Yashyizweho kuri 22 September, 2016 | 15:37

Cyabakamyi: Abakoreye VUP barasaba kwishyurwa ngo bikenure

Abakoreye VUP mu murenge wa Cyabakamyi, akarere ka Nyanza mu ntara y’ Amajyepfo barinubira gutinda kwishyurwa amafaranga bakorera, bikaba byaragize ingaruka zitandukanye ku mibereho yabo: kutabasha kwishyura mituweli, kwicwa n’inzara... Ubuyobozi bw’umurenge n’ubw’akarere burabizeza kuyabona vuba kandi ko icyo kibazo kitazasubira.

Nk’uko bitangazwa n’abakoreye VUP, amezi abaye abiri bategereje kwishyurwa amafaranga bakoreye. Abenshi barataka inzara kuko muri iyi minsi batunzwe no guhaha kuko izuba ryatse bakarumbya, abandi bakavuga ko hari ibyo basabwa nka mituweli ariko aho bari gukura ubushobozi hakaba harabatengushye.
Nyiramuhire Rosalie utuye mu kagali ka Karama, umurenge wa Cyabakamyi, ni umwe mu bategereje kwishyurwa na VUP kugira ngo abashe kugira ibibazo akemura. Agira ati “ Abayobozi baduha akazi ariko byagera igihe cyo guhembwa bakadutera utwatsi. Ubu twakoze kenzene 5 (quinzaine=iminsi cumi 15, NDLR) ariko twahembwe 2 banadukata imibyizi 2 tutazi impamvu yayo. Iyo ubajije nta nubwo bagusobanurira impamvu.”

Uyu mubyeyi akomeza avuga ko bashonje kuko baatangiye akazi ka VUP bafite inzara ndetse n’ibindi bibazo bikeneye amafaranga nka mituweli, iyi yo ikaba ikomeje kubabera imbogamizi kuko utarihiye abagize umuryango we bose adashobora kuvurwa. Undi mukecuru we avuga ko umugabo we yakoreye VUP, ariko bakaba baburara kuko ibiryo bari bafite byashize mu nzu. Agira ati “Turaburara kandi yarakoze. Ibi birutwa no guhingira umuturage usanzwe akakwishyura.”

Ibi abihuriyeho na Mukamugenga Odetta utuye mu mudugudu wa Nyakabingo mu kagali ka Nyarurama. Avuga ko yari asanzwe akorera abaturage agahabwa amafaranga 700 ku mubyizi ariko akayabona, ariko ngo yisunze VUP azi ko azarushaho kuzamura imibereho ye ariko ngo siko yabisanze.

Dushimimana Josee na we yakoreye VUP, akaba yaratangiranye na yo ku itariki ya 23 Gicurasi uyu mwaka. Na we ngo asanga ikirarane babarimo cyarabagizeho ingaruka cyane, akagaruka ku nzara, mituweli batabasha kwishyura ndetse n’abana bavuye mu mashuri. Ababishiboye basaba inguzanyo.

Bashishikarizwa kuguza muri Sacco

Bamwe mu bakoreye VUP ntibabasha kwihanganira itinda ry’aya mafaranga bakoreye. Hagati aho, ubuyobozi bw’umurenge ngo bubashishikariza kujya gufata inguzanyo muri Sacco bakazishyura bahembwe na VUP, nyamara ariko baba bagomba kuzashyiraho n’inyungu.

Mukamugenga we asanga kuguza ari amaburakindi. Agira ati “Baratubwiye ngo tugende muri Sacco tuguze, ubishoboye inzara yanogonoye akajyayo akaguza akazayungukira hejuru y’amafaranga ye. Abihagazeho rero barabyanze.”
Akomeza avuga ko yagurishije inzu ye kugira ngo yishyure Sacco azi ko azabona imibereho muri VUP, none inzara ikaba imugeze ku buce.

Umunyamabanga nshingwabikorwa w’umurenge wa Cyabakanyi, Nkurikiyumukiza Jean Marie Vianney avuga ko amakosa yabayemo yatewe n’uburangare ariko yamaze gukosorwa. Agira ati “ Habayeho kwibeshya kubara imibyizi y’abakoraga muri VUP mu mushinga wo kuzana amazi hano. Aya mafaranga yishyurizwa ku rwego rw’akarere, bakaba baradusabye gukosora amasezerano ndetse tukanabara neza imibyizi. Byararangiye kandi twarabyohereje bazayabona mu minsi ya vuba.”
Ibi bishimangirwa n’Umuyobozi w’Akarere ka Nyanza, bwana Erasme Ntazinda, uvuga ko ikibazo atari amafaranga yabuze ahubwo habayeho kwibeshya, ariko ngo byarakosowe amafaranga bakaba bazayabona vuba.

Hagati aho ariko, Nkurikiyumukiza yasabye imbabazi ku makosa yaba yarakozwe na bamwe mu bakozi b’umurenge bagashishikariza abakoreye VUP kujya gufata inguzanyo muri Sacco, avuga ko ayo makosa atazongera kubaho mu yindi mishinga izaza. Uyu murenge awumazemo ukwezi kumwe.

Umurenge wa Cyabakamyi ni umwe mu mirenge 10 igize akarere ka Nyanza, ukaba urangwamo kutagira ibikorwaremezo bihagije ku buryo bidindiza iterambere ryawo. Ni wo murenge utagira amashanyarazi muri aka karere.

Higiro Adolphe


Tanga igitecyerezo

Who are you?