Yashyizweho kuri 22 September, 2017 | 13:01

Ikarita y’ubwisungane mu kwivuza yakereje abarema isoko rya Nyamirambo

Abacuruzi n’ abaguzi barema isoko rya Nyamirambo riherereye mu murenge wa rwezamenyo babujijwe kuryinjiramo. Ibi byakozwe n’ ubuyobozi bw’ Umurenge kubera ko ngo batitwaje amakarita y’ ubwisungane mu kwivuza (mutuelle de santé).

Kuri uyu wa Gatanu ku itariki ya 22 Nzeri, isoko rya Nyamirambo ryari rifunze kugeza mu ma saa mbiri ya mu gitondo. Abantu bari benshi. Abacuruzi n’ abaguzi bitotombaga kubera iki cyemezo cyo kuba bafungiwe isoko ngo nta bwisungane mu kwivuza bitwaje kandi bari batabizi. Nyuma y’umwanya w’igihirahiro bakomorewe ngo bakomeze imirimo yabo ariko hari abarambiwe barataha ari nayo mpamvu ahacururizwa imyenda nta muntu wari uhari. Abantu bari bake ugereranije nuko iryo soko ryitabirwa. Umucuruzi w’ imbuto uricururizamo ati” Njyewe nageze hano mu gitondo kare nje gucuruza nk’ ibisanzwe. Hanyuma nsanga inkeragutabara n’ umuyobozi w’ Akagari ka Rwezamenyo bavuga ko nta muntu n’ umwe wemerewe kwinjiramo atitwaje ubwisungane mu kwivuza. Natunguwe kuko njyewe sinari mbizi kuko mutuelle ntaho ihuriye no kutajya guhahira abana.”

Habimana James, ucuruza inkweto yungamo ati” Ndababaye kandi ibi bintu birambangamiye. Ubu se ko isoko rihahiramo abantu benshi ubu nk’ umunyamahanga bizagenda gute? Gusa ni ukuduteza ibihombo gusa. Ubwo rero ngo umuntu yasora, ubwo se wayakura he n’ ibi bibazo biza bitunguranye? Ubu se ko ngeza saa mbiri maze gucuruza nk’ ibihumbi makumyabiri (20 000 Frw) ubu si ukuntesha umutwe? “ Akomeza avuga ko ubuyobozi bwareba izindi ngamba bwakoresha atari ugufatira abantu bitunguranye mu buryo bwo kwirwanaho.

Ubwisungane mu kwivuza ntaho buhuriye no gufunga isoko

Aba baturage bemeza ko isoko ritunze abaturage benshi bo mu mu Murenge wa Rwezamenyo n’ indi Mirenge bihanye imbibi. Umunsi wose ntabwo isoko ryafungwa. Abantu ntibabona icyo kurya cyane ko ngo I Kigali batunzwe no kurya umuntu avuye ku isoko. Amina akomeza avuga ko” Bagashatse ubundi buryo bakangurira abantu kwitabira ubwisungane mu kwivuza. Gufunga isoko nk’iri riremwa n’ abantu benshi ntabwo ari igitekerezo cyiza. Ni ukubangamira uburenganzira bwacu."

Ikindi kandi aba baturage bagarukaho ni impamvu yo kutitabira cyane ubwisungane mu kwivuza. Barasaba ko ubuyobozi bwahagarika gahunda yo gutangira umuryango wose icya rimwe. Ko ahubwo umuntu yazajya atanga ayo abonye. Niba ari umuryango w’abantu batanu,agatanga ibihumbi bitandatu bya babiri niba yayabonye. Hanyuma agatanga ubutaha ibihumbi icyenda bitandukanye no gutanga yose icyarimwe. Ngo ibibazo aba ari byinshi. Kubonera amafaranga rimwe ntibikunda ku miryango itifashije.

"Noneho aka mituweli karashobotse”

Ubuyobozi buvuga ko butazahagarara ko ahubwo burakomeza iyi gahunda kuko ngo no ku wa mbere bazazinduka bareba uwinjira adafite iyi karita.

Ubwo umuyobozi w’ Akarere ka Nyarugenge yari mu nama y’ ubuyozi n’ abafatanyabikorwa b’Akarere kuri gahunda y’ ubwisungane mu kwivuza kuwa 12 Nzeri 2017, Madamu Kayisiime Nzaramba yasabye abitabiriye iyo nama gukangurira abaturage kugira umuco wo kwita ku buzima bwabo bitabira kwishyura ubwisungane mu kwivuza. Ibi ngo bizatuma bahorana ubuzima buzira umuze bizabafasha gukora bakiteza imbere bakava mu murongo w’ubakene. Yavuze ko ubwisungane mu kwivuze bitagerwaho nk’uko byakagombye ariko yongeraho ko akarere n’abafatanyabikorwa nibahagurukira hamwe bagafatanya bazahashya inzitizi zigaragara mu kwishyura ubu bwisungane mu kwivuza. Ati “Noneho aka mituweli karashobotse” Ubwo yavugaga ko bagiye gukora uko bishoboka kose n’abasigaye batarishyura ubwisungane mu kwivuza bikishyura.

Munyaneza Emmanuel


Tanga igitecyerezo

Who are you?