Yashyizweho kuri 15 April, 2016 | 09:03

2016: Yaya Touré, Umunyafrika winjiza menshi kurusha abandi kubera football

Nkuko bisanzwe bigenda buri mwaka, ikinyamakuru France Football cyashyize ahagaragara abakinnyi bahembwa neza muri uyu mwaka wa 2016. Mu bakinnyi b’Abanyafrika, uwongeye kuyobora urwo rutonde ni umukinnyi Yaya Touré ukomoka mu gihugu cya Kotedivuwari, akaba mu mezi 12 ashize yarashyize mu mufuka we miliyoni 18 z’amayero. Hagati aho ariko, urebye umushahara gusa, Touré arushwa na Asamoah Gyan.

Yaya Touré ayoboye uru rutonde inshuro 2 zikurikiranya! Nk’uko bitangazwa na France Football, Touré ukinira ikipe ya Manchester City yinjije miliyoni 18 z’amayero mu mezi 12 ashize y’umwaka wa 2015. Uyu mukinnyi w’imyaka 32 ariko ngo yatangiye kwitegura ko abandi bazamucaho, dore ko no kuri ayo mafaranga yinjije hagabanyutseho miliyoni 2 z’amayero ku mushahara we, bitewe n’uduhimbazamusyi tumwe atabonye ndetse no guta agaciro k’i Livre sterling rikoreshwa mu bwongereza.Gusa amafaranga yinjije mu bikorwa byo kwamamaza akaba yariyongereye akaza kuziba icyo cyuho.

Ubwo yoherezwaga mu ikipe ya Shangai SIPG mu kwezi kwa 7 kwa 2015, Asamoah Gyan ukomoka muri Ghana ni we wahembwaga amafaranga menshi mu Bushinwa (miliyoni 15 z’amayero ku mwaka) kuri kontaro y’imyaka ibiri.

Umwaka utaha ariko, ibintu bishobora guhindura isura. Mu gihe Yaya Touré yaba avuye burundu muri Manchester City, nk’uko “manager” we adasiba kubivuga, ashobora kuzagira ikibazo cyo kutabona indi kipe imwakira ikamuha n’akayabo k’amafaranga nk’ayo yabonaga. Nko mu mwaka ushize ikipe ya Inter Milan yashatse kumugura, nyamara umushahara yashakaga kumuha wanganaga n’uwo yahabwaga ubu ugabanyije kabiri ! Kongera kuyobora uru rutonde rero bishobora kumubera inzozi.

Abakinnyi 11 b’Abanyafurika bahembwa menshi muri 2105/16

Muri aya mafaranga binjije harimo imishahara, agahimbazamusyi n’ayo bakoreye mu bikorwa byo kwamamaza mu mezi 12 ashize :

1.Yaya Touré (Côte d’Ivoire / Manchester City): 18 M€
2. Asamoah Gyan (Ghana / Shanghai SIPG): 17,5 M€
3. André Ayew (Ghana / Swansea): 12 M€
4. Gervinho (Côte d’Ivoire / Hebei Fortune): 7,6 M€
4. Mohamed Salah (Égypte / AS Roma): 7,6 M€
6. Mehdi Benatia (Maroc / Bayern Munich): 7,5 M€
7. Demba Ba (Sénégal / Shanghai Shenhua): 7,3 M€
8. Sulley Muntari (Ghana / Al-Ittihad): 7 M€
9. Pierre-Emerick Aubameyang (Gabon / Borussia Dortmund): 6,8 M€
10. Emmanuel Adebayor (Togo / Crystal Palace): 6,6 M€
11. Wilfried Bony (Côte d’Ivoire/Manchester City): 6,4 M€.

Abakinnyi 3 bahembwa neza ku rwego rw’isi

Muri aya mafaranga binjije harimo imishahara, agahimbazamusyi n’ayo bakoreye mu bikorwa byo kwamamaza mu mezi 12 ashize :

1.Lionel Messi (Barcelone) - 74 M€ (Umushahara: 36 M€, agahimbazamusyi : 3 M€, ibindi : 35 M€)
2.Cristiano Ronaldo (Real Madrid) - 67,4 M€ (Umushahara: 32 M€, agahimbazamusyi: 400 000€, ibindi: 35 M€)
3. Neymar (FC Barcelone) - 43,5 M€ (Umushahara: 20 M€, agahimbazamusyi : 2,5 M€, ibindi: 21 M€)
......................
17. Yaya Touré (Manchester City) - 18 M€ (Umushahara: 13,5 M€, agahimbazamusyi : 700 000 euros, ibindi: 3,8M€)
...
19. Asamoah Gyan (Shanghai SIPG) - 17,5 M€ (Umushahara : 15M€, agahimbazamusyi : 1M€, ibindi: 1,5 M€)

Uru rutonde rurahindagurika bitewe n’ukuntu abakinnyi bagenda babona amakipe abagura, kandi imishahara iba itangana. Ikindi ni uko ibikorwa byo kwamamaza na byo bidahoraho kandi bitinjiza amafaranga angana.

Higiro Adolphe


Tanga igitecyerezo

Who are you?