Yashyizweho kuri 5 July, 2016 | 08:37

Abangirijwe n’amashanyarazi baracyasaba ingurane

Ababaruriwe ibyangijwe n’ibikoresho by’amashanyarazi mu murenge wa Nyarusange baracyategereje ingurane. Ubwo mu mirima yabo hacishwaga amapoto, imyaka yarangirijwe. Nyamara, kwishyurwa ntibiraba. Amaso yaheze mu kirere.

Ntabanganyimana Dominique, atuye mu mudugudu wa Cyiciro, akagari ka Musongati ,mu murenge wa Nyarusange. Ubwo mu kwezi kwa cumi ,umwaka wa 2015,muri aka kagari kabo hazanwaga umuriro w’amashanyarazi, avuga ko yatemewe ibiti bibiri by’avoka, ndetse agatemerwa n’insina, n’imyaka itandukanye yari ihinze mu murima we. Uyu mugabo uvuga ko ubusanzwe ibi biti bye iyo byabaga byeze yabisaruraga akavanamo amafaranga yamutungaga we n’umuryango we, ubu ngo kubera gutemerwa ibi biti bye by’avoka ndetse n’urutoki ,byamusubije inyuma.

Ntabanganyimana utarashatse kuvuga amafaranga yari yabariwe ,avuga ko iyo baramuka bamwishyuye yari yapanze ko hari ibindi yari kuyakoresha, bityo bikamufasha kwikura mu bukene, avuga ko kuba bigiye kumara umwaka atarahabwa ingurane z’ibye byangijwe, byamutesheje igihe , mu gihe yari yiteze ko nayabona azahita ayajyana mu yindi mishinga yamuteza imbere. Ati« maze kubona baje kumbarira , nahise ntangira kuyapangira icyo nzayakoresha, nari mfite imishinga myinshi , nategenyaga kuba nayashoramo, ariko ubu narategereje ndaheba, ndetse n’ibyo natekerezaga gukora byose byamvuyemo.»

Ibi kandi binavugwa na Nsabimana nawe wo muri ako kagali , uvuga ko yatemewe insina ubwo bashingaga ipoto y’amashanyarazi mu murima we, uyu we avuga ko yari yabariwe ibihumbi ijana by’amafaranga y’u Rwanda. Ngo iyo bahita bayamwishyura,yari kuyashakiraho andi akayagura umurima akaba yakongera urutoki rwe asanganywe rumuha umusaruro

Bategereje igihe batazi

Mukamutari Valérie, umunyamabanga nshingwabikorwa w’umurenge wa Nyarusange, avuga ko aba baturage bakorewe ubuvugizi haba ku buyobozi bw’akarere, no ku kigo gishinzwe gukwirakwiza amashanyarazi(EUCL). Valérie ahamya ko abaturage bazishyurwa vuba, ko icyatumye batishyurwa vuba ari uko EUCL, ishinzwe gukwirakwiza umuriro w’amashanyarazi, yari ikirimo kunoza raporo zayo, kugira ngo harebwe ko ntawe baba baribagiwe, cyangwa se ko nta yandi makosa arimo. Nibimara byose gukemuka aba baturage bazishyurwa vuba, gusa ntabwo atanga igihe nyacyo bazaba bamaze kwishyurwa, kuko atari urwego rw’umurenge ruzabishyura.

Uyu murenge wa Nyarusange ugizwe n’utugari tune, ukaba utuwe n’abaturage ibihumbi makumyabiri n’umunani,(28000)nubwo uri mu gice cy’icyaro, uyu murenge ariko ufite umwihariko wuko, utugari twawo twose uko ari tune twamaze kugezwamo umuriro w’amashanyarazi, ibintu abawutuye bishimira, kuko bizabafasha kurushaho kwiteza imbere, bifashishije uyu muriro w’amashanyarazi

Musonera Sosthène


Tanga igitecyerezo

Who are you?