Yashyizweho kuri 21 July, 2016 | 11:27

Gasabo: Bamaze umwaka bategereje kwimuka kubera iyubakwa ry’umuhanda

Kuva mu mwaka wa 2013 havuzwe umushinga w’umuhanda uva Nyacyonga ukanyura mu gice cy’inganda ahazwi nka “Free Economic Zone” unyuze mu mirenge myinshi y’akarere ka Gasabo. Muri 2015 abaturage batangiye kubarirwa ibikorwa byabo. Bibwiraga ko bazimurwa vuba ariko siko byagenze. Abari baranze kugira icyo bitegura kwimurwa barinubira ko bateshejwe igihe bikabadindiza.

Mu murenge wa Bumbogo, uwa Kinyinya, Kimironko, Ndera n’indi hateganijwe kunyura umuhanda uzagera mu gice cy’inganda (Free Economic Zone). Kubera uyu muhanda ugomba kunyuramo, abaturage barifashe mu gukora ibikorwa bibateza imbere ngo bategereje kwimurwa. Uku kwifata ngo babitewe n’uko ntawigeze ababwira ko igikorwa cyasubitswe, mu gihe abandi bo bahisemo kwikomereza imirimo yabo nk’uko bisanzwe kuko babonye bitinze. Cyakora nubwo bavuga ko babaruriwe imitungo ntabwo bigeze babisinyira.

Umwe mu bayobozi b’umudugudu ufite abantu babariwe, avuga ko na bo nk’abayobozi nta makuru na make bafite kuri uyu mushinga uretse ay’uko hari abagomba kwimurwa. Kuri we ngo ibikorwa by’abaturage bikwiye gukomeza. Agira ati “nanabajije abo ku karere ka Gasabo, bambwira ko nabo nta makuru bafite. Bambwiye rwose ko uriya ari umushinga wo ku rwego rurenze akarere.” Umuturage wo mu murenge wa Kimironko, nawe wabariwe agira ati “ubu nitwubaka bizaduteranya n’abashinzwe uyu mushinga kuko n’agaciro k’ibyo babaze kazahinduka.”

Athanase N. wakomeje ibikorwa bye nk’ibisanzwe n’ubwo bari baramaze kumubarira, n’icyizere mu byo avuga, agira ati “njye ntabwo nari gutegereza ibyo ntazi igihe bizakorerwa. Amazu yanjye nari mfite gahunda yo kuyahindura, nabonye bitinda rero nikomereza ndavugurura. Ndibwira ko niba gahunda yo kutwimura igikomeje bazongera kuza tukabarana.” Yungamo avuga ko nubwo yakoze ibi bikorwa, ariko ko hari igihe runaka yataye ategereje amakuru kuri iryo yimurwa.
Serukundo utuye mu kagali ka Kinyaga, mu murenge wa Bumbogo avuga ko ibi byo kubarira abantu no kubaha ingurane biteza igihombo yaba leta ndetse n’uwimurwa. Abisobanura agira ati “ubu hashize umwaka usaga abimurwa bari kucyo nakwita inkeke. Byatumye abantu badakora uko bikwiye. Ubu bizatuma bagaruka kubara. Bakagombye kujya batangira gahunda yo kumenyesha abantu ibyo kwimurwa ari uko amafaranga bayafite cyangwa se bakajya babanza kubikorera inyigo ihagije”

"...Abaturage barabeshya..."

Kwimurwa no guhabwa ingurane, bifite itegeko ribigenga. Iryo kuwa 11/6/2015, nomero 32/2015 , ryerekeye kwimura abantu ku mpamvu z’inyungu rusange. Risobanura ko igihe cyose umuntu atarahabwa ingurane aba agifite uburenganzira ku mutungo we. Cyakora iri tegeko rivuga ko usaba kwimura abantu ku nyungu rusange agaragaza ko amafaranga y’ingurane ayafite. Ibi nibyo byatumye abenshi mu babaruriwe imitungo biyumvisha ko amafaranga yari ahari, bagahita bahagarika ibyo bakoreraga kuri ubwo ubutaka bwabo.

Reuben Ahimbisibwe, ushinzwe ibikorwa remezo mu mujyi wa Kigali avuga ko nta muntu babaruriye kuri uyu mushinga, n’ubwo atabyemeranyaho n’abaturage. Agira ati “abaturage bavuze ko babaruriwe barabeshya. Uriya muhanda ni umushinga tugishakira amafaranga kuko atari amafaranga ya leta y’u Rwanda. Azava mu baterankunga cyangwa mu bafatanyabikorwa. ”

N’ubwo ariko abaturage batasobanura ibyo amategeko ateganya, ariko babisanisha n’ibyo mu buzima busanzwe. Umwe nawe wabariwe, akurikije ibyo atekereza abisobanura agira ati “ibintu umuntu atasinyiye ntibikwiye guhabwa agaciro. Igihe bazagarukira tuzongera twumvikane dukurikije n’aho ibihe bigeze. Gusa n’ibigaragaza ko batubariye birahari n’ubu inzu zacu bazishyizeho nomero”
Itegeko riteganya ko iyo icyemezo cyo kwimura abantu cyafashwe, ntawe uba yemerewe kongera gukora ibikorwa birambye ku butaka bwabaruwe. Iyo abikoze nta gaciro bihabwa, nk’uko bitangazwa n’umunyamategeko Nizeyimana Elie. Uyu kandi akomeza avuga ko umuturage atakwitwaza ko yabaruriwe ngo abure gukora ibimuteza imbere, igihe cyose nta mwanzuro wigeze ufatwa.

Musonera Sosthѐne


Tanga igitecyerezo

Who are you?

1 Comment

Gatsinzi - July 2016

Ariko wagirango abantu baba bacyatsa. Twumvise ngo uyu muhanda basanze aho uzanyura hari amazu ahenze bahitamo kuwimura, bakawunyuza ahandi. Gusa bakwiye kubitumenyesha kuko tubyumva hanze gusa. Abandi bavuga ko hari abasirikari bakomeye batuye ku Kimironko bashaka ko unyura hafi y’iwabo!!!! Mwakoze kuri iyi nkuru