Yashyizweho kuri 15 September, 2016 | 09:41

Cyabakamyi: Bamwe mu bahabwaga inkunga y’ingoboka muri VUP barayambuwe

Abaturagae bo mu murenge wa Cyabakamyi, akarere ka Nyanza cyane cyane abakecuru, barinubira ko bambuwe inkunga y’ingoboka bahabwaga umwaka ushize binyuze muri VUP. Bavuga ko ibi byabaye mu gihe ahubwo imibereho yabo yasubiye inyuma.

Abatishoboye kandi badashobora gukora bahabwa inkunga y’ingoboka y’amafaranga ibihumbi 7,500 buri kwezi, abayihabwaga umwaka ushize bavuga ko batazi icyagendeweho ngo bayimwe. Ngutegure Consolee, w’imyaka 76 avuga ko umwaka ushize yayihabwaga ariko uyu mwaka bakaba baramukuye ku rutonde rw’abazayihabwa. We n’abandi bakecuru bavuga ubukene bwabo n’agahinda batewe no kuba batagaragara kuri uru rutonde.

Mukankusi Marceline w’imyaka 68, utuye mu kagari ka Karama mu murenge wa Cyabakamyi. Agaragaza uburyo yarenganyijwe agakurwa ku rutonde, agira ati “inteko y’abaturage niyo izi ubukene bwacu, n’intege nke zacu. Ariko abaturanyi bacu bemeje ko twafashwa nyuma ntituzi abanze kudufasha icyo bagendeyeho kuko ubushobozi bwacu muri rusange ntabwo bwahindutse”. Uyu akomeza yemeza ko nk’umukecuru kandi utagira umuryango wamufasha, akwiye kujya mu bafashwa. Cyakora ngo kubera ko ari mu cyiciro cya mbere cy’ubudehe yizeye ubundi bufasha buciriritse.

Ubuyobozi bw’umurenge wa Cyabakamyi mu izina ry’umuyobozi wawo, Jean Marie Vianney Nkurikiyumukiza, avuga ko muri uyu murenge bahangayikishijwe n’ubuzima bw’abantu benshi batishoboye kuko mu mwaka ushize abagenerwaga inkunga y’ingoboka binyuze muri VUP barenga 200. Gusa ngo bari gushaka uko bakoresha ubushishozi burenzeho mu kugena abahabwa iyi ngoboka.

Gitifu wa Cyabakamyi n’ubwo adahakana cyangwa ngo yemeze ko hari uwaba yararenganyijwe, avuga ko gutanga iyi serivisi bisaba kwirinda amarangamutima ayo ari yo yose. Agaruka ku bagomba guhabwa iyi ngoboka abo ari bo, agira ati “ umuntu ashobora kuba ashaje cyane ariko afite umuryango wamufasha. Nk’umubyeyi wanjye turamutse tubana ntabwo yajya mubahabwa ingoboka kuko ninjye wo kumufasha. N’abandi rero, hari abo usanga bafite imiryango babana yakabaye ibafasha ariko bagashaka guhabwa ingoboka”. Uyu muyobozi akomeza ahamya ko habaye hari abarenganyijwe, bazarenganurwa kuko igihe cyose byakosorwa.

VUP mu bibazo

Ku rundi ruhande ariko, abaturage bavuga ko mu murenge wa Cyabakamyi, VUP muri gahunda zayo zose harimo ibibazo bitandukanye, ku buryo bayitakarije icyizere kuko n’ubuyobozi bw’umurenge bwasimbujwe, batabubonaga nk’ubwabavugira.
Augustin Gasigwa w’imyaka 55 wo mu kagari ka Karama, avuga ko wenda bazarenganurwa kuko babahaye umuyobozi w’umurenge mushya. Agira ati “abantu dufite ibi bibazo turi benshi. Kandi twarabitangaje ahubwo ubuyobozi bwabanje aha bukadufata nk’abatagira ubwenge. Nkanjye nakuwemo kandi sinishoboye mfite n’umugore w’umurwayi. Ndifuza ko ubuyobozi bubikorana ubushishozi”.

Umurenge wa Cyabakamyi urangwa n’ubworozi bw’inka cyane, ariko ntbibuza ko abaturage benshi bawo bari mu cyiciro cy’ubukene dore ko abarenga icyakabiri cy’abawutuye mu mwaka ushize bahabwaga ubufasha muri gahunda zimwe na zimwe za leta. Abo muri iki cyiciro cy’abatishoboye burundu, ngo bagenda biyongera n’ubwo urutonde rwa nyuma rutararangira. Ariko ngo nta kabuza baziyongera nk’uko bitangazwa n’umunyamabanga nshingwabikorwa w’uyu murenge.

Ubundi abantu bahabwa inkunga y’ingoboka (direct support) binyuze muri VUP, ni abakecuru batishoboye badashoboye gukora, n’abandi badashobora gukora kandi bakennye. Cyakora ngo abafashwa ntabwo bazahora bafashwa niyo mpamvu uru rutonde rugomba guhinduka buri mwaka nk’uko bitangazwa n’umuvugizi wa Minisiteri y’ubutegetsi bw’igihugu Ladislas Ngendahimana.
Muri raporo ubushinjacyaha buherutse gushyira ahagaragara, ngo amafaranga yo muri VUP yaranyerejwe ndetse ubu bukurikiranye abayobozi b’inzego z’ibanze banyereje asaga Miliyoni 400. Abayanyereje ni abayobozi bo ku rwego rw’umurenge n’akarere.

Musonera Sosthѐne


Tanga igitecyerezo

Who are you?