Yashyizweho kuri 3 May, 2016 | 09:25

Gakenke: Barakangurirwa kurwanya ihohoterwa iryo ari ryo ryose

Ubwo bari mu murenge wa Muzo ho muri aka karere, Meya Nzamwita yakanguriye abaturage gukorana bya hafi n’inzego z’umutekano n’ubuyobozi bw’ibanze bagatanga amakuru ajyanye n’ihohoterwa ryo mu ngo. Guhohoterwa si ugukubitwa gusa kuko hagaragara n’ubundi bwoko bw’ihohoterwa riri muri ako karere .

Ubwo bari mu murenge wa Muzo ho muri aka karere, Meya Nzamwita yakanguriye abaturage gukorana bya hafi n’inzego z’umutekano n’ubuyobozi bw’ibanze bagatanga amakuru ajyanye n’ihohoterwa ryo mu ngo akenshi ngo riba rishingiye ku gitsina ndetse ugasanga akenshi binagira ingaruka ku bana.

Meya Nzamwita kandi yihanangirije abantu kureka kunywa ibiyobyabwenge kuko ari yo ntandaro y’ihohoterwa rya mu ngo. Ati “Umugabo cyangwa umugore uhohotera uwo bashakanye aba asigiye umurage mubi abamukomokaho, amakimbirane hagati y’abashakanye biri mu bituma abana bahunga iwabo bakajya ku mihanda bagahitamo kubaho mu buzimabwo kunywa ibiyobyabwenge no kwiba kuko baba babuze uburere mu muryango.” ihohoterwa ntirigira ingaruka gusa ku warikorewe. Nzamwita ati: “ihohoterwa rihungabanya ubukungu kuko rituma abantu bata igihe, bagatakaza amafaranga bivuza ndetse bikanatuma umusaruro w’urugo ukomeza kugabanuka”

Guhohoterwa si ugukubitwa gusa

Ubwo umuryango w’abanyamakuru baharanira amahoro PAX PRESS wari wasuye umurenge wa Kivuruga muri aka karere nyine, abanyamakuru babwiwe ko hari irindi hohoterwa ryo gucyurira abagore babazwa icyo bazanye mu rugo. "Umugore ava iwabo azanye ibishyingirinwa yaguze mu nkwano umugabo aba yatanze, umugabo iwabo bakamuha umunani, umugore akaza kumurya imitsi, umugore we kuki iwabo batamuha umunani ngo aze ashyire hamwe n’umugabo bafatanye kwiteza imbere. Ngiyi impamvu ituma tubaza abagore ngo bazanye iki?". Iyo ni imvugo ya bamwe mu bagabo batuye mu Tugari dutandukanye two mu Murenge wa Kivuruga, bifuza ko hari ibyahinduka mu myumvire y’Abanyarwanda, umugore akajya ahabwa umunani n’ababyeyi be igihe agiye gushyingirwa, aho kujyana ibikoresho byo mu rugo n’ibiryamirwa gusa. Nyamara nubwo babivuga gutyo ubu buri mwana wese yemewe guhabwa umunani mu muryango nyarwanda. Ntibikiri umwihariko w’abahungu gusa.

Nk’uko bamwe mu bagore bo muri aka gace babivuga, ngo nubwo batagikubitwa inkoni amagambo mabi abagabo babo bababwira ababaza kurusha inkoni. Mukanyangezi Marie Claire yavuze ko umugabo babyaranye abana batanu, iyo agize icyo amusaba, amucyurira ko ntacyo yakuye iwabo. Yagize ati “Nk’iyo musabye ingwate kugira ngo njye gusaba inguzanyo kuri Sacco nk’abandi bagore, arambwira ngo ninjye gutanga ingwate mu isambu ya data, ngo ese ubundi wazanjye iki? Kandi twasezeranye ivangamutungo.”

Nyirafirimbi Rosalie, na we ngo iki kibazo akibazwa n’umugabo we. Yagize ati “Abagabo ni byo ntibakidukubita inkoni, ariko ijambo badukubitisha batubaza icyo twazanye ridushengura umutima kurenza inkoni.” Nk’uko aba bagore ndetse n’abandi bakomeje babivuga, ngo babona iri ari ihohoterwa bakorerwa n’abagabo babo, bakaba bifuza ko ubuyobozi bwabarenganura.
Nyamara abagabo ntibabibona nk’ikibazo. Bamwe bo muri uyu murenge bavuga ko kubaza abagore iki kibazo atari ihohoterwa, ahubwo bashaka ko ibintu bihinduka.
Kanyamashuri Thomas, ni umugabo uvuga ko umugore we yazanye amasahani n’ibiryamirwa gusa. Ati “Ibishyingiranwa yazanye yabiguze mu mafaranga natanze yo kumukwa ibihumbi 150. Nonese ubwo yazanye iki? Ibintu bikwiye guhinduka umugore na we akajya ahabwa umunani n’ababyeyi be hanyuma akaza agateranya n’uwo umugabo aba yahawe bakubaka urugo.”

Uyu mugabo ndetse na bagenzi be batandukanye, bavuga ko amasahane, ibiryamirwa n’imyenda abagore bashyingiranwa, kuri ubu babona nta gaciro bifite ngo bifuza ko bajya bagegerwa umunani n’iwabo bakawuzana nawo ukaba mu mitungo y’urugo, ukanahesha umugore agaciro n’icyubahiro birushijeho.

Umunyamabanga Nshingwabikorwa w’Umurenge wa Kivuruga, Mungaruriye Fidele, yavuze ko abasore n’inkumi bakwiye kwimakaza urukundo no kubwizanya ukuri mbere yo kubana. Ati “Umukobwa ashobora kuza nta kintu afite, ariko nyuma y’igihe runaka bagakora bombi bafatanyije bakiteza imbere. Iyo tugiye kubasezeranya rero tunababaza niba barabwizanyije ukuri ku mutungo buri wese afite.”

Umuyobozi wa polisi mu karere ka Gakenke Supt. Gaston Karagire akangurira abaturage kwitabaza polisi mu gihe bahuye n’ihohoterwa ryaba iryo mu ngo, irishingiye ku gitsina cyangwa irikorerwa abana ndetse n’ibindi byaha byose kuko aricyo ibereyeho ariko cyane cyane, abaturage bagakumira icyaha kitaraba.

Uwambayinema Jeanne


Tanga igitecyerezo

Who are you?