Yashyizweho kuri 2 August, 2016 | 10:30

Rweru:Abimuwe Mazane na Sharita mu byishimo, amaganya n’ibyifuzo

Umudugudu w’icyitegererezo wa Mbuganzeli utuwe n’abimuwe bava kirwa cya Mazane na Sharita, wubatse mu karere ka Bugesera, umurenge wa Rweru, akagari ka Batima. Ubu umaze kwimurirwamo abantu 104 mu basaga 400 bagomba gukurwa muri ibyo birwa. Abimuwe bishimiye uyu mudugudu bazanywemo dore ko ufite ibikorwaremezo by’ibanze byose.

Kuva ku muhanda wa kaburimbo ujya aho uyu mudugudu wubatse bifata iminota 15 n’imodoka. Uyu muhanda w’itaka ni mwiza ku buryo bamwe bajyayo bawita Kaburimbo kubera uburyo bawukoze neza ubwo Perezida wa Repubulika yajyagayo gutaha uyu mudugudu ku itariki 4/7/2016. Utaye uyu muhanda munini ugafata agahanda gato kinjirayo, utangira kubona inzu ziteye igipande cya sima zose, ubona kandi amapoto y’umuriro ku bice byombi by’ako gahanda. Ukiwinjiramo ubona icyumba cy’ikoranabuhanga, ukabona na poste de santé (aho bivuriza). Inzu zisakaje amabati n’ubusitani buri guterwa imbere y’izo nzu.

Ubona inzu z’amatafari ahiye abenshi bita mpunyu zisakaje amabati asanzwe y’imituku, zituwemo n’imiryaango ibiri muri buri nzu ku zubatswe mbere n’imiryaango itatu ku zubatswe vuba. Buri nzu ifite ikiraro kigezweho kirimo inka za kijyambere leta yahaye buri muryaango. Ku masaha ya saa cyenda abazituyemo barakeye bicaye imbere y’ibyo biraro. Bavuga ko ntacyo bakora kindi uretse kwita kuri izo nka, babifashijwemo n’abaveterineri ndetse n’ushinzwe imirire yazo.

Ludoviko yicaye ku gatebe k’urubaho, imbere y’ikiraro. agira ati “twishimira ko twakuwe ahantu habi tugashyira ahantu heza gutya. N’ubwo ibyo kurya baduhaye ubu byashize ariko batubwira ko ibindi biratugeraho vuba”. Kumusaba kugereranya uyu mudugudu n’aho yavuye akubwira ko atari ahantu ho kugereranya. Agira ati “n’ubwo ntazi i Kigali ariko njye mbona aha ari nkaho”

Akazi bagira ni ukwita ku nka

Ibiraro bya kijyambere birimo inka nziza z’inzungu zisaga 60. Uwazibona yakwibaza uburyo aba bimukira babasha kuzitunga, hakiyongeraho n’uko iki gihe ari icy’izuba ryinshi. Kuri bo koko ngo izi nka ziragoye ariko ngo ubufasha bwose barabuhabwa. Uwimana Marie ubafasha mu kuzikurikirana, nawe abishimangira agira ati “biragoye ko aba baturage bashobora gufata neza izi nka. Nkorera aha na bagenzi banjye kandi mu rwego rwo kubafasha. Uretse kubaba hafi, RAB/Karama ibaha ibiryo byazo ikabazanira n’amazi yo kuziha dore ko hano amazi ari ikibazo”.

Cyakora n’ubwo bishimira uburyo babayeho ariko ngo babangamiwe n’uko batagira munsi y’urugo. Abakuze bavuga ko basubira aho bavuye gushaka ibyabatunga kuko aha ntaho guhinga bari babona kandi ngo ari wo mwuga wabo. Mukeshimana abisobanura agira ati “nkanjye sinamenyereye kubyuka nicaye rwose, ariko kuba nta munsi y’urugo ngira ni zo mbogamizi mfite. Rimwe na rimwe nsubira Mazane gusarura ibyo nasize mpinze kuko biramfasha muri iki gihe ibyo kurya ari bike hano”. Cyakora umuyobozi w’umurenge wa Rweru, Rwabuhihi Jean Christophe, avuga ko aba bari gushakirwa aho guhinga, ku buryo igihe cy’ihinga kizagera habonetse.
Bagenerwa ibyo kurya, bahawe imifariso baryamaho, inzu bahawe ni nziza zirimo amashanyarazi n’ubwo ngo batarazibonera ibyangombwa ariko ngo baracyakeneye byinshi. Guhanga umudugudu nk’uyu ngo ni igikorwa bashimira leta y’u Rwanda ariko ngo ibabe hafi kurushaho kuko ngo ari yo bafata nk’umubyeyi wabo nk’uko Odette abivuga.

Odette kandi udahisha amarangamutima y’uko abayeho, agira ati “ubu narabyibushye kubera kurara heza, ndacana amashanyarazi mu nzu mbese ndatuje. Cyakora ibiryo biradushiranye ariko twizeye ko leta umubyeyi wacu utureberera azaduha ibindi mu gihe cya vuba”.

N’ubwo ariko batujwe neza kandi bakaba bafashwa, ariko basangiye n’abaturage b’akagali ka Batima ibibazo bisanzwe. Amazi kuri bo ni ikibazo kuko bahabwa ayo guha inka nyamara bo ntayo gukoresha babona, kuko mu ma robinets bahawe nta mazi aherukamo nk’ahandi hose. Ikibazo cy’inzara nabo nticyabarenze ahubwo kuri bamwe badashaka gutangazwa iyo hagezweho iyo ngingo, bavuga ko bo inzara bafite irenze iy’abandi kuko ibiryo bari bahawe byashize.

Musonera Sosthѐne


Tanga igitecyerezo

Who are you?