Yashyizweho kuri 19 July, 2016 | 07:50

Gasabo: Abafite imirima yaciwemo imihanda na VUP ntibazishyurwa

Abaturage batuye mu karere ka Gasabo, Umurenge wa Nduba mu tugari twa Shango, Butare na Sha bababajwe no kuba batarahawe ingurane ku mitungo yabo yangijwe hashyirwa ibikorwa remezo birimo imihanda n’amashanyarazi bagasaba Leta kubibuka kuba ngo babona basa n’abirengagijwe.

Ibikorwa byo gushyira amashanyarazi mu tugari twa Butare na Shango byabaye muri 2014, icyo gihe abaturage ngo babaruriwe imitungo yabo yangijwe ndetse ngo nyuma banabasaba nimero za konti zabo kugirango hashyirweho amafaranga ahwanye n’ingurane ikwiye nkuko itegeko ribiteganya. Kuva icyo gihe ngo aba baturage barategereje ariko kugeza n’ubu ngo amaso yaheze mu kirere, bibaza niba izo ngurane bazazihabwa bikabayobera kuko ngo nta n’amakuru na make babifiteho.

Umwe muri bo ati “Rwose mutubarize, imitungo yacu yarangijwe ndetse baraza baratubarura badusaba na nimero za konti batubwira ngo bazaduha ingurane, ariko twarategereje twararambiwe.”

Nyuma y’aho muri utu tugari twa Shango na Sha hanyujijwe imihanda mito inyura mu duce dutandukanye two muri utu tugari, bamwe mu baturage bangirijwe ibyabo hakorwa iyo mihanda na bo bavuga ko batigeze bahabwa ingurane ndetse nta n’ikizere cyo kuzihabwa bafite kuko ngo kugeza ubu nta nubwo bigeze babarurirwa imitungo yabo yangijwe hakorwa iyi mihanda.

Undi nawe agira ati “ Ubu twarumiwe, iyi mihanda yanyujijwe mu masambu yacu n’ibyacu birahangirikira ariko nta ngurane twahawe kandi n’abayobozi ntibigeze baduha icyizere cyo kwishyurwa ibyacu byangijwe, ubu twibaza niba tugomba kurenganira mu bikorwa rusange bikatuyobera, mutubarize igituma tudahabwa ingurane kandi ahandi hose hakozwe imihanda mu gihugu bahabwa ingurane”

Umuyobozi w’umurenge wa Nduba avuga ko ku kijyanye n’imitungo yangijwe hakorwa imihanda nta ngurane abo baturage bagomba guhabwa kuko ngo ari ibikorwa by’iterambere abaturage biyemereye ubwabo yongeraho ko ari umushinga wa VUP kandi ngo muri uyu mushinga nta ngurane zateganyijwe. Ati “mbere y’uko tujya kubikora turabanza tukabaganiriza ababishaka tukabikora abatabishaka tukabareka kuko n’ubundi ni amajyambere aba abasanga, tubwira ubishaka utabishaka akabireka kuko Leta ntabwo yazana ibikorwa bazaniye abaturage kugira ngo bibafashe ngo ibone n’amafaranga y’ingurane kuko ibikorwa bya VUP nta mafaranga y’ingurane aba ariho, niba harimo urutoki cyangwa ikindi, umuturage agomba kubyigomwa kugira ngo amajyambere amugereho.” Uyu muyobozi yavuze ko ababurana ingurane ari abashakaga guhabwa akazi muri uyu mushinga kandi ako kazi ngo kagenewe abari mu cyiciro cya mbere n’icya kabiri cy’ubudehe gusa. Ibi kandi abisangiya n’umuyobozi w’akarere ka Gasabo Rwamurangwa Steven uvuga na we ko “Abaturage ubwabo ni bo biciriye iyo mihanda muri gahunda ya VUP ntabwo ari undi muntu waje ngo ahanyuze imihanda kandi abaturage bacaga imihanda ahantu bemeranyijwe, ubwo rero abo ngabo ni wa muturage umwe cyangwa babiri batumva vuba ariko bari babyumvikanyeho, icyakora ufite ikibazo cyihariye yakigeza k’ubuyobozi tukamufasha.”

Ku bijyanye n’abangirijwe ibyabo hashyirwa amashanyarazi mu tugari twa Shango na Sha babaruriwe ibyangijwe ariko bagategereza ingurane bagaheba, umunyamabanga nshingwabikorwa w’umurnge avuga ko hari inama iteganyijwe izahuza abayobozi ba REG n’abo bantu, baba abatarabaruriwe ibyabo ndetse n’ababaruriwe ntibishyurwe.Ngo barimo gushaka uburyo abo bantu bose bishyurwa. Ni abantu 149 barebwa n’icyo kibazo.

Rwamurangwa Steven asobanura ko ingurane ku bikorwa byangijwe hakorwa umuriro ziri hafi guhabwa abo zigenewe ariko akurira inzira k’umurima abaturage batekerezaga ko bazabwa ingurane ku mitungo yangijwe hakorwa imihanda. Rwamurangwa ati “ Abantu bo muri REG bari barategereje bamwe muri bo badafite ibyangombwa ngo babishake kuko batubwiye ko amafaranga bayafite bagiye gutangira kubishyura ahubwo ndabikurikirana numve.” Ku bijyanye n’ingurane z’ibyangijwe hacibwa imihanda, yavuze ko mbere yo guca iyo mihanda abaturage ubwabo bari babyumvikanyeho bityo ngo abona nta mpamvu bafite zo kuburana ingurane ku bintu ubwabo bemeranyije bakabikora.

Itegeko rigenga ingurane mu Rwanda rivuga ko uwimuwe mu bye kubera inyungu rusange agomba guhabwa ingurane ikwiye ku byo yimuwemo mbere yo kwimurwa.

Mukase Francine


Tanga igitecyerezo

Who are you?