Yashyizweho kuri 22 July, 2016 | 10:04

Huye: Abafite inzu mu Cyarabu barisabira kwimurwa

Hashize imyaka ine, abafite amazu y’ubucuruzi mu Cyarabu basabwe kuyavugurura akajyana n’icyerekezo cy’umujyi wa Huye. Bamwe baravuguruye abandi nta kigaragaza ko banitegura kubikora kuko inzu ziracyahari. Umuhanda uhanyura, waravuguruwe ngo harusheho kuba heza.

Ucyinjira muri aka gace kari mu mujyi wa Huye, ubona amazu yubatse ku buryo busa n’aho ari bumwe. Ubwoko bw’amazu ahari bumenyerewe nk’amakonoshi. Yose ariho ibimenyetso byerekana ko agomba kuvugururwa(Towa). Aya mazu yose arafunze imbere yayo, ahatagera imodoka hatangiye kumera ibyatsi. Uhageze ubona ko hari urujya n’uruza rw’abantu n’ imodoka zihaparitse, dore ko hari amazu azwi yo kwa Misago, Semuhungu no kwa Nasoro bo babashije kuvugurura.

Umutoni utuye muri aka gace, avuga ko bayobewe urebwa no gukura abantu muri aya matongo, mu gihe ari ho umujyi wa Huye wari uzingiye mu minsi yashize. Agira ati “abantu basabwe kuvugurura batabyiteguye. Hashize igihe aya mazu adakorerwamo kandi yakabaye yinjiriza ba nyirayo. Akarere gakwiye kumvikana n’aba baturage byaba ngombwa bagahabwa ingurane bakimuka.” Abenshi mu bataravugurura ni abarabu. Babitewe n’uko ngo gufata icyemezo nk’umuryango byanze, dore ko abahafite ubu urebye ari nk’abuzukuruza b’abubatse aya mazu. Uku ni nako akarere gasobanura impamvu aba barabu batubahirije icyemezo cyako.
Umwe mu bahafite inzu uri no kuvugurura, kuri we ngo ni ubushake bwabuze kuko iyo babishaka bari kunyura mu nzira zose bakabona amafaranga abafasha kubikora. Yibanda ku ruhare rwa ba nyir’amazu, agira ati “abasaba kwimurwa ni abatazi agaciro k’ubutaka bwawe. Ubundi twagize amahirwe ntitwahimurwa ahubwo duhabwa uburenganzira bwo kuhakorera.” Yungamo ati “urebye neza aya mazu ni iy’abantu b’abarabu baje gutura hano cyera none bakaba bari kwinangira.”

Amahirwe kuri ba nyir’ubutaka

Ahagiye himurwa abantu ku bw’inyungu rusange, nko mu Kiyovu mu karere ka Nyarugenge, banenze ko batahawe amahirwe yo gukoresha ubutaka bwabo, ngo babwubakeho ibyifuzwaga ahubwo bagahabwa amafaranga. Kuri bo ngo uburenganzira bwabo bwarabangamiwe. Gusa abaturage bamwe bo mu Cyarabu babibona mu buryo bibiri. Gashonga Martin umuturage w’i Huye, avuga ko abaturage bo mu Cyarabu bakwiye gushaka amafaranga bakivugururira ubwabo.
Itegeko ntacyo riteganya ku buryo aba baturage babyitwaramo, cyangwa icyo bafashwa cyane ko byahombeje ba nyir’amazu ndetse na Leta kuko kuri ubu nta misoro batanga. Gusa ubuyobozi bw’akarere bwo bwitsa ku kuvuga ko abatabashije kubahiriza icyemezo cy’ubuyobozi bagurisha n’abashoboye gukora ibiteganywa. Ubuyobozi busanga iki ari cyo kibazo cyo guha abaturage uburenganzira bwo kubaka ibyifuzwa mu cyerekezo cy’akarere, nyuma ugasanga ntibabishyize mu bikorwa bikadindiza iterambere ryako.

Umuyobozi w’akarere Kayiranga Muzuka Eugene, avuga ko kuvugurura aha hantu biri mu byihutirwa ku buryo bizazana ibisubizo igihe bizaba birangiye. Agira ati “biragaragara koko ko hari ababuze ubushobozi ariko hari n’abatarabubuze ahubwo badaha agaciro iki gikorwa.” Uyu muyobozi akomeza avuga ko byashobokaga ko akarere kahaha ababashije kuhubaka, ariko ko kubera ko bifuzaga ko abanyahuye abagira uruhare mu iterambere ry’umujyi wabo, ari yo mpamvu batabikoze gutyo. Ati “ubu turi kuganira n’abagize imbogamizi kandi batubwira ko bagiye gutangira kuko bamaze kumvikana n’uzabubakira.”

Ugendeye ku cyerekezo cy’umujyi wa Huye, inzu zifuzwa aha ni izifite kuva ku nzu nibura 2 kuzamura. Aha akaba ari ho abahafite aya mazu yo kuvugurura bahera bavuga ko icyo n’ubundi akarere kashakaga ari ukubimura. Kaneza utuye mu Cyarabu avuga ko hari n’abantu bashatse guhangana n’akarere. Agira ati “ziriya nzu zisa n’aho ari iz’abantu bamwe bananiwe kumvikana ubwabo mu miryango yabo ndetse bashaka no guhangana n’akarere.”

Mu Cyarabu ni agace katuwe n’abarabu kuva mu gihe cy’umwaduko w’abazungu, ari naho havuye iri zina rya Cyarabu. Aba barabu nibo bahanze aka gace bakagira ak’ubucuruzi dore ko aba bazaga baje gucuruza. Baje kuhafata ubutaka bunini babwubakamo inzu zari zigezweho icyo gihe, dore ko izisabirwa kuvugururwa, zubatswe mu myaka ijana ishize.

Musonera Sosthѐne


Tanga igitecyerezo

Who are you?