Yashyizweho kuri 16 May, 2016 | 12:15

Abatagera kuri 60% ni bo bishimiye serivise bahabwa mu buhinzi

Ubushakashatsi bwakozwe na RGB ku mitangire ya serivisi z’ubuhinzi n’ubworozi mu mpera z’umwaka wa 2015 bwerekanye ko muri rusange abaturage bishimiye imitangire y’izi serivisi ku gipimo cya 56.4%. Ni byinshi bifuza ko byakosorwa kugira ngo uru rwego rutunze benshi rubashe kubabeshaho uko bikwiye.

Nk’uko byagaragaye mu isuzuma ry’uko abaturage babona imiyoborere ibabereye n’imitangirwe ya serivise mu nzego zibegereye (Citizen Report Card/CRC), rikorwa n’Ikigo gishinzwe Imiyoborere (RGB), mu turere hafi ya twose (25/30) abaturage bagaragaje ko bishimiye serivisi z’ubuhinzi n’ubworozi ku gipimo kiri hagati ya 50 na 75%.

Mu turere dutanu ari two Kayonza, Bugesera, Gasabo, Nyamagabe na Rubavu, ho abaturage bagaragaje ko bishimiye serivisi z’ubuhinzi n’ubworozi ku gipimo kiri munsi ya 50%. Nta karere na kamwe abaturage bagaragaje ko bishimye ku kigero kiri hejuru ya 75%. Ibi bigaragaza imbaraga zikwiye kongera mu buhinzi, dore ko umubare munini w’Abanyarwanda ari abahinzi borozi.

Tugendeye ku ntara, Amajyaruguru ni yo afite abaturage bagaragaje ko bishimiye serivisi bahabwa mu buhinzi kurusha abandi, ku kigero cya 59.2%, bagakurikirwa n’Uburengerazuba ku kigero cya 58%. Mu mujyi wa Kigali ni ho batishimiye izo serivisi kuko bazinenga ku kigero cya 63.3%.

Uko abaturage bishimiye serivisi zitandukanye

Muri ubu bushakashatsi bwakorewe mu gihugu hose abaturage babajijwe uko bishimira serivisi zitandukanye bahabwa mu buhinzi zirimo gahunda yo guhuza ubutaka, guhinga igihingwa cyatoranyijwe, serivise za agoronome, gukoresha amafumbire n’inyongeramusaruro, kubonera imbuto igihe, guhunika umusaruro, kubona inguzanyo ku mabanki nk’ibigo by’imari na serivisi z’ubukangurambaga n’ubujyanama.

Muri izo serivise zose, abaturage bishimiye cyane gukoresha amafumbire n’inyongeramusaruro ku gipimo cya 66.8%, serivizi z’ubukangurambaga n’ubujyanama ku buhinzi kuri 66.3%, serivisi za agoronome kuri 65.8%, guhinga igihingwa cyatoranyijwe kuri 63.3% no guhuza ubutaka ku gipimo cya 58.7%.

Abaturage banenze serivisi bahabwa mu bijyanye no guhunika umusaruro ku gipimo cya 57.4%, kubona isoko ry’umusaruro ku gipimo cya 44.2%, naho kubonera imbuto ku gihe babinenga ku gipimo cya 40.4%.

Isoko ry’umusaruro no kubonera imbuto igihe biracyari ikibazo

Nk’uko bigaragara muri ubu bushakashatsi kandi, nta karere na kamwe abaturage bagaragaje ko bishimiye uburyo babona isoko ry’umusaruro ku gipimo kiri hejuru ya 75%. Mu turere 10 kuri 30 ni ho abaturage bishimiye isoko ku gipimo kiri hagati ya 50% na 75%, naho udusigaye (20/30) bo bagaragaje ko bishimye ku gipimo kiri munsi ya 50%. Biragaragara ko hakiri ikibazo gikomeye mu gushakira abahinzi isoko ry’umusaruro wabo.

Ku bijyanye no kubona imbuto ku gihe, uturere 2 gusa twa Nyamasheke na Nyanza ni two tugaragaramo abaturage bishimiye uko bagezwaho imbuto ku gihe, ku gipimo kiri hejuru ya 75%. Mu turere 15, kimwe cya kabiri (1/2) cy’abaturage bishimiye iyi serivisi ku gipimo kiri munsi ya 75%; naho uturere dusigaye uko ari 13 abaturage bishimiye iyi serivisi ku kigero kiri hagati ya 25 na 50%.

Imibare igaragara muri ubu bushakashatsi igaragaza ko hagikenewe gushyira imbaraga mu kugeza ku baturage imbuto ku gihe kugira ngo badacikanwa n’igihe cy’ihinga mu gihe imbuto zaba zibagezeho impitagihe. Mu gihe umusaruro ubonetse kandi, ni ngombwa kuwubonera amasoko kuko henshi ugenda upfa ubusa, abaturage bagakena kandi barejeje.

Henshi mu turere Pax Press yagezemo mu biganiro itegura bihuza abaturage n’abayobozi, bagiye bagaragaza ikibazo cyo kubura isoko ry’umusaruro wabo, nka kimwe mu bidindiza iterambere ryabo.

Umukunzi Médiatrice


Tanga igitecyerezo

Who are you?