Yashyizweho kuri 5 July, 2016 | 16:29

Abagore barasabwa kubyaza amahirwe yo kuba bari muri EAC

Abagore bacyitinya barasabwa kubyaza amahirwe kuba u Rwanda ruri mu bihugu bya Afurika y’Iburasirazuba. Kuba hari ahahujwe za gasutamo, ahandi kujyayo bikaba bisaba irangamuntu gusa, ngo ni amahirwe akomeye abagore bo mu Rwanda bagomba gufata bagamije kwiteza imbere.

Abagore barasabwa kubyaza umusaruro amahirwe yo kuba u Rwanda ruri mu muryango w’ibihugu bya Afurica y’iburasirazuba.
Abadepite bo mu nteko ishinga amategeko y’Umuryango w’ibihugu bya Afurika y’Iburasirazuba (East African Community), bahuye n’abagore bahagarariye abandi mu turere twa Nyagatare, Gatsibo na Kayonza, basobanurirwa ibijyanye n’uyu muryango n’inyungu u Rwanda rufite nk’umunyamuryango wawo.

Bamaze gusobanurirwa inkomoko y’uyu muryango, uburyo ukora nkuko u Rwanda rwahisemo kuba umunyamuryango, Hajabakiga Patricia, wari kumwe na bagenzi be Ngoga Martin na Prof. Ndahiro bagaragaje ko hakiri icyuho kinini ku ruhande rw’abagore mu kubyaza inyungu aya mahirwe u Rwanda rufite y’isoko ryagutse. Aba bagore bavuga ko biteguye kugeza kuri bagenzi babo baje bahagarariye, ibyiza bungukiye muri aya mahugurwa.

Mukawera Marigarita, ahagarariye Inama yígihugu yábagore mu karere ka Nyagatare, avuga ko basobanukiwe neza n’imikorere ya za gasutamo z’ibihugu byo muri uyu muryango ku buryo basanze, nk’urugero, hari abakoraga ubucuruzi bazi ko ari forode kandi mu by’ukuri atari yo ahubwo gasutamo z’ibihugu byo muri uyu muryango zarahujwe. Agira ati « nicyo gihe ngo abagore bahagarariye bitinyuke babyaze umusaruro iri soko ryagukiye mu bindi bihugu by’uyu muryango wa Afurika y’iburasirazuba. »

Hajabakiga Patricia, avuga ko uretse n’isoko cyangwa n’akazi byagutse, ubu uyu muryango wemeje urujya n’uruza rw’abantu n’ibicuruzwa mu bihugu byawo ndetse ibicuruzwa bifite inkomoko muri kimwe muri ibi bihugu bikaba bidasoreshwa kuri gasutamo. Uretse nibyo kandi yungamo ko « Abaturage bo mu bihugu bigize uyu muryango kandi bemerewe kugenda mu bihugu nk’u Rwanda, Kenya na Uganda bakoresheje irangamuntu gusa nta viza batse. »

Umuryango w’Afurika y’Iburasirazuba (EAC) ugizwe n’ibihugu bitandatu birimo Rwanda, Uganda, Tanzania, Kenya, Burundi na Sudani yÁmajyepfo ukaba ufite imishinga myinshi ikiri mu nyigo yose igamije inyungu rusange z’abanyamuryango.

Kagaba Emmanuel


Tanga igitecyerezo

Who are you?