Yashyizweho kuri 25 October, 2018 | 19:18

Bigogwe: "Inka ni umutungo w’umugabo n’abana be b’abahungu"

Mu murenge wa Bigogwe, inka n’inzuri ni imitungo y’umwihariko y’umugabo n’abana be b’abahungu. Abagore basanga iki ari ikimenyetso cy’ihohoterwa rishingiye ku mitungo rikorerwa umugore n’umwana w’umukobwa.

Abagore bo mu murenge wa Bigogwe mu karere ka Nyabihu, basanga abagabo bakwiye kwisubiraho, bakabereka inka n’inzuri bafite, bakazigiraho uruhare. Bagaragaza ko iyo mitungo ari umwihariko w’abatware b’urugo n’abana b’abahungu gusa! Abagore n’abakobwa barahezwa, kandi ntibemerewe gukandagira mu nzuri inka zabo zirishirizamo.Aya makuru yavuzwe mu kiganiro gihuza abaturage n’abayobozi cyateguwe ku bufatanye bw’impuzamashirahamwe y’abagore Pro-femmes Twese Hamwe n’umuryango w’abanyamakuru baharanira amahoro, "PAX PRESS".

Mukasine Espérance, umwe mu bagore batinyutse kuvuga ukuri ku ihohoterwa abagore bo mu Bigogwe habura naryo, yagize ati "Kutamenya umubare w’inka abagabo bacu batunze n’inzuri bafite, ni ihohoterwa rikabije rishingiye ku mutungo. Biteye isoni kubona ko umutungo nk’uriya, umugore atawufite ho ijambo". Yakomeje agaragaza ko nibura abana b’abahungu aribo bamenya amakuru y’inka, ariko ababyeyi babo b’abagore bagahezwa! Mukasine ababazwa nuko abagore bakora cyane ku nyungu z’urugo, ariko abagabo babo ntibabahe agaciro kabakwiriye. Asobonura ko umuco ukiri inzitizi zikomeye mu kwimakaza uburenganzira bw’umugore, ati "Umuco ino aha uvuga ko inka ari umwihariko w’igitsina gabo. Umugore n’umukobwa bakomeza gukoran akazi ko murugo, nta kundi…"

Tuyisenge Joselyne, umugore wiyemeje kujya mu rwuri rw’umugabo we ruri hafi y’ishyamba rya Gishwati, atangaza ko yakumiwe n’abashumba bamubujije kwegera inka z’umugabo we, ati "Abashumba barankumiriye bibaza niba ndi umugore ufite umuco wo mu Bigogwe, kuko bazi ko abagore bo mu Bigogwe batatinyuka gukora iki gikorwa. Natashye mbabaye cyane!"

Abagabo bakomeje kwihagararaho

Cyubahiro Innocent ni umugabo ufite inka. Yeruye avuga ko umugore we adafite uburenganzira bwo kumenya umubare n’inzuri afite, ati " Umugore wanjye nta burenganzira afite ku nka zanjye. N’igihe nshaka kuyigurisha, sinamubwira, sinamugisha n’inama. Nabishatse, namuha ku mafaranga y’ubuguzi, ariko ntacyo ngomba kumusobanurira".

Uyu mugabo ugikomeye ku muco wa gakondo, yashimangiye ko afite uburenganzira busesuye bwo kugaba inka ku muntu ashaka, atabanje kugisha inama umugore we. Avuga ko umugore aba afite ibyo ashinzwe mu rugo rwabo nk’uko nawe afite inshingano ze bwite. Ngo buri muntu aba afite ibimureba nta kwivanga muri gahunda y’undi. N’abandi bagabo ni uko babibona, kuko muri icyo kiganiro, iyo abagore bavugaga guhezwa mu mitungo, cyane cyane irebana n’inka, abagabo wasangaga badaha agaciro ibitekerezo by’abo. Urugero ni nk’uyu Gasamagera Pascal ufite imyaka 57, uvuga ko kuva yabaho ku isi, ndetse no kuva kera ku bw’abasogokuru, ko inka zigira uko zigenwa mu micungire, ati "Hari imiziro n’imiziririzo ku nka. Kandi abagore hari ibyo birengagije, bazi neza ko gutunga no gutunganirwa bigira amategeko". Yihuta, yavuze ko bibujijwe umugore cyangwa umukobwa uri mu mihango kugera mu rwuri, cyangwa gukama inka! Ibyo byose bituma umugore ahezwa kuko iyo atabyubahirije, inka zikenyuka…

Uruhare rwa Pro-Femmes

Umulisa Angélique ni umukozi w’impuzamashyirahwe y’abagore "Pro-Femmes Twese Hamwe". Yavuze ko igihe kigeze cyo guha umugore agaciro kuko iyo agafite, ateza imbere urugo rwe kurusha igihe atagafite, ati "Duharanira ko abagore bamenya acaciro bafite n’abagabo kwemera gufatanya n’abagore mu gucunga imitungo y’urugo. Ingaruka aba ari nziza kuko iterambere ryihuta".

Gahutu Tebuka Jean Paul, umunyamabanga Nshingwabikorwa w’umurenge wa Bigogwe yemeranya na Pro-Femmes Twese Hamwe ko umugabo n’umugore bagomba kurebwa mu ndererwamo imwe ibaha uburenganzira bumwe mu cyo Leta yita "Uburinganire n’ubwuzuzanye". Yavuze ko iyo abashakanye bashyira hamwe mu bwumvikane, ntahohoterwa riharangwa ; ati "Niyo mpamvu umurenge wacu wa Bigogwe twashyize imbere gukangurira abaturage gahunda ya Leta y’uburinganire n’ubwuzuzanye. Ni ingirakamaro kuko buri wese aba yuzuza mugenzi we".

Amateka y’u Rwanda agaragaza ko guturuka kera, inka ari ikimenyetso cy’ubukungu. Niyo mpamvu imigani myinshi ivuga ku bukungu iganisha ku inka. Urugero, indamutso yiganje mu Bigogwe ivuga iti "Gira inka, gira amata, amashyongore, n’indi migani". Nyamara abatava ku izima muri ako gace bashyira iumuco imbere kuruta amategeko, aho kubabwira uburinganire, kugira uburenganzira ku mutungo bigaragara ahubwo nko kuba uje kubacira umuco.


Nizeyimana Elias


Tanga igitecyerezo

Who are you?