukuru w’imari n’umutungo wa leta, nabo ngo ntibicecekeye, nkuko byagaragajwe n’Umujyanama w’urwo rwego Gasangwa Ezra, wagaragaje ko umwaka ushize bakoze ubwo bugenzuzi mu bigo 18 bitagenerwa ingengo y’imari ya leta, birimo ibitaro by’akarere, ndetse uyu mwaka bakaba bateganga kuzagenzura ibitaro byose by’akarere byo mu Rwanda. Urwo rwego rukaba rutangaza ko nirukomeza kubona amikoro ruzarushaho gukora aka kazi mu bigo byinshi bitagenerwa iyo ngengo.

Ntakirutimana Deus


Tanga igitecyerezo

Who are you?