Yashyizweho kuri 14 March, 2018 | 21:01

Atunzwe n’umwuga yanengaga!

Nyiratabaro Francine w’imyaka 30, afite impamyabumenyi y’amashuri yisumbuye mu ishami ry’ubunyamabanga. Nyuma yo kurangiza amashuri ye, yashakije akazi gahemba buri kwezi mu gihe cy’imwaka itano, ariko ntiyakabona, bityo ahungira mu bucuruzi butemewe (abazunguzayi), gukora mu tubari no mu budozi, akazi yanengaga cyane, yiyumvisha ko atagakora!

Iyo avuga amateka y’imibereho ye, abanza kumwenyura, yibuka aho yavuye n’aho ageze yiteza imbere! Nyiratabaro Francine ukomoka mu karere ka Rusizi, atuye mu mujyi wa Kigali mu murenge wa Kimisagara mu karere ka Nyarugenge, araburira buri wese gukunda imyuga, kuko ityanga imibereho!

Akiri umunyeshuri, ntiyigeze yiyumvisha ko yakora akazi k’ubudozi, cyangwa ako mu kabare. Ariko yatangajwe no kubona amaze imyaka itanu yarakabuzei. Mu buzima bugoye aba kwa mukuru we, yabanje gushaka uko yakora ubucuruzi butemewe (ubuzunguzayi) ariko biramunanira. Niho yigiriye inama yo gukora akazi ko mu tubari, naho biramunanira kubera akazi kenshi kaba mo, kandi ahembwa amafaranga make. Ati,″Mu by’ukuri za j’ai l’ honneur (soma jeloneri) zari zarandambiye. Nirutse inshuro nyinshi ku kazi ariko nza kubona ko, ako ntekereza kubona nk’ umuntu wize, ntashobora kukabona. Uwabuze uko agira, ngo agwaneza! Ni uko ubuzima byagiye bunyereka ikinyuranyo ku byo nifuizaga.”

Nyuma yo kunanirwa akazi ko mu tubare, Nyiratabaro Francine yibwiye mu mutima we ko atsinzwe, ko azategereza icyo Rurema azamugenera, ati ”Nakoze mu tubari dutandukanye mbonye byanze mpitamo kwicara ngatuza ubundi ngategereza icyo Imana izantegeka.” Nyuma yuko ubushomeri bumumereye nabi, atagifite urwara rwo kwishima, yasubije ubwenge ku gihe, atega amatwi ibyo Leta ikangurira urubyiruko gukora, bityo yegera mukuru we ukora umwuga w’ubudozi, amugira inama.

Yabanje kunangira umuti we, ariko ageza aho, anesha amarangamutima, asanga asingaranye amahirwe yo kumenya kudodo nka mukuru we utunzwe n’abwo, kandi n’urugo rwe rukaba rukomeye, ati ″Nyuma yaho, namenye ko ibyo natekerezaga kwari ukwibeshya “.

Imashini idoda yabanje kumutonda, ariko ashyira ho umwete, amaherezo arayikaraga, amenya no kudoda imyenda itandukanye.

Icyemezo cyo kwiga kudoda cyabaye inyamibwa kuri we

Mu gihe gito Nyiratabaro Francine yamenye kudoda ndetse moreri nyinshi kandi neza, afatanyije na mukuru we. Nyuma yahoo, yasanze agomba kwiga ubudozi kinyamwuga kugirango azabone n’impamyabushobozi. Ikigo cy’igihugu cy’ubumenyingiro (WDA) cyaramuhuguye, akaba yarashoboye no kubona iyo mpamyabushobozi.

Kuva ubwo, yatangiye kwikorera adoda imyenda y’abagore i Nyabugogo. Yaje kugirirwa icyizere na bagenzi be bakorana, bamutorera kuba umuyobozi w’ikimina, aho buri munyamuryango atanga amafaranga ibihumbi bibiri ku munsi (2000 FRW). Francine avuga ko byarushijeho kumwongerera imbaraga no kurushaho gukunda umwuga w’ubudozi, ati ”Kuri ubu mu nama yacu uwatomboye ahabwa amafaranga ibihumbi ijana kandi biba buri munsi“. Mu budozi akora, uyu mugore yemeza ko ku munsi ashobora gukorera ibihumbi bine, bibiri muri byo akabitanga mu nama, andi agatunga urugo rwe. Avuga ko asigaye atayamarira mu guhahira urugo (umugabo bashakanye yaramutaye) kuko biterwa n’igihe : niba yarahahiye ukwezi cyangwa se niba ahaha umunsi k’ uwundi, bitewe n’amikoro afite. Icyo gihe amafaranga asigaye kuyo yatanze ku nama ayashyira kuri banki k’uburyo iyo akazi kameze neza ashobora kwizigamira ibihumbi ijana buri kwezi.

Nyiratabaro Francine yegeye ikigo cy’ igihugu cy’ iterambere RDB cyamwigishije gukora imishinga ibyara inyungu, kinamufasha gushinga ikigo cy’ubucuruzi cyitwa HANGIRWA COMPANY Ltd. Afite icyemezo cy’ ubucuruzi, ndetse ubu, yamaze no gukora umushinga wanditse wo kwagura ubudozi bwe. Mu minsi ya vuba, azashyikiriza banki uwo mushinga, nayo imuhe inguzanyo hisunzwe BDF ifasha urubyiruko n’abagore gukora imishinga ibyara inyungu no kubona inguzanyo muri banki.

Yishimira intambwe amaze kugeraho

Nyiratabaro Francine yishimira intambwe amaze kugeraho, harimo kuba abasha kwiyishyurira inzu atuyemo, gutunga umuryango we ndetse no kurihira umwana we kuri ubu wiga mu ishuri y’incuke. Uretse ibyo kandi, avuga ko bagenzi be bamushimira intambwe bamaze kwigezaho babikisheje ikimina cyabo n’uburyo akiyobora ngo k’uburyo hari n’imiryango imutumira mu rugo mu rwego rwo kumushimira ibyiza bamaze kugeraho kubera inama ze .

Mu nama atanga, Nyiratabaro Francine asaba abagore bose cyane cyane abakobwa bakiri bato, gukunda imyuga kandi bakarushaho kwigirira icyizere no gukora cyane, ati, ”Nakuze ntatekereza ko nshobora kwiga imyuga, ariko iyo mbonye intambwe kwiga imyuga bimaze kungezaho numva n’umwana wanjye aziga imwuga. Niyo yakwiga ibindi, ariko uko byagenda kose, agomba gukura hari umwuga azi”.

Umuhire Valentin


Tanga igitecyerezo

Who are you?