Yashyizweho kuri 5 May, 2016 | 09:36

RDC: Moïse Katumbi yatangaje ko aziyamamariza kuba Perezida

Kuri uyu wa gatatu taliki ya 04 Gicurasi Moïse Katumbi umuherwe wo muri Repubulika iharanira demokarasi ya Kongo yatangaje ko aziyamamariza kuba Perezida. Nyamara ibi abitangaje atorohewe n’ubutabera buri kumukoraho iperereza rimushinja kwinjiza abacancuro b’abarwanyi mu gihugu.

Moïse Katumbi , wahoze ayobora intara ya katanga, yatangaje kuri uyu wa gatatu ku mugoroba ko aziyamamariza kuba Perezida wa Repubulika iharanira demokarasi ya kongo. Ubu Moïse Katumbi ashyigikiwe n’amashyaka yitandukanyije n’ihuriro ry’abashyigikiye ishyaka rya Kabila(majorité).

Uku gutangaza kwiyamamaza kuje nyamara mu gihe Moïse Katumbi ari gukorwaho iperereza na minisiteri y’ubutabera ku kuba yarinjije mu ntara ya katanga abacancuro b’abarwanyi b’abanyamerika. Amahuriro y’amashyaka atatu hari hashize iminsi amuhamagarira kwiyamamaraiza kuba perezida none yayasubije. Mu nyandiko ye Moïse Katumbi ati" amahuriro y’amashyaka ya politiki yibumbiye mu cyiswe G7 yakomeje kunsaba kwiyamamariza kuba Perezida. None mu kwicisha bugufi kose nemeye izo nshingano zitoroshye". Mu busanzwe amatora ateganijwe kuba mu kwezi k’Ugushyingo uyu mwaka. Nyamara, bigaragara nk’aho ayo matora atazaba kubera impamvu zitangwa n’ubutegetsi nko kubanza gukora ibarura ry’abaturage n’ibindi bivugwa ko bitarajya mu buryo.

Itegeko nshinga rya Repubulika iharanira demokarasi ya Kongo rivuga ko igihe uwatsinze amatora atararahira haba hayobora Perezida wari usanzwe uri ku butegetsi. Ibi bikagaragara nk’iturufu ishaka gukoreshwa na Kabila ngo akomeze ayobore dore ko abadepite benshi biganjemo abaherereye kururuhande rwa Kabila banditse (pétition) basaba ko nyuma y’Ugushyingo amatora atabaye Kabila yaba akomeje kuyobora igihugu.

PAX PRESS


Tanga igitecyerezo

Who are you?