Yashyizweho kuri 3 August, 2016 | 07:45

Abadepite barasaba igabanuka ry’ibiciro by’ingufu mu rwego rwo korohereza ibikorerwa mu Rwanda

Bamwe mu bagize inteko ishinga amategeko imitwe yombi babwiye minisitiri w’intebe ko bakurikije uko ibiciro by’ingufu z’amashanyarazi bimeze mu Rwanda, babona inganda zizakora imyenda isimbura Chaguwa zishobora kuzashyiraho igiciro kiri hejuru. Basaba ko ibiciro by’izi ngufu byagabanywa nibura ku nganda.

Ni gahunda imaze gukorwaho ibiganiro byinshi bigamije gusobanurira abaturage impamvu imyenda cyangwa inkweto bituruka hanze byigeze kwambarwaho bikwiye gucika, igihugu kigatangira gucuruza ibivuye mu nganda zacyo bwite.

Mu mpera z’ukwezi kwa karindwi ni bwo haheruka ikiganiro kuri iki kibazo cyahuje Minisitiri w’intebe Anastase Murekezi n’imitwe yombi igize inteko ishinga amategekoInteko rusange y’inteko ishinga amategeko y’uRwanda
Bamwe mu badepite n’abasenateri bagaragarije Minisitiri w’intebe ko igiciro cy’amashanyarazi kiriho mu gihugu kikiri hejuru cyane, bityo kikazatuma imyenda n’inkweto biza n’ubundi bihenze.

Ni naho bamwe mu badepite basabaga ko iki giciro cyabaganywa. Depite Mudidi Emmanuel yagize ati:”Kuzamuka kw’igiciro, amashanyarazi abigiramo uruhare runini cyane. Uko uruganda rukoresha za unités nyinshi ni ko bari bakwiye kurugabanyiriza ntirwishyure amafaranga menshi cyane. Nasabaga Minisitiri w’intebe niba ibyo bitatekerezwaho ngo bibe byagabanya igiciro cy’amashanyarazi ku nganda, abandi bayakoresha nko mu ngo ntibihinduke.”

Kugeza ubu kilowatt imwe mu Rwanda igurishwa amasantime 17 mu madolari ya Amerika, ni ukuvuga amafaranga 134, muri Uganda ikagurishwa 12, naho muri Kenya igacuruzwa kuri 7, bivuga ko uRwanda rufite igiciro kiri hejuru. Minisitiri w’intebe Anastase Murekezi yabwiye inteko ishinga amategeko imitwe yombi ko iki kibazo gihari, ariko ko hari icyo Leta y’uRwanda yiteguye kugikoraho.

Yagize ati:”Iyo ugereranije igiciro cy’amashanyarazi mu Rwanda no mu bihugu turi kumwe mu muryango wa Afrika y’iBurasirazuba, ni koko turahenze cyane. Tugomba rero gukora ku buryo koko twagabanya igiciro cy’amashanyarazi ajya mu nganda, ariko ubu ntabwo twabishobora, kuko turacyakoresha ava ku mashini(generators), kandi arahenze, kuko kilowatt imwe ari hafi amasantime 30.

Kuva mu kwa cyenda kw’umwaka wa 2015, ikigo cy’igihugu gishinzwe imirimo ifitiye igihugu akamaro RURA cyatangaje ibiciro bishya by’amashanyarazi. Abafite inganda bagumye ku mafaranga 124(amasantime 16) kuri kilowatt imwe ku isaha.

Kaberuka telesphore


Tanga igitecyerezo

Who are you?