Yashyizweho kuri 6 April, 2016 | 16:42

Abayobozi ba Kenya ntibagikurikiranywe na ICC

Nyuma ya perezida Uhuru Kenyata, visi perezida we William Ruto nawe ntagikurikiranywe n’Urukiko Mpuzamahanga Mpanabyaha. Nyamara kuri Ruto, ngo ubushinjacyaha buracyafite igihe cyo kujurira.

Urukiko Mpuzamahanga Mpanabyaha (ICC) rwahagaritse gukurikirana Visi Perezida wa Kenya William Ruto n’umunyamakuru Joshua Arap Sang mu rubanza bari bakurikiranyweho kugira uruhare mu mvururu zakurikiye amatora muri Kenya mu 2007. Urukiko rwemeje ko urubanza rwagenze nabi bitewe no kwivanga kw’abatangabuhamya ndetse n’ukwivanga kwa politiki. Abatangabuhamya muri uru rubanza bakunze kwivuguruza mu buhamya bwabo; ibyo urukiko rukaba rwabishingiyeho rwemeza ko Ruto na mugenzi we batakurikiranwa.
Umucamanza yavuze ko abo bagabo bombi ari abere kuko nta bimenyetso bifatika bibashinja.
Umushinjacyaha wa ICC Fatou Bensouda yari yavuze ko ibura ry’abatangabuhamya ryaciye intege iki kirego gusa ngo uru rubanza rushobora kuzongera kuburanishwa mu bihe biri imbere ubushinjacyaha buramutse bujuriye kubera ibindi bimenyetso bifatika. .
Perezida wa Kenya Uhuru Kenyatta yavuze ko yishimiye icyemezo cy’urukiko mpuzamahanga mpanabyaha rwo kureka gukurikirana William Ruto n’umunyamakuru Joshua Arap Sang. Yagize ati « Ibihe nk’ibi byari bitegerejwe, turishimye cyane. Ngiye kwifatanya na bagenzi banjye kwishimira intsinzi mu butabera. »
Kenyatta yavuze ko ibikorwa by’ubutabera n’ubwiyunge bizakomeza mu baturage b’iki gihugu hazibwa icyuho cy’ibyo uru rukiko rwananiwe.

Mu mwaka ushize, uru rukiko nanone rwatangaje ko rutagikurikiranye Perezida Uhuru Kenyatta wa Kenya, ku byaha ubushinjacyaha bwamuregaga bw’inyokomuntu. Icyo gihe umuryango uharanira uburenganzira bw’ikiremwa muntu Human Rights Watch, wanenze bikomeye icyemezo cy’urukiko ivuga ko icyo cyemezo cyasubije inyuma gahunda zo guharanira kurwanya umuco wo kudahana muri Kenya.

Kenyatta, kimwe na visi perezida we n’umunyamakuru Joshua Arap Sang ubushinjacyaha bwabaregaga guhamagarira abaturage gukora ubwicanyi n’urugomo bishingiye ku moko, nyuma y’amatora yo mu mwaka wa 2007.

Ubwo bwicanyi n’imvururu bwahitanye abantu basaga 1 100, abandi basaga ibihumbi 500 bava mu byabo.

Karegeya Jean Baptiste


Tanga igitecyerezo

Who are you?