Yashyizweho kuri 6 December, 2018 | 09:53

Abarezi barasaba ko Siyansi ihabwa umwanya mu biruhuko

Kuba umwarimu muri afurika agira abanyeshuri benshi mu ishuri ntabone uwo gukurikirana buri wese, no kuba umwanya abana babona mu biruhuko utabyazwa umusaruro; nibyo bituma abize ibya siyansi bifuza ko ikiruhuko cyabyazwa umusaruro. Abanyeshuri bagahura bagasubiramo ibyo bize bakabibyaza umusaruro bashaka ibisubizo by’ibibazo abanyarwanda bahura nabyo mu buzima bwa buri munsi.

Hari abanyeshuri bo muri ES Kagarama, abo muri Imaranyundo High School n’abo kuri ES Musanze bagaraje ko babyaza umusaruro siyansi. Kuri bo ngo umwanya bamara ku ishuri niwo muto ugereranyije n’uwo bamara batari mu masomo. Ahenshi buri munsi abanyeshuri bataha saa saba, wongeyeho igihe cy’ibiruhuko. Abanyeshuri, abarimu n’Inzobere bemeza ko uwo mwanya ari munini kandi utabyazwa umusaruro.

Dr. Herine Otieno-Menya waminuje mu burezi, akaba n’umuyobozi w’ishami rishinzwe gutegura gahunda zo kwigisha muri African Institute of Mathematical Sciences (AIMS) [Ikigo Nyafurika cy’Ubumenyi bushingiye ku mibare], avuga ko kwigisha siyansi bisaba umwanya munini urenze uwo abanyeshuri bamarana n’abarimu ku ishuri, kandi umwana agakomeza gukurikiranwa no hanze y’ishuri.
Yungamo ati “Twemera ko siyansi yakwigwa neza kurushaho bidakorewe ku ishuri gusa. Turimo kubitangira mu karere ka Kamonyi kuri Kayumbu. Abana biga ibintu bimwe baturanye, bakwihuza bakabisubiramo iwabo, haba mu biruhuko, haba no mu masaha ya nimugoroba bavuye ku ishuri.”

Uyu akomeza avuga ko izi atari inshingano z’abana n’abarimu gusa, ahubwo hakenewe uruhare rw’ababyeyi n’abayobozi b’inzego z’ibanze.

Hamwe umusaruro watangiye kuboneka

Ku italiki 9/11/2018 ubwo hizihizwaga umunsi mpuzamahanga wa Siyansi, bamwe mu barimu babonye ko bishoka ko siyansi yava mu magambo ikajya mu bikorwa kandi bitanga ibisubizo ku bibazo abanyarwanda bafite.

Uwumuremyi wigisha kuri Ecole des Sciences Musanze, avuga ko yabonye ibikorwa abanabakoze babibyaje Siyansi akabona ko byose bishoboka. Mu byo aba bana bakoze harimo amakara atangiza ibidukikije, abakoze sisiteme ituma amatara yizimya igihe adakenewe n’iyo nta muntu waba ahari, n’ibindi.
Bamwe mu banyeshuri bakoze ibi bikorwa, bavuga ko igihe kigeze ngo siyansi biga mu mpapuro ijye mu bikorwa. Uwiragiye Ange wiga mu mwaka wa gatandatu PCB, ku ishuri ryisumbuye ry’abakobwa rya Maranyundo, i Nyamata. Avuga ko ibyo babashije gukora, batabikoze mu gihe cy’amasomo ahubwo babikoze mu gihe cya nyuma yayo.

Ibi abihuriyeho na Muderwa Bertrand, umunyeshuri wo ku ishuri ryisumbuye rya Kagarama mu karere ka Kicukiro. Aho agira ati “biragoye ko umuntu umwe yakwifasha gusubiramo ibyo yize. Rimwe na rimwe bimutera ubute ariko duhuye twarize ibintu bimwe, bidufasha no kuvumbura byinshi. Nkatwe n’abo twigana twarafatanyije dukora sisiteme ituma iyo nta muntu uhari amashanyarazi yizimya.”

Inyigisho za siyansi zibarizwa hafi kuri buri kigo cy’amashuri. Gusa nanone ahenshi haracyari ikibazo cy’ibikorwaremezo bike. Hari aho usanga ibigo byigisha siyansi ariko bitagira “laboratoire”. Ahenshi mu mashuri y’ibanze y’imyaka 9 na 12 ho nta zihari, nyamara amenshi muri ayamashuri afite amashami ya PCB, PCM, BCM,… Dr. Herine, akaba ari ho ahera avuga ko uruhare rwa buri wese rukenewe mu iterambere rya siyansi ariko ritava gusa ku ishuri.

Uretse ibikorwaremezo hagarukwa no ku kibazo cy’ubushobozi bwa mwarimu n’uburyo afatwa. Dr. Herine Otieno-Menya, we akavuga ko umwarimu adakwiye kwibagirana haba kumwongerera ubumenyi ndetse no kumushimira mu buryo bw’amafaranga kuko ari we musingi.

Kuri ubu AIMS, ifite gahunda yo guhugura abarimu 4,717 n’abiga ubwarimu 2,100 mu rwego rwo kubaha uburyo bushya bwo kwigisha siyansi. Aho n’ikoranabuhanga rigezweho rizahabwa umwanya, aho abarimu ba siyansi bazajya bungurana ibitekerezo binyuze kuri whatsApp n’izindi mbuga nkoranyambaga.

Musonera Sosthène


Tanga igitecyerezo

Who are you?