Yashyizweho kuri 3 May, 2016 | 15:40

RCA: Abahoze ari abarwanyi bayobotse iy’ubuhinzi

Nyuma y’amatora ya Perezida muri RCA, ubu abahoze mu mitwe yitwara gisirikari, barasubizwa mu buzima busanzwe. Aba, bahabwa amatungo n’ibikoresho by’ubuhinzi bagashoka ibishanga cyangwa bakajya mu bworozi ngo barebe ko bazahura ubukungu bw’igihugu bwazahaye. Abaturage barifuza ko byaramba kuko barambiwe intambara.

Abahoze mu nyeshyamba muri RCA bavuka muri Kaga-Bandoro, bashyize intwaro hasi mu cyumweru gishize bahitamo kuyoboka iy’ubuhinzi ngo bafashe igihugu mu bikorwa bizahura ubukungu bwazahajwe n’intambara n’amacakubiri. Iki gikorwa cyakozwe ku bufatanye bwa Minusca n’Ishami ry’umuryango w’abibumbye ryita ku buhinzi(FAO).

Nk’uko bitangazwa na http://fr.allafrica.com, Rosmon Zokoué ukora muri FAO avuga ko babahaye ibikoresho by’ubuhinzi n’ubworozi. Mu bahoze barwana 500 biyandikishije, 80 bahisemo gushoka ibishanga, bahabwa ibikoresho n’imbuto. Abahisemo ubworozi bahabwa ibikoresho by’ubworozi , ingurube n’andi matungo magufi. Gribizi Gaston Yendémo, umuyobozi w’intara ya Nana avuga ko ibyo bikorwa bigamije kuzahura ubuhinzi n’ubworozi. Ngo ni icyifuzo cy’abaturage ubwabo kuko ubuhinzi bwasubiye inyuma kubera iyo mitwe yitwara gisirikari irwanira hafi aho. Abasore 750 bahoze muri Séléka na Anti-Balaka nibo ubu bafashijwe gukora utundi turimo tubafasha kubona amafaranga.

Ibi ni imwe mu ngamba zafashwe nyuma y’isinywa ry’amasezerano yo kwamburwa intwaro, gusubiza mu buzima busanzwe abari mu mitwe yitwara gisirikari, nyuma y’ibiganiro mu masezerano yabereye Bangui muri Gicurasi 2015. Aya masezerano yashyizweho umukono hagati y’imitwe icyenda yitwara gisirikari na minisiteri y’ingabo yagaragajwe nk’inzira yo kurangiza amakimbirano yo muri RCA. Asaba buri mutwe guhagarika intambara, gushyira hamwe abarwanyi bawo vuba ahabigenewe, Leta nayo igatenganya ifatanyije n’abaterankunga uburyo bwo kubafasha gusubira mu buzima busanzwe.

PAX PRESS


Tanga igitecyerezo

Who are you?