Yashyizweho kuri 28 March, 2018 | 13:13

Gatsibo : Mu murenge wa Gatsibo, no ku ivuriro bitwaza amazi meza

Ikibazo kimaze igihe kikagira n’ingaruka kubatuye mu murenge wa Gatsibo, ni indwara abahatuye bavuga ko ari nyinshi ziterwa n’umwanda. Ubu bisaba ko n’abagiye ku kigo nderabuzima bitwaza amazi. Ariko ubuyobozi buragaragaza ingamba zo gushaka igisubizo gihamye.

Umurenge wa Gatsibo, ni umwe mu mirenge igize Akarere ka Gatsibo, ugizwe n’utugari 5, imidugudu 44. Ukaba utuwe n’abaturage ibihumbi 26.597 batuye mu ngo 1600 ku buso bwa hegitari 61.136. Bamwe mu baturage, muri uyu murenge wa Gatsibo, bataka kutagira amazi meza,aho usanga binubira ko bakoresha ayanduye cyangwa ay’imvura bigatuma bahorana indwara z’inzoka zidashira,bitewe no kunywa no gukoresha amazi yanduye.

Sarambuye Calliope, utuye mu umudugudu wa Gatare,Akagali ka Gatsibo, ,avuga ko mu gihe gishize muri aka gace hari imiyoboro ibagezaho amazi meza kandi nabwo akaza ari make kandi akaboneka rimwe na rimwe.
Agira ati, “ariko ubu byahumiye ku mirari kuko nta mazi tukigira imiyoboro yaje kwangirika ibura gisana bituma ikibazo cy’amazi kiba ingorabahizi .”
Akomeza yemeza ko Iki kizo kibangamiye ubuzima bw’abaturage, kuko mu ndwara nyinshi bakunze ku rwara harimo n’iziterwa n’umwanda, nk’inzoka ndetse n’izifata imyanya y’ubuhemekero nk’inkorora, ibicurane, Asima n’izindi.

Munyankindi Simon, utuye mu mudugudu wa Rwimbogo, asanga ingaruka zo kutagira amazi meza bituma bagira ubuzima bubi kuko kujya kuyashaka iyo ari bibagora. Agira ati, “kujya kuyashaka aho ari ni kure , ni ukwiyuha akuya kandi muri urwo rugendo n’izo mvune harimo ingorane zikomeye, zirimo umunaniro no kuba umuntu azana adahagije yakoresha imirimo yose iyakeneye.”
Akomeza avuga ko amazi ari kimwe mu by’ingenzi bikenewe mu buzima bw’umuntu kuko iyo abuze cyangwa abonetse ariko atari meza bihagije bitera ingaruka mbi ku buzima bw’umuntu .

Nubwo aba baturage bemeza ko bagenda batera imbere mu buryo butandukanye, baravuga ko kuba nta mazi meza babona (ahagera) , bibahangayikishije kikaba ari ikibazo kibakomereye cyane bagasaba ubuyobozi kugishakira igisubizo bakagezwaho amazi meza kugira ngo isuku n’isukura ntibijye bibagora.
Mutumwinka Solange,wo mu mdugudu wa Nyabicwamba,Akagali la Gatsibo, avuga ko ubuyobozi bukwiye gufasha abaturage kubona amazimeza kandi hafi.
Agira ati, kuyavana kure bidindiza imirimo yacu mu ngo bigatuma abana bakerererwa kujya ku ishuri kuko kuyabona ari ukuzinduka bakabanza kuvoma , gutyo akenshi iyo uri umunyeshuri urasiba kuko ari kure kandi abantu baba ari igitero harimo abagomba kujya ku ishuri. Abandi bayashaka babanza kuvomesha bakabahenda kuko bayabona bibatwara nibura amafaranga 200 ku ijerikani imwe.”
Bamwe mu baturage bivuriza ku kigo nderabuzima cya Gatsibo, nabo bavuga ko iyo bagiyeyo bitwaza amazi meza ngo bitabanga mira isuku n’isukura.

Mirembe Josephine, utuye mu mudugudu wa Munini, avuga ko kubera amazi atahagera, iyo ugiye mu bitaro witwaza amazi meza kugirango bitabangamira isuku n’isukura kandi bikenewe bigasabwa n’umuntu winjiye ibitaro hano mu kigo nderabuzima.Ati, “ kubona amazi meza biracyatugoye cyane kuko abenshi mu baturage ba hano mu murenge wa Gatsibo, bahangayikishijwe no kubona amazi meza kuko batunzwe n’ayo mu mariba y’inka abandi mu bishanga abandi bakayasangira n’amatungo.”

Ubuyobozi bwafashe ingamba

Umunyamabanga Nshingwabikorwa w’Umurenge wa Gatsibo, Rugengamanzi Steven, yemeza ko ikibazo cy’amazi meza mu murenge ayobora gihari koko kuko akiri make ariko ko ubuyobozi bukizi kandi bufite gahunda yo kugenda bushaka igisubizo kirambye. Ku rundi ruhande, Umunyamabanga Nshingwabikorwa w’Akarere ka Gatsibo, Nankunda Jolly , asaba abaturage kujya barinda ibikorwaeremezo by’amazi baba bagejejweho kandi bakaba ijisho rireba ababyengiza. Agira ati, “biri muri gahunda ko abaturage bose bo mu karere ka Gatsibo bazaba bagezweho n’amazi meza mu mwaka 2019/2020, kuko ubu bageze kuri 71%, mu gihe umuhigo w’Akarere ka Gatsibo ari abaturage bagera kuri 73% bagomba kubona amazi meza muri uyu mwaka”.

Gasana Richard umuyobozi w’akarere ka Gatsibo , avuga ko muri aka karere bari ku kigereranyo cya 65%, bazana amazi meza, ariko bitewe n’aho bavuye bageze , bishimira uko ikibazo cy’amazi meza kigenda gikemuka .
Akomeza ashimangira ko muri aka karere bari ku kigereranyo cya 65%, bazana amazi meza, ariko bitewe n’aho bavuye n’aho bageze bishimira , ko nibura mu mwaka w’ingengo y’imari wa 2017-2018, bazaba bageze ku kigereranyo cya 90% cyangwa bakanakirenzaho bakageza ku 100% kuko ubusanzwe mu myaka itanu ishize akarere ka gatsibo kari ku kigero cya 32% by’amazi meza agera ku baturage ariko ubu hari intambwe imaze guterwa.

Kagaba Emmanuel


Tanga igitecyerezo

Who are you?