Yashyizweho kuri 5 April, 2016 | 11:17

Igiceri program: Nyuma y’abakuru hatahiwe abana

Mu gihe hizihizwaga umunsi w’abagore ku nshuro ya 42 mu murenge wa Nduba mu karere ka Gasabo, Mukagasana Gaudence wakusanyije amafaranga asaga miliyoni 16 mu baturage muri gahunda yiswe IGICERI PROGRAM, afite umugambi muremure. Ubu ngo agomba no kuyigeza mu bana bagatangira kubikira ejo habo hazaza.

Gahunda IGICERI PROGRAM yatangiriye mu murenge wa Nduba mu karere ka Gasabo mu Ugushyingo kwa 2014, igamije gukangurira abaturage kwizigamira igiceri cy’amafaranga 100 buri munsi. Ni gahunda yitabiriwe n’abagore cyane, ariko n’abagabo ntibasigaye. Ikorwa hifashishijwe udusanduku tuba mu midugudu yose, aho buri mugoroba Umukangurabukungu agera kuri buri rugo rumuha icyo giceri.

Iyo amafaranga amaze kugera ku bihumbi icumi, ajyana agasanduku ku Murenge SACCO bakagafungura bakayakuramo bayashyira kuri Konti. Mu mezi 15 gusa imaze, Umukangurabukungu w’umudugudu wa Kanani, Mukagasana Gaudence amaze gukusanya amfaranga angana na miliyoni cumi n’esheshatu , ibihumbi Magana atandatu na mirongo itatu na bitanu, n’amafaranga Magana ane na mirongo icyenda n’atanu( 16.635.495). Niwe wa mbere mu bakangurabukungu 45 bari mu midugudu 45 igize umurenge wa Nduba.

Uyu mugore wabaye indashyikirwa, yaje kubihemberwa na Nyakubahwa Perezida wa Repubulika, wamuhaye inka. Igitangaje kandi muri iyi gahunda, ni uko abagore barusha ubwitabire abagabo, nk’uko uyu mukangurabukungu abisobanura. Agira ati “abagore bitabiriye Igiceri Program ni 96 naho abagabo ni 75 gusa mu mudugudu wa Kanani. Mu kagari ka Butare tubarizwamo, abagore bamaze kuba 837 ku bagabo 438”.
Ibanga rye ” ntaho ajya asize agasanduku ke”

Ibanga rya Mukagasana nta rindi usibye ubukorerabushake bumurimo, butuma nta na hamwe ajya asize ako gasanduku. Ati”sinjya ngasiga na rimwe: haba mu muganda rusange cyangwa inama y’abaturage bose mba ndi nako, najya mu mugoroba w’ababyeyi nkagatwara. Akarusho ni uko mba mu bimina byinshi, kandi iyo mbigiyemo ngenda nkitwaje, nkigisha nkakusanya amafaranga”.

Kuba abagore basumbya abagabo, ngo biterwa n’uko aribo bahaha bagasagura, ariko kandi ngo ninabo basangwa mu rugo iyo agasanduku gatambuka, kuko ngo abagabo baba bagiye gutembera ntikahabasange. Kuri Mukagasana Gaudence, ngo umugoroba w’ababyeyi witabirwa cyane n’abagore, kandi niho bakunze guherwa inyigisho zo kuzigama, bumvishwa uburyo bibateza imbere.

Ubu uyu Mutima w’urugo afite umugambi wo gukangurira ababyeyi gutanga igiceri cya 100 buri munsi bazigamira abana babo ejo hazaza. Ati “ubu tumaze gukemura ikibazo cya mituweri dukoresheje igiceri, ndashaka gukangurira ababyeyi kuzigamira amashuri y’abana hakiri kare, bareke kujya bashyuha imitwe igihe umwana yatsinze agiye mu mashuri yisumbuye. Amafaranga ijana nta cyuho atera mu rugo, nk’uko tuyatura mu nsengero cyangwa tukayafashisha abasabiriza ku muhanda, ntako bisa kuyazigamira umwana”.

Gahunda yo kuzigama igiceri cya 100 buri munsi yatangiye mu Ugushyingo 2014 itangijwe n’abaurage ba Nduba, iza gusakazwa mu karere ka Gasabo ku bukangurambaga bwa Meya Rwamurangwa Steven, aho uyu mugore Mukagasana yifashishijwe mu guhugura abaturage b’imirenge ya Ndera na Rutunga. Magingo aya, mu karere ka Gasabo iyi gaahunda imaze gukusanya miliyoni zisaga 108. Umucungamutungo wa SACCO KOZIGUNDU ya Nduba, Musengimana Frederic avuga ko umurenge wa Nduba wonyine wihariyemo 68.450.280, akagari ka Butare gafite 24.117.515, naho umudugudu wa Kanani( ubarizwa muri Butare) ufitemo 16.635.495 yose. Intambwe ishimishije yatewe n’abagore ba Nduba mu kwizigama, yanashimangiwe na Minisitiri w’uburinganire no guteza imbere umuryango, Oda Gasinzigwa, aho yanagarutse ku bushakashatsi bwa FINSCO bwagaragaje ko abagore 63% bamaze gusobanukirwa n’ibyiza byo gukorana n’ibigo by’imari bakabigana.

Karegeya Jean Baptiste


Tanga igitecyerezo

Who are you?