Yashyizweho kuri 21 September, 2016 | 09:37

Cyabakamyi : Abarimu basaba konji kugira ngo bahembwe

Abarimu bo mu murenge wa Cyabakamyi , akarere ka Nyanza , baravuga ko bahendwa cyane n’urugendo bakora berekeza I Nyanza guhembwa. Umurenge Sacco wa Cyabakamyi ntukorana n’Umwarimu Sacco nk’uko ahandi mu gihugu bigenda. Bigatuma bakora urugendo hafi rw’amasaha atatu bajya I Nyanza k’Umwalimu Sacco guhemberwayo.

Ubusanzwe Umurenge Sacco ukorana n’ Umwarimu Sacco binyuze mu ikoranabuhanga. Abarimu bagahemberwa k ‘Umurenge Sacco batagombye gukora ingendo ndende cyangwa gusiba akazi. Ku bakorera mu murenge wa Cyabakamyi , umwe mu mirenge icyenda y’akarere ka Nyanza ho ngo siko bimeze .Munyeshyaka Samuel umwarimu wo mu murenge wa Cyabakamyi agira ati “kugira ngo umwarimu ajye guhembwa bimusaba gukora urugendo rw’ amasaha atatu ajya I Nyanza.” Akomeza avuga ko ayo masaha atatu uyakora ujya I Nyanza ukongeraho n’ andi atatu yo kugaruka bityo ugasanga guhembwa bifashe umunsi wose. Ndacyayisenga avuga ko udashobora gukoresha ayo masaha utari mu kazi utabanje kubisabira uruhushya.

Ukoresheje igihe gito yishyura menshi

Kuva Cyabakamyi ujya I Nyanza ahari icyicaro cy’ Umwarimu Sacco ni urugendo rw’ amasaha atatu ugenda n’amaguru cyangwa se iminota mirongo ine n’ itanu iyo ukoresheje moto.Gusa Aba barimu bavuga ko moto ubwayo yishyurwa amafaranga ibihumbi bitandatu (6000Frws) bityo bikaba bigoye ko mwalimu yayitega agiye guhembwa ugereranije n’ ingano y’ umushahara aba agiye kuzana.
Umwe muri bo abara ingano y’ amafaranga atakaza iyo agiye guhemberwa I Nyanza. Agira ati “Kuva aha Cyabakamyi ujya I Nyanza no kugaruka moto iguca amafaranga ibihumbi bitandatu(6000 Frw) , ntiwajya guhembwa ngo uveyo utariye ,ibiryo amake ni igihumbi , wanywa n’ akabyeri kamwe bikaba bifashe mu bihumbi umunani.wajya guhembwa ibihumbi makumyabiri ukaryamo umunani ubwo se urwo rugo wazarutunga ?”

Aba barimu bavuga ko Umurenge Sacco wa Cyabakamyi udakorana n’ Umwarimu Sacco ku buryo bashobora gufatira amafaranga yabo hafi.Iki ngo ni ikibazo bahora babaza ubuyobozi ariko na n’ubu kitarabonerwa igisubizo.Umuyobozi w’ Umurenge Sacco ya Cyabakamyi Bashima Felix avuga ko ikibazo gihari ari ukubura umurongo wa interineti (internet network ) kiri mu murenge wose. Ati “dutangira gukorana n’Umwarimu Sacco baduhaye modemu yabo izatuma tubasha guhemba abarimu ariko nyuma iyo modemu yanze gukora kubera ikibazo cya interineti hanyuma turayibasubiza.”

Bashima avuga ko mu mwaka ushize wa 2015 hari uduce tumwe na tumwe two mu murenge wa Cyabakamyi twagaragayemo gufata umurongo wa interineti bityo nawe yihutira kongera gusaba ko bamusubiza modemu yamufasha guhemba abarimu ariko kugeza ubu ngo nta gisubizo arabona kandi nabo kuba badatanga iyo serivisi babihomberamo.Ati “Umurenge Sacco ni ikigo cy’ imari kandi kiba gishaka inyungu , ntitwanze guhemba abarimu tubishaka kuko natwe iyo dutekereje ko ari inyungu ziducika biratubabaza.”

Umuyobozi w’ Umwarimu Sacco mu karere ka Nyanza Madamu Nashimwe Francine avuga ko koko ikibazo cya Cyabakamyi kizwi ariko ko aho bamenyeye amakuru ko umurongo wa interineti ushobora gukorayo batangiye kureba uko basubizwa iyo modemu.Agira ati” aho batubwiriye ko umurongo wa interineti ushobora gukora twihutiye koherezayo umukozi wacu kugira ngo ajye kureba ko koko bishoboka dusanga ihari. Natwe twatangiye kubasabira indi modem ku buyobozi bukuru bw’ umwarimu sacco ku rwego rw’ igihugu. Dutegereje ko bayitwoherereza.” Nashimwe avuga ko hashize amezi abiri batse iyo modemu akemeza ko mu gihe kitarambiranye abarimu ba Cyabakamyi bazaba bashobora gufatira amafaranga yabo k’Umurenge sacco.

Mu gihe bagitegereje ubafasha…

Aba barimu ba Cyabakamyi ngo hari uburyo bagerageza kwishakamo igisubizo mu gihe bagitegereje ubafasha. Basaba Umurenge Sacco wa Nyagisozi baturanye kujya uza kubahembera I Cyabakamyi. Ibi nabyo bibasaba ko ku mafaranga buri mwalimu ari buhembwe akuraho amafaranga magana atanu (500Frws) bita ko ari ay’urugendo (ayo guhagurutsa Umurenge sacco wa Nyagisozi kugira ngo uze guhemba abarimu ba Cyabakamyi ).

Nubwo ubu buryo bubafasha ariko abantu bakomeza kugira impungenge z’ umutekano w’ ayo mafaranga ava Nyagisozi agemuriwe abarimu I Cyabakamyi cyane ko ngo abayazana baza kuri moto kandi bagahemberwa ku gasozi bashakisha aho babona umurongo wa interineti.

Umuhire Valentin


Tanga igitecyerezo

Who are you?